Maliko 2 - Chipangano Chabwangu

Yesu aposha umuntu uwauminina umubili

¹ Ulo papitile inshiku shinini, Yesu abwelele nakambi kumushi wa Kapenaumu, chaumfwikile ukuti alibwelele ali munanda.

² Elo mwalongene abantu abenji ukwinekantu, nakambi tamwalipo inchende nangu panini nangu nipamulyango. Yesu atatikile nokusambisha abantu Amashiwi yaku Lesa.

³ Ulo alikusambisha, kwayishile abantu bambi, baletele kuli Yesu uwauminina umubili uwatembelwe nabalalume bane.

⁴ Pakuti basangile ukuti ibumba lyalikulishe, bafililwe ukumufisha apali Yesu. Basukile batibwile ichipunda pamutenje wananda ukulungatana napabelele Yesu. Pachipunda nchilya epo bapushishe amachila apalele ngulya muntu.

⁵ Ulo Yesu abwene ukuchetekela kwabo, asosele uwauminina umubili ati, “We mwana wanji, amabifyo obe anakililwa.”

⁶ Nomba abasambishi ba Mafunde akwa Mosesi bambi apo bayikele balikulanguluka mumitima yabo ati,

⁷ “Nga nindo ngu muntu akososela mfi? Akopontela Lesa! Napo te Lesapo enka eunganakililapo amabifyo?”

⁸ Bwangu-bwangu, Yesu alishibile ifyo balikulanguluka mumitima yabo. Alibafumbile ati, “Nga nindo mukolangulukila mfi mumitima yenu?

⁹ Nichisa ichapepi ukweba uwauminina umubili ati, ‘Amabifyo obe anakililwa,’ nangula ukusosa ati, ‘Ima, ubule amachila obe wende?’

¹⁰ Ndemubwenesha ukwebati mushininkishe ati Umwana wa Muntu ali nensambu muchalo ukunakilila amabifyo!” Alyebele umuntu uwauminine umubili ngulya ati,

¹¹ “Ima, bula amachila obe, ulokuya kunanda yobe!”

¹² Nachine ngu muntu alimine, abulile amachila akwe, alifuminepo nokuya. Epo balishimbilwe bonse, batatikile nokuchinshika Lesa ati, “Tatwafibwenepo mfi fyonse nangu nikale iyowo!”

Yesu ayita Lefi

¹³ Ulo Yesu afuminepo, ayile nakambi kumbali yaku Bemba wa Galili. Ibumba lyabantu ilikulu lyayile kuli Yesu, naye atatikile ukubasambisha.

¹⁴ Ulo alikupita, abwene Lefi mwana Alifeyo, alikele pamulimo wakwe munanda yamusonko. Elo Yesu amwitile ati, “Nkonka.” Epo alimine nokumukonka.

¹⁵ Ulo Yesu ayikele pakulya munanda yakwa Lefi, bakasonkesha abenji, nembifi bayile mukulya pamo na Yesu nabakusambila bakwe pakuti abenji bali kumukonka.

¹⁶ Nomba ulo Abafalisi, abali abasambishi ba Mafunde, babwene ukuti Yesu akolya pamo nabo, bafumbile abakusambila bakwe ati, “Nga nindo Yesu akolila nokunwena pamo nabantu bali mfi?”

¹⁷ Ulo Yesu aumfwile, asosele nabo ati, “Abakosele tabafwayapo ing’anga iyowo, kuntu abalwele. Tanshayisapo mukwita abaololoka, sembi imbifi.”

Ifyakuyikanya ukulya

¹⁸ Nomba ulo abakusambila bakwa Yohane pamo na Bafalisi balikuyikanya ukulya, abantu bamo bayile kuli Yesu nokumufumba ati, “Nindo abakusambila ba Bafalisi nabakusambila bakwa Yohane bakoyikanya ukulya, nomba abakusambila benu tabakoyikanyapo ukulya?”

¹⁹ Yesu asosele nabo ati, “Napo abantu abayitwa kubwinga bangayikanya ukulya ulo nshibwinga ali pamo nabo? Iyowo! Inshita yonse bali pamo nanshibwinga, tekuti bayikanyepo ukulya.

²⁰ Inshita yakwisa ulo nshibwinga akupintwa pali bo, elo bakuyikanya ukulya muli nkalya kasuba.

²¹ “Takupo umuntu uubilila ichikamba chansalu yabwangu pelaya lyakale. Pantu ichikamba chabwangu kuti chatunkana nokulepula ilaya lyakale, elo nechipunda kuti chakulilako mwilaya.

²² Nakambi takupo umuntu nangu umo uwitulwila waini wabwangu mumatumba ampapa akale, pakuti nga achita mfi, waini kuti alepula amatumba, na waini kuti aswila panshi, amatumba nayo kuti aonayikila kumo. Echo abantu babikila waini wabwangu mumatumba abwangu.”

Yesu emwine we Sabata

²³ Pakasuba ke Sabata, Yesu akalangenye mumabala aku tiligu. Pakuya abakusambila bakwe batatikile ukukonaula imisonte yaku tiligu.

²⁴ Abafalisi basosele kuli Yesu ati, “Boneni! Nindo abakusambila benu bakochita ichitasuminishiwa Mumafunde pakasuba ke Sabata!”

²⁵ Elo Yesu abasukile ati, “Napo tamwapendapo ifyo Davide achitile ulo ali nensala pantu takwetepo ifilyo pamo nabo ali nabo?

²⁶ Ayinjile munanda yaku Lesa nokulya imifuba iyatulilwe kuli Lesa. Nchi chachitikile ulo Abiyata ali Chipupila Mukulu. Pakuti nibachipupila benka ebasuminishiwe ukulyako iyo mifuba, kuntu Davide alilile nakambi alipeleko nabo ali nabo pamo.”

²⁷ Nakambi Yesu asosele kuli bo ati, “Isabata lyapangilwe umuntu, temuntupo apangilwe Isabata iyowo.

²⁸ Pakuti Umwana wa Muntu Eshikulu nape Sabata.”