Maliko 15 - Chipangano Chabwangu

Yesu bamutwala kuli Pilato

¹ Ulo bwachele, intungulushi shabachipupila nabachilolo nabasambishi ba Mafunde, nabachilye bonse, balipangene amano. Bakakile Yesu nokumutwala kuli Pilato kateka wabena Loma.

² Pilato afumbile Yesu ati, “Napo webo niwe Mfumu ya Bayuda?” Yesu amwasukile ati, “Wasosa.”

³ Intungulushi shabachipupila balikusosela Yesu ifintu ifinji.

⁴ Pilato amufumbile nakambi ati, “Kanshi tekuti wasukepo nangu chimo? Bona ifintu bakokwebelela ubwinji!”

⁵ Nomba Yesu atalele chelele, asuka Pilato chamupesha namano.

Pilato apingwila Yesu ukufwa

⁶ Kali kafuto imyaka yonse pakulya Chakulya Chakuchilila, Pilato alikukakwilapo Abayuda umufungwa umo uwo abene balikufwaya.

⁷ Panshita yenka njilya, muchifungo mwalipo umuntu umo uwalikwitwa Balabasi pamo nabambi pamulandu wakwalukila ubuteko nokwipaya abantu.

⁸ Ibumba ilikulu ilyabantu lyayile kulongana kuli Pilato, kateka wabane Loma bamupapatile ati, “Utuchitile ifyo utuchitila lonse!”

⁹ Naye alibafumbile ati, “Napo mukofwaya mukakwile Imfumu ya Bayuda?”

¹⁰ Umulandu abafumbile mfi, nipakuti alishibile ukuti nipamulandu wamufimbila epo intungulushi shabachipupila shatwalile Yesu kuli ye.

¹¹ Intungulushi shabachipupila shatunkilishe abantu ukuti balombe Balabasi.

¹² Pilato afumba nakambi ati, “Nga kanshi nkochitapo shani nangu muntu mweba ati nimfumu ya Bayuda?”

¹³ Nabo babilikishe bati, “Musamikeni!”

¹⁴ Pilato afumbile ati, “Nomba mulandu ndo uwo achitile?” Elo nabo bachishamo ukusowela, “Musamikeni bwaka!”

¹⁵ Pakufwaya ukusekesha ibumba, Pilato abakakwile Balabasi, Yesu ye abebele ukuti bamupame ifikoti, elo abalubulwile ukuti baye bamusamike.

Abashilikali basekuluka Yesu

¹⁶ Abashilikali batwite Yesu mukati kalubansa lwakwisano ulwitwa Pulitoliyamu. Elo balongenye bonse abashilikali banabo.

¹⁷ Bafwikile Yesu umwinjila uuswetele, bapikwile neng’ana yaminga nokumufwika kumutwi.

¹⁸ Batatikile nokumupela umutende bakomusekuluka bati, “Mutendepo, we Mfumu ya Bayuda!”

¹⁹ Bakomupamaula netete pamutwi, nokumushipila amate. Balikufukama, bakomutotela.

²⁰ Ulo balekele ukumusekuluka, bamufulile ilaya iliswetele ndilya, bamufwikile amalaya akwe nakambi. Elo bamutwite mukumusamika pamutashi.

Basamika Yesu pamutashi

²¹ Munshila bakumenye umuntu umo, Simoni uwaku Sailini, wishi waku Alekisanda na Lufusi, alikufuma mumpanga. Eye bakakatishe ukupintilako Yesu umutashi.

²² Elo batwite Yesu kuchifulo ichitwa Gologota, “Ekweba ati Ichifulo Chefupa Lyamutwi.”

²³ Bamupele waini uyo basankenye nomuti wakunasha ukufinya. Yesu alikene ukunwa.

²⁴ Nomba balimusamikile. Bachitile bumwine-mano pakwakana amalaya akwe pakuti beshibe icho umo-umo engabulapo.

²⁵ Ulo basamikile Yesu inshita yali ni 9 koloko waluchelo.

²⁶ Umulandu uyo bamwipayilepo baulembele pamulu wamutashi ukuti, “Imfumu ya Bayuda.”

²⁷ Basamikilepo notupondo tubili pamo na Yesu, kamo kumulyo, kambi nako kuchipiko. [

²⁸ Ekufikilisha ifyalembwa mu Mashiwi aku Lesa ukuti, “Apendelwe pamo nefipondo.”]

²⁹ Abalikupitapo balikupukumya imitwi nokumusalula ati, “Eya, wasangwapo lelo! Te we walikutwanga wati, kuti watobaula inanda yaku Lesa, nokwimaka munshiku shitatu?

³⁰ Ipulushe wenka, wike pamutashi!”

³¹ Intungulushi shabachipupila nabasambishi ba Mafunde balikumusekuluka, bakososhanya bati, “Alikupulusha bambi, nomba chamukanga ukuyipulusha enka!

³² Lekeni Klistu imfumu yabena Isilaeli yike pamutashi, tubweneshe, pakuti tumuchetekele!” Elo nabo abasamikilwe nakwe, nabo balikumwebawila kumo.

Imfwa yaku Yesu

³³ Nomba ulo akasuba kafikile pa 12 koloko, imfinshi yafimbile ichalo chonse ukufika panshita ya 3 koloko wachungulo.

³⁴ Pa 3 koloko penka Yesu alyawile neshiwi ilikulu ati, “Eloi, Eloi, lama sabakatani?” Ekweba ati, “Lesa wanji, Lesa wanji, nindo mwandekelesha?”

³⁵ Abantu bambi abayimakaninepo pakumfwa, basosele ati, “Umfweni akoyita Eliya!”

³⁶ Umbi alibutukile nokupinta umwepu, autumpikile muli waini uwasasa, elo atungile nakwitete. Ulo amutambikile Yesu ukuti anwe, asosele ati, “Lekeni tubone kati Eliya akoyisa kumupulusha!”

³⁷ Ulo alilile neshiwi ilikulu, Yesu alifwile.

³⁸ Penkapo nechansalu icho balikuchinga munanda yaku Lesa chalyabakene pakati ukufuma pamulu ukufika napanshi.

³⁹ Umukulu wabashilikali, uwayimakene apalungatene na Yesu ulo abwene inshila Yesu afwililemo, asosele ati, “Nachine ngu muntu aali Mwana waku Lesa!”

⁴⁰ Kwalipo nabanakashi bambi abalikutamba akatalamukila, umo ni Maliya Magadala, Salome, Maliya banyina wakwa Yemusi mwayiche, na Yose.

⁴¹ Mba banakashi, ulo Yesu ali mu Galili, balikumukonka nokumupyungila. Elo kwali nabanakashi abenji abayile nakwe ku Yelusalemu.

Ukushikwa kwaku Yesu

⁴² Nomba kwatile ukuba ichungulo, pakuba kali kasuba kakuyiwamisha pakwishiba ukuti mayilo li Sabata. Kwayishile Yosefe waku Alimateya, uwamuchilye uwachinshikwa ukwinekantu. Kali ekasuba kakuwamya ifye Sabata.

⁴³ Yosefe ayile ukwambula umwenso ukwinjila kwa Pilato, kateka wabena Loma ukuya mukulomba ichitumbi chaku Yesu. Ngu Yosefe naye alikulindilila ukwisa kwa Bufumu bwaku Lesa.

⁴⁴ Pilato alishimbilwe pakumfwa ukuti Yesu afwile kale. Ayitile umukulu wabashilikali nokumufumba ati, “Napo kale afwile?”

⁴⁵ Ulo aumfwile ati alifwile, alisuminishe ukupela ichitumbi chaku Yesu kuli Yosefe.

⁴⁶ Nomba Yosefe ashitile insalu yambafuta. Ulo asamwine Yesu pamutashi, amupombele munsalu, elo ayile kumulalika namumanda iyo bafukwile mwibwe. Elo apilibwiilepo nebwe ilikulu pamulyango wamanda.

⁴⁷ Maliya Magadala na Maliya banyina wakwa Yose, balibwene umo bashikile Yesu.