Maliko 3 - Chipangano Chabwangu

Yesu aposha uwachisansa ichauminina

¹ Yesu ayinjile nakambi munanda yakulombelamo Lesa, umo umwali umwalalume uwali nechisansa ichauminina.

² Abantu bambi balimulolekeshe Yesu ati nangula akomuposha pe Sabata, ukuti basange apakumupelelapo umulandu.

³ Epo asosele kumuntu uwali nechisansa ichauminina ati, “Ima, isa nkuno kuntanshi.”

⁴ Epo afumbile abalimo ati, “Chindo ifunde lyatusuminisha ukuchita pakasuba ke Sabata? Ukwafwa nangula ukuchena? Ukupulusha ubumi bwamuntu nangula ukwipaya?” Nomba balikutumene bwaka.

⁵ Epo atile ukubachenchenta nobukali, ichikonko chalimwikete pamulandu wakutomfwa kwabo, elo asosele kuli ngulya muntu ati, “Tambulula ukuboko kobe.” Naye alikutambulwile, elo kwalipolele.

⁶ Nomba Abafalisi balifuminemo munanda yakulombelamo Lesa. Bwangu-bwangu pamo nabantu bakwa Helodi, balifumbene nokupanga ifyakuti bamwipaye Yesu.

Ibumba lyabantu abenji lyalongana kuli bemba

⁷ Yesu na bakusambila bakwe balifumineko, bayile kuli Bemba wa Galili. Nebumba ilikulu lyalimukonkele. Abo bantu bafumine ku Galili, naku Yudeya,

⁸ naku musumba wa Yelusalemu, naku chalo cha Idumeya, naku chalo chakwishilya lyamulonga wa Yodani, nakufifulo fimbi ifyali mumbali yamishi ya Tule na Sidoni. Mba bantu bayile kuli Yesu pakumfwa ifintu ifikulu ifyo achitile.

⁹ Yesu asoseshe abakusambila bakwe ukuti bamupekanishisheko ubwato ubwakumulindila, epali ibumba lyayisa kumufininkisha.

¹⁰ Nomba pamulandu wakuti aposeshe abantu abenji, echo bonse abali namalwele balimufininkishe ukuti bamukumye nokupola.

¹¹ Elo bonse abantu abali nemipashi iibi ulo balikumubona, balikuwa panshi nokwaula ati, “Niwe Mwana Lesa.”

¹² Yesu alibakonkobeshe ukwebati belokumufisululapo kubantu.

Yesu asala abakusambila ikumi na babili

¹³ Nakambi Yesu aninine mulupili nokwita abo afwayile umwine. Nabo balile uko ali.

¹⁴ Elo asalilepo abantu ikumi na babili nokubenika ati, “Batumwa.” Abebele ati, “Mwebo namusala ukuti tulokwenda nenu, nakambi nalikumutuma mukubilisha Ubutumi Bwawama.

¹⁵ Echo mwakukwata insambu shakufumya imipashi iibi mubantu.”

¹⁶ Abantu ikumi na babili abo Yesu asalile nimba, Simoni, (uwo Yesu ayinikile Petulo,)

¹⁷ na Yemusi, na Yohane bamwana Sebedi, (ebo ayinikile Boanegesi, ekweba ati, “Bali kubati ninkuba,”)

¹⁸ na Andileya, na Filipo, na Batolomeyo, na Mateyo, na Tomasi, na Yemusi mwana Alifeyo, na Tadiyasi, na Simoni uwakwipakisha mufyachalo,

¹⁹ na Yudasi Isikaliyoti, uwayembwile Yesu.

Yesu na Belesebule

²⁰ Yesu ayile kumwabo, elo ibumba ilikulu lyalilongene pamo, ilyalengele ukuti Yesu nabakusambila bakwe bafilwe nokulya.

²¹ Nomba ulo balupwa lwakwe baumfwile, balimine nokuya kumufumyako pakuti babebele ati, “Afunta.”

²² Abasambishi ba Mafunde abafumine ku Yelusalemu basosele ati, “Ali na Belesebule, mukulu wa mipashi iibi, eumupela ifiso ifyakufumya imipashi iibi.”

²³ Elo Yesu ayitile abantu nokubasosesha mufyelusho ati, “Kanshi Satana engeshiba ukufumya Satana?

²⁴ Kati ubufumu bukoyabanika apabwenka, tekuti bwimakanepo.

²⁵ Kati abamunanda imo abapusana abene benka, njilya nanda kuti yawa.

²⁶ Epo kati Satana akoyilwisha umwine nokwabanika, tekuti emakanepo iyowo, emupwilo wakwe.

²⁷ “Elo tapapo umuntu nangu umo uwingenjila munanda yamuntu uwafiso nokwiba ifintu fyakwe, sembi abala ukukaka umuntu ngulya wafiso. Elo engeba ifintu fyamunanda yakwe.

²⁸ “Nachine nkomweba ati, abantu bakoyisa kunakililwa amabifyo onse nemiponto yonse iyo bakoyisa kuponta kuli Lesa.

²⁹ Nomba uyo wonse uukoyisa kupontela Umupashi Wabuta, takwetepo ukunakililwa nakunshita shonse. Awamina ukuchushiwa ukwamuyayaya.” (

³⁰ Yesu asosele mfi pantu abantu bambi balikusosa ati, “Alikwete umupashi uubi.”)

Banyina na bawabo baku Yesu

³¹ Ulo bayishile banyina nabawakwe Yesu, bayimakene panse, bamutumine intumi ukumwita.

³² Kwali ibumba ilyayikele panshi nokumushinguluka. Elo bamwebele ati, “Banoko bawenu nenkashi shobe bali panse bakokufwaya.”

³³ Elo Yesu abasukile ati, “Nibani bama? Nibani bawesu?”

³⁴ Elo atandenye amenso pabantu bayikele panshi nokumushinguluka nokusosa ati, “Boneni mba ebama nabawesu!

³⁵ Pakuti onse uuchita ukufwaya kwaku Lesa, ewesu, enkashi, nabama.”