Maliko 5 - Chipangano Chabwangu

Yesu aposha umuntu uwali nemipashi iibi

¹ Nakambi bayile kwishilya ilyaku Bemba wa Galili kuchalo cha Gelasa.

² Ulo Yesu afumine mubwato, bwangu-bwangu akumene nomuntu uwali nomupashi uubi. Alikufuma kumanda, ali nenjikalo yakwe kwenka nkulya.

³ Abantu bafililwe ukumwikata nangu ukumukaka namabunyololo.

⁴ Inshita ishinji balikumukaka inshita ishinji namangwelengwende nobunyololo, kuntu ye alikuputaula ubunyololo, nakambi namangwelengwende nawo alikuputayika mutupinswa. Echo tapalipo umuntu uwafiso ifyakuti amunashe.

⁵ Elo inshita shonse, ubushiku nakasuba, alikwendauka kumanda nakumpili, alikwaula nokuyichenaula umwine enka namabwe.

⁶ Ulo abwene Yesu apatali, alibutukile nokwisa kufukama nokumulambila pamakasa akwe

⁷ nokwaula neshiwi ilikulu ati, “Nindo ukofwaya kuli nebo webo Yesu, we Mwana waku Lesa Uwapulamo? Napapata, winchushapo!” (

⁸ Asosele mfi pakuti Yesu amwebele ati, “Fuma mumuntu we mupashi uubi!”)

⁹ Elo Yesu amufumbile ati, “Ishina lyobe niwe nani?” Naye alimwasukile ati, “Nine Ibumba, pakuti tuli abenji.”

¹⁰ Epo alimupapatile Yesu ukuti eitamfisha mipashi iibi kunse yachalo.

¹¹ Elo kwalipo ibumba ilikulu ilyankumba ilyalikulya mululamba lwalupili.

¹² Nomba imipashi iibi yalimupapatile Yesu ati, “Tutamfisheni munkumba, emo tuye twinjile.”

¹³ Naye aliyisuminishe. Elo nemipashi iibi yalifumine mumuntu nokuya kwinjila munkumba. Nenkumba ishali ubwinji mupepi namakana abili, shalifulumukile pachinekami nokuya kwibila muli bemba, nokufwa kashifwa.

¹⁴ Ulo bachembela babwene mfi, babutukile kumusumba nakumishi yamumbali mukweba abantu ilyashi ndi. Abantu balile mukubona ichachitikile.

¹⁵ Ulo bafikile kuli Yesu basangile umuntu uwali nemipashi iinji iibi alikele, nokufwala alifwite, namano akwe alibwelelemo. Elo bonse baliketwe nomwenso.

¹⁶ Bo ababweneko balisosele ifyo apolele umuntu uwali nemipashi iibi, nefyachitikile kunkumba.

¹⁷ Elo batatikile ukumupapatila Yesu ati, “Tufuminenimo muno chalo chesu.”

¹⁸ Ulo Yesu apateme mubwato, ngulya muntu uwali nemipashi iibi alimupapatile ati, “Lekeni ndokuya nenu.”

¹⁹ Yesu alikene nokumweba ati, “Koya kumyenu, nakubantu bobe, uye ukabasambisheko fyonse ifyo Imfumu yakuchitila nefyo akubelela ichisa.”

²⁰ Elo ngulya muntu ayile, akoshimika muchalo cha Mishi Ikumi fyonse ifyo Yesu amuchitile. Epo abantu bonse balishimbilwe ukwinekantu.

Yesu abusha mwana Yayilo, aposha nomwanakashi

²¹ Nakambi Yesu ayabukile mubwato kwishilya limbi ilyaku bemba. Ibumba ilikulu lyalilongene kuli Ye, pambali yaku Bemba wa Galili.

²² Epo kwayishile umuntu umo uwabakulu bamunanda yakulombelamo Lesa, uwali kwitwa Yayilo. Pakubona Yesu, amufukamine

²³ nokumupapatila ukwinekantu ati, “Akanansungu kanji kali mupepi nokufwa. Iseni mubike amaboko enu pali nko, ukuti kapole, kabe nobumi.”

²⁴ Yesu alile nakwe, nakambi ibumba ilikulu lyalimukonkele, epo balimufininkishe.

²⁵ Mwibumba mwalimo nomwanakashi uwalikulwala umukunko pamyaka ikumi na ibili.

²⁶ Aliposayikile ifyuma fyonse akwete kung’anga, kuntu takwalipo nangu umo uwamuposeshe. Ubulwele bwakwe bwalikulile.

²⁷ Ngu mwanakashi aumfwile kale ifyo abantu balikusosa pamulandu waku Yesu. Epakupekesa mwibumba nokupalamina kuli Yesu kunuma, nokukumyako kwilaya lyakwe.

²⁸ Umwanakashi alikulanguluka ati, “Nga nakumyako kwilaya lyakwe, epela nkopola.”

²⁹ Alikumyako kwilaya bwangu-bwangu nomukunko waleka, aumfwa nomubili waleka ubukali.

³⁰ Bwangu-bwangu Yesu, pakwishiba umwine ukuti ifiso fyafumamo muli Ye, walyalukile mwibumba nokuti, “Ninani wakumya kwilaya lyanji?”

³¹ Abakusambila bakwe basosele kuli Ye ati, “Ulibwene ibumba likokufininkisha, epo ukofumba shani wati, ninani wankumya?”

³² Nomba Yesu alichenchentele konse-konse ukuti abone umukumishe.

³³ Umwanakashi pakwishiba nchilya ichamuchitikile, alile akotina nokututuma, awile pamakasa aku Yesu nokumubusha ukwebesha konse.

³⁴ Elo Yesu asosele kuli ye ati, “We mwana wanji ichichetekelo chobe chakuposha. Endelapo umutende, wikale we wapola kubulwele bobe.”

³⁵ Ulo Yesu alikusosa mfi, kwayishile bambi abafumine kunanda yakwa Yayilo nokuti, “Umwanansungu obe afwa. Mba nindo ukochushisha umusambishi?”

³⁶ Yesu tasakamenepo nefyo balikulabila. Elo asosele kumukulu wananda yakulombelamo Lesa ati, “Witina, chetekela bwaka.”

³⁷ Nomba tasuminishepo ukuti umuntu amukonke, kuntu Petulo, Yakobe na Yohane wabo wakwa Yakobe.

³⁸ Ulo ayile kunanda yamukulu wananda yakulombelamo Lesa, emo aumfwile abantu bakolila nenkonde nokuwowoka.

³⁹ Atile ukwinjila munanda, abebele ati, “Findo mukolilila inkonde nokuwowoka? Umwana tafwilepo, alele bwaka utulo!”

⁴⁰ Abantu balimusekele ukwinekantu. Elo Yesu alibafumishe bonse, abulile bawishi nabanyina nabo ali nabo, ayinjile nabo umwali umwana.

⁴¹ Epo alimwikete umwana pakuboko nokusosa kuli ye ati, “Tabita komu,” ekweba ati, “We mwanansungu, buka!”

⁴² Bwangu-bwangu umwanansungu alibukile, alimakene nokwenda (pakuti ali nemyaka ikumi na ibili.) Abantu ulo babwene mfi, balishimbilwe ukwinekantu!

⁴³ Elo Yesu abakonkobesha ukwinekantu ati, “Mwileka nchi chintu chishibikwe kumuntu nangu umo. Nakambi abebele ati, ‘Peleniko umwana ichakulya.’”