Maliko 16 - Chipangano Chabwangu

Yesu abuka kubafwa

¹ Ulo ubushiku bwe Sabata bwapitile, Maliya Magadala, Maliya banyina wakwa Yemusi, na Salome bashitile amafuta aabwema ubuweme ukwinekantu aakuti bayile mukusuba umubili waku Yesu.

² Nomba muluchelo-chelo, pakasuba kakwamba aka Mulungu, bayile kumanda. Pali njilya nshita akasuba nokutula kalitulile.

³ Bayile ulo bafumbana bati, “Nga kanshi ukoya kutufumishapo ichibwe pamulyango wamanda ninani?”

⁴ Nomba ulo baloleshe, babwene ichibwe chilikunkulukilepo, (nchi chibwe chali chikulu ukwinekantu.)

⁵ Penkapo bayinjile mumanda, babwene umulumbwana ekele kulubali lwaku mulyo, afwite nelaya ilitubile, nokupapuka balipapukile.

⁶ Umulumbwana ngulya alibebele ati, “Mwipapuka, ndishibile mukofwaya Yesu umwina Nasaleti, uwo basamikile. Alibukile, tamo muno. Boneni napo bamulalikile.

⁷ Nomba kamuya, mukabushe abakusambila bakwe pamo na Petulo, mwati, ‘Yesu alitanjile, ele ku Galili, eko mwakuya kubonana nakwe kubati ifyo amwebele!’”

⁸ Elo abanakashi bafumine mumanda, babutukile ulubilo, bakotutuma nokututuma, pantu chalibapeseshe amano. Elo tabashimikileko nomuntu nangu umo pantu bali nomwenso. [

Yesu aboneka kuli Maliya Magadala

⁹ Ulo Yesu abukile uluchelo-chelo pakasuba kakwamba aka Mulungu, abonekele pakubala kuli Maliya Magadala, uwo afumishemo imipashi iibi isano na ibili.

¹⁰ Naye ayile kushimikilako abalikwenda na Yesu, bo abayikele nechikonko nokulila.

¹¹ Nabo pakumfwa ukuti Yesu ali uwabumi, nokuti Maliya ye abonana nakwe, balikene ukusumina.

Yesu aboneka kubakusambila babili

¹² Panuma Yesu abonekele mumusango umbi kubakusambila bambi babili, ulo balikuya mumishi.

¹³ Nomba nabo balibwelelemo nokuya kushimikilako abanabo. Nangu babebele, abanabo balikene ukusumina.

Yesu abonekela kubakusambila ikumi na umo

¹⁴ Panuma Yesu abonekele kubakusambila bakwe ikumi na umo ulo bali pakulya. Alikubebaula pamulandu wakutasumina nokutomfwa kwabo. Pakuti tabasumine ifyo baebelwe kubabalilepo ukubona Yesu ulo abukile kubafwa.

¹⁵ Alibebele ati, “Kamuya mufyalo fyonse nokubilisha Ubutumi Bwawama kubantu bamitundu yonse.

¹⁶ Uwasumina nokubatishiwa akupuluka, kuntu uwakukana ukusumina, akoyisa kupingulwa nokuya mukuchushiwa.

¹⁷ Abachetekela bakwishibikwa nefishibilo mfi: balikutamfya imipashi iibi mwishina lyanji, balikusosa nemilaka iinji,

¹⁸ balikwikata nensoka, nakambi nga banwa umuli ubulembe tabwalokubachitapo nangu chimo iyowo. Bakubika amaboko pabalwele, nabo bakupola.”

Yesu apintwa kumulu

¹⁹ Ulo Bashikulu Yesu bashilile ukusosa nabo, balipintilwe kumulu mukwikala kukuboko kwamulyo ukwaku Lesa.

²⁰ Nomba abakusambila bakwe balifuminepo nokupalangana, bayile ulo bashimikila konse-konse, na Bashikulu balikupyunga pamo nabo, nokukosha amashiwi abo mufishibilo ifyo balikuchita.]