Maliko 4 - Chipangano Chabwangu

Ichelusho chawakuminsa

¹ Nakambi Yesu atatikile ukusambisha mumbali yaku Bemba wa Galili. Nebumba ilikulu ukwinekantu lyalilongene kuli Ye. Echalengele ukuti Yesu apatame mubwato nokwikala. Abantu bonse bayikele pamulundu mumbali yaku bemba.

² Elo alibasambishe ifintu ifinji mufyelusho. Asosele kuli bo ati,

³ “Umfweni! Kwali umuntu uwayile mukuminsa imbuto.

⁴ Ulo alikuminsa, imbuto shimbi shawile munshila. Elo ifyuni fyalishile nokushilya.

⁵ Shimbi shawile mulubwelekese, apatalipo umushili uwinji. Bwangu-bwangu shalimenene.

⁶ Ulo akasuba kakwelele, imisongo yalifotele nokuma pantu imishu tayayinjilepo ukwinekantu panshi.

⁷ Shimbi nasho shawile muminga, elo iminga yalikulile nokushitabilisha. Shalikulile, kuntu tashatwitepo ifilyo.

⁸ Nomba shimbi shawile mumushili uuweme, nokutwala shalitwite ifilyo, ukukula nokufula. Shimbi shatwite amakumi atatu, shimbi amakumi mutanda, elo nashimbi umwanda umo.”

⁹ Epo Yesu asosele ati, “Uukwete amatwi aakumfwa, omfwe!”

Umwalola ifyelusho

¹⁰ Ulo Yesu ashele enka, abantu bambi abamumfwile bayile kuli Ye pamo nabakusambila ikumi na babili. Balimufumbile ukubalondolwela umwalola ifyelusho.

¹¹ Epo asosele kuli bo ati, “Kuli mwebo kwapelwa ichamfiso ichabufumu bwaku Lesa, ekwebati kuli mbalya abakunse, ifintu fyonse fikochitika mufyelusho.

¹² Ekwebati, ‘Ukulolesha nangu balolekeshe, lelo bebwenekesha, ukumfwa nangu bomfwe, lelo beumfwikisha, epali bayalukila kuli Lesa, naye angabanakilila.’”

Umwalola ichelusho chawakuminsa

¹³ Epo Yesu alibafumbile ati, “Kanshi tamwishibilepo umwalola nchi chelusho? Epo mwakwishiba shani ifyelusho fimbi?

¹⁴ Uwakuminsa akominsa amashiwi aku Lesa.

¹⁵ Bambi abantu bali kubati nimbuto ishawile mumbali yanshila. Bwangu-bwangu ulo baumfwa amashiwi aku Lesa, penkapo Satana alesa nokusompolamo amashiwi ayaminswa mumitima yabo.

¹⁶ Abantu bambi baba nge mbuto ishawile mulubwelekese. Bo ulo baumfwa amashiwi aku Lesa, bwangu-bwangu balapokelela nokusekelela.

¹⁷ Nomba amashiwi nga tayenjilisha mumitima yabo, yayikalamo lukoso inshita iinini. Ulo kwayisa ubuchushi nomwalu, pamulandu wamashiwi aku Lesa, bwangu-bwangu baleka ukumfwa amashiwi nga.

¹⁸ Bambi nabo baba kubati nimbuto shawile muminga. Aba ebomfwa amashiwi aku Lesa,

¹⁹ kuntu pamulandu wamasakamiko amikalile yamuno chalo, nolunkumbwa lwabusambashi, ulunkumbwa lwafintu fimbi, fikoyinjilamo nokufininkisha amashiwi, epo tabatwalapo ifitwalo.

²⁰ Nomba bambi eko bali ababa nge mbuto ishawile mumushili uuweme. Mba ebomfwa amashiwi aku Lesa nokwapokelela mumitima yabo. Elo batwala ifitwalo, bambi amakumi atatu, bambi amakumi asano na limo, bambi nabo umwanda umo.”

Ichelusho chanyali

²¹ Yesu asosele ati, “Napo abantu kuti babule nyali nokuyifunikila munongo, nangu ukuyifisa mwifungu? Kanshi tekuti bayiteke apasansukile?

²² Pakuti takuli akantu akafisama, akatakafisuluke. Nakambi takupo ichankama nangu chimo ichitakatulike.

²³ Uukwete amatwi aakumfwa, omfwe!”

²⁴ Yesu abebele nakambi ati, “Mulokuposako amano kufintu mukoumfwa! Umulingo uwo mukolingilako bambi, ewo namwe Lesa akumulingilako.

²⁵ Pakuti umuntu uukwete, akubikilwapo nafimbi, kuntu ukwete kanini akupokwa nako akwete.”

Ichelusho chambuto

²⁶ Yesu asosele nakambi ati, “Ubufumu bwaku Lesa bwaba nga mfilya umuntu aminsa imbuto mwibala lyakwe.

²⁷ Elo inshiku shonse akobomba, kuntu teshibapo ifyo imbuto shikomena nefyo shikokula.

²⁸ Umushili eumesha nokukusha imbuto, pakwamba umusongo eubalilapo, elo pakonka umutwi uwiwilemo inseke.

²⁹ Nomba ulo ifitwalo fyapya, umuntu abula ulubeshi, atatika ukusepa, pantu inshita yakusepa yafika.”

Ichelusho chakaseke kamasitadi

³⁰ Yesu asosele nakambi ati, “Kanshi Ubufumu bwaku Lesa tukobulinganya nendo? Elo chelusho ndo tungabulondolwelamo?

³¹ Bwaba kubati kaluseke kamasitadi, akanini panseke shonse ishapano chalo.

³² Nomba ulo bakabyele, kaalikulile, ukuchila pafimpukesa fyonse. Nakambi kakwata nemisambo iikulu, nefyuni fyalishile nokupikamo ifinsa mumisambo yachiko.”

³³ Yesu alikubilisha amashiwi aku Lesa mufyelusho ifinji ifyaba nga mfi, ukulingana napapelele amano abo.

³⁴ Talikubasoselapo akantu nangu kamo ukwambula ukubasosesha mufyelusho, kuntu kumbali eko alikulondolola fyonse kubakusambila bakwe.

Yesu atalalika ichipupu namatamba

³⁵ Bwenka mbulya bushiku, kwatile ukuba ichungulo, Yesu asosele kubakusambila bakwe ati, “Katwabukile kwishilya lyaku bemba.”

³⁶ Elo bafumine pebumba, abakusambila bakwe bayinjile mubwato umo Yesu ayikele, bayile nakwe. Kwali namato nayambi ayali pamo nobwato ubo alimo.

³⁷ Elo kwabukile ichipupu ichikulu, amatamba alikwinjila mubwato, epo ubwato bwali apepi nokwiula amenshi.

³⁸ Nomba Yesu alilele utulo kuchitwi chabwato pamusawo, kunuma. Epo balimushibwishe. Elo basosele kuli Ye ati, “We musambishi, kanshi taukolangulukapo ukuti tukofwa?”

³⁹ Yesu alishibukile, nokukalipila ichipupu, aeba nabemba ati, “Talala, ikala chelele!” Elo ichipupu chalilekele, kwatalele chelele.

⁴⁰ Elo Lesu asosele kubakusambila bakwe ati, “Nga findo mwabela nomwenso? Kanshi nanomba tamulakwata ukuchetekela, bayi?”

⁴¹ Balitinine ukwinekantu nokusoshanya umo nomunakwe ati, “Ngoyu muntu wamusango shani, uwakuti ichipupu namatamba fikomumfwila?”