Maliko 14 - Chipangano Chabwangu

Bapinga ukwipaya Yesu

¹ Kwashele bwaka inshiku shibili kunshiku-nkulu ya Chakulya Chakuchilila nakunshiku-nkulu iyakulyamo Imifuba Iitatutumuka. Intungulushi shabachipupila nabasambishi ba Mafunde akwa Mosesi balikufwayilisha inshila yakwikatilamo Yesu mubumfinshi ukwebati bamwipaye.

² Balikusosa ati, “Iyowo, panshiku ya Chakulya Chakuchilila tepopo, pantu kuti mwayisa kuba ichimfulunganya mubantu.”

Yesu bamusuba amafuta ku Betani

³ Yesu ali mumushi wa Betani munanda yakwa Simoni uwapolele kufyona. Ulo ali pakulya, kwayishile umwanakashi umo uwapintile umusashi wamafuta aabwema ubuweme nakambi aamutengo ukulu ukwinekantu alikwitwa naladi. Ayiswile umusashi, ayitulwila namafuta pamutwi waku Yesu.

⁴ Nomba bambi abalimo bakalipile nokusosa ati, “Mulandu ndo akowonawilwa mfi amafuta nga?

⁵ Nga twaya kushitishamo indalama ishinji ishakuchila napa myanda itatu, nesho ndalama kuti bapela abachula!” Baliyilishenye ukwinekantu pali ngu mwanakashi.

⁶ Elo Yesu asosele ati, “Mulekeni! Chindo icho mukomusakamikila? Umulimo ngu uwo ampyungila uuweme ukwinekantu.

⁷ Abachula mwali kuli nabo lonse, ulo mukofwaya ukubachitilapo chimo ichawama, kuti mwabachitila. Nomba nebo tanshakabepo namwe inshita shonse iyowo.

⁸ Ngu mwanakashi apyunga ukulingana napapelele ifiso fyakwe, umubili wanji ausubila kabela ukuupekanishisha ukushikwa.

⁹ Nachine nkomweba ati, konse uko pano chalo balikubilisha Ubutumi Bwawama, balikusosa ifichitile ngu mwanakashi pakumwibukisha.”

Yuda bapangana nabalwani baku Yesu

¹⁰ Nomba Yuda Isikaliyoti, uwa pabakusambila ikumi na babili, ayile kuntungulushi shabachipupila ukuya mukwembula Yesu.

¹¹ Nabo pakumfwa, balitemenwe ukwinekantu, bamulaya nokumulipila indalama. Yuda nomba alikufwayilisha inshila nenshita iingalinga ukwembwilapo Yesu.

Yesu nabakusambila bakwe balya umulalilo wa Mpasha

¹² Mukasuba kakubalilapo akakulyamo Chakulya Chakuchilila, ekasuba Abayuda balikwipayamo umwana wa mbelele ukuba ichipupo chapa chakulya nchi, abakusambila bafumbile Yesu ati, “Kanshi nikwisa uko mukofwaya ukuti tumuwamishishe Chakulya Chakuchilila?”

¹³ Yesu atuminepo abakusambila bakwe babili, nokubeba ati, “Kamuya mumusumba, emo mukoya kukumanya umwalalume uupintile umutondo wamenshi. Mumukonke kunanda uko akoya kwinjila.

¹⁴ Elo mwebe umwine wananda mwati, Umusambishi akofumba ati, ‘Mba chilikwi chipinda chabalwendo icho nebo nabakusambila banji twakulilamo Chakulya Chakuchilila?’

¹⁵ Naye akoya kumulanga ichipinda ichikulu ichapamulu ichayanshikwa icho bapekenye, mwenkomo emo mukatuwamishishe.”

¹⁶ Abakusambila balile mumusumba nokusanga ifintu fyonse fili bwaka mwenka umo umwine Yesu asosele nabo, bapekenye ne Chakulya Chakuchilila.

¹⁷ Ati kube ichungulo, Yesu nabakusambila ikumi na babili bayile kuli njilya nanda.

¹⁸ Ulo bali pakulya Yesu asosele ati, “Nkomweba ati, mwebo nkolya nenu, umunenu umo akonyembula.”

¹⁹ Nabo pakuti babele nechikonko, balikufumba Yesu umo-umo ati, “Napo ninebo?”

²⁰ Yesu abasukile ati, “Uukonyembula munenu umo uwabekumi na babili uwo nkotobela nakwe pamo mumbale imo yenka.

²¹ Ina, Umwana wa Muntu akoya mukufwa nga mfilya chalembwa mu Mashiwi aku Lesa pali Ye. Nomba ishamo kumuntu uyo uukomwembula Mwana wa Muntu! Nga chaliweme kuli ye ukutafyalwapo!”

Umulalilo waku Bashikulu

²² Ulo bali pakulya, Yesu abulile umufuba, atotele kuli Lesa, ausunawile nokupela abakusambila bakwe ati, “Buleni, mulye pakuti ngu mubili wanji.”

²³ Nakambi abulile ulukombo, atotele kuli Lesa nokupela, bonse banwamo.

²⁴ Elo abebele ati, “Ngu mulopa wanji uwachipangano uwayitililwa pamulandu wabenji.

²⁵ Nachine nkomweba ati, tanshakanwepo nakambi amenshi afitwalo fya mpesha kufikila pakasuba ako nkanwamo amenshi aafitwalo fyampesha shabwangu mu Bufumu bwaku Lesa.”

²⁶ Ulo bayimbile ulwimbo, balifuminemo nokuya ku Lupili lwa Maolife.

Yesu asosa ifyakukanwa na Petulo

²⁷ Yesu asosele kuli bo ati, “Mwe bonse mukombutuka bwenka mbuno bushiku. Pakuba chalilembwa mu Mashiwi aku Lesa ati, ‘Nakwipaya chembela, nembelele shakupalangana.’

²⁸ Nomba ulo nakubuka kubafwa, nakumutanjilila ku Galili.”

²⁹ Petulo ayasukile Yesu ati, “Nangu bambi bakubutuka, kuntu nebo iyowo!”

³⁰ Elo Yesu amwebele ati, “Muli mbuno bushiku bwenka, ulo tambala atalalila imiku ibili, ukonkana imiku itatu.”

³¹ Nomba Petulo ayasukile nomushika ati, “Nebo, nangu kati kufwa, nkofwa nawe. Tekuti nkukanepo iyowo!” Nabakusambila bambi nabo basosele fimo fyenka.

Yesu alomba kuli Wishi mu Getesemani

³² Yesu nabakusambila bakwe bayile kuchifulo ichitwa Getesemani. Elo Yesu asosele kubakusambila bakwe ati, “Taleni mwikale mpano panshita nkolomba.”

³³ Nomba abulilepo Petulo, Yemusi na Yohane, aya nabo. Elo atatikile ukulilishika nokusakamikwa ukwinekantu.

³⁴ Nakambi abebele ati, “Umutima wanji uli nechikonko ukwinekantu nichikanga bwaka nokufwa. Ikaleni mpano, mulokulinda.”

³⁵ Ulo Yesu aendeleko panini akatalamukila, awile panshi, akopapata ukuti nji nshita ipitile ukutali kati kuti chalinga.

³⁶ Asosele ati, “Aba, Bata wanji ee, mwebo ifintu fyonse kuti mwafichita, mpokololeniko kulukombo ndu ulwabuchushi. Nomba ifyo nebo nkofwaya tefyopo, kuntu ukufwaya kwenu kuchitike.”

³⁷ Elo Yesu abwelele kubakusambila bakwe mbalya batatu, ayisa kubasanga balimutulo, epakweba Petulo ati, “Simoni, ulilele, bati? Kanshi wafilwa ukulola pakanshita kanini bwaka?

³⁸ Mulokulola nokulomba pakuti mwiwila mukweshewa. Umutima ukofwaya, kuntu umubili uli uwanaka.”

³⁹ Nakambi Yesu afumapo, aya mukulomba, nokusosa amashiwi amo enka.

⁴⁰ Elo abwelele nakambi nokusanga bali mutulo, pakuba amenso abo alilemene kutulo. Balubile nechakumwasuka.

⁴¹ Ulo abwelele umuku wachitatu, abebele ati, “Napo nanomba muchili mutulo nokutusha, bati? Chapwa! Inshita yafika! Boneni Umwana wa Muntu akoposwa muminwe yabantu babipa.

⁴² Imeni tulokuya. Boneni uwakunyembula ngu ayisa!”

Bayikata Yesu

⁴³ Lwenka ndulya ulo Yesu alikusosa, Yuda umo uwabakusambila bakwe ikumi na babili, alifikile. Ali nebumba ilikulu ilyabantu abali nemyele nenkoli. Batuminwe nentungulushi shabachipupila nabasambishi ba Mafunde akwa Mosesi nabachilolo.

⁴⁴ Uwakwembula Yesu alibapele kale ichishibilo ati, “Uyo nkoya kufyomfyonta, eye enka. Mumwikate, mumutwale nokumusunga bwino.”

⁴⁵ Ulo Yuda afikile, bwangu-bwangu alungeme kuli Yesu amufyomfyonta nokuti, “We musambishi!”

⁴⁶ Penkapo bafukukile pali Yesu nokumwikata.

⁴⁷ Nomba umo wabantu abayimakene pamo na Yesu asolomwene umwele wakwe nokukwempula ukutwi kwamupyungi wakwa chipupila mukulu.

⁴⁸ Yesu alibafumbile ati, “Napo nebo ndi chipondo, apo mwayisa nemyele nenkoli mukunjikata, bayi?

⁴⁹ Inshiku shonse nalikwikala namwebo nkosambisha munanda yaku Lesa, nokuti munjikatepo, yii. Chiweme, ekuti ifyalembekwa mu Mashiwi aku Lesa fifikilishiwe.”

⁵⁰ Elo abakusambila bonse bashile Yesu, babutuka nolubilo.

⁵¹ Umulumbwana umo uwafwele insalu yambafuta, alikukonka Yesu. Naye abantu balimwikete,

⁵² kuntu alibasopokele, asha nensalu muminwe yabo, abutuka ubwamba.

Yesu munsaka yamilandu

⁵³ Batwite Yesu kuli chipupila mukulu, uko intungulushi shabachipupila nabachilolo nabasambishi ba Mafunde balongene bonse.

⁵⁴ Petulo alikukonka Yesu akatalamukila, nokufika nakwisano lyakwa chipupila mukulu. Alinjile nokwikala apayikele abashilikali, akoonta nomulilo.

⁵⁵ Intungulushi shabachipupila nabachilye bonse balikufwayilisha bukamboni ubwakuti bapingwilepo Yesu ukufwa, kuntu balifililwe.

⁵⁶ Pali abantu abenji abali kumushinina bukamboni bwabufi, nomba bukamboni bwabo bwalikupusana.

⁵⁷ Bambi nabo balikwimakene bakobepesha Yesu imilandu iyabufi bati,

⁵⁸ “Fwebo twalyumfwile ngu muntu alikusosa ukuti, ‘Nebo nkoyisa kutobaula nji nanda yaku Lesa iyayimakwa namaboko abantu, kuntu panshiku shitatu nakwimakapo imbi iitayimakwapo namaboko abantu.’”

⁵⁹ Nomba napali ngu mulandu, bukamboni bwabo bwalipusene.

⁶⁰ Umukulu waku bachipupila bakulu ayimakene mulwalala lwachilye nokufumba Yesu ati, “Kanshi taukoyasukapo nangu kamo pali nji milandu iyo abantu bakokwebelela?”

⁶¹ Yesu ali chelele, nokwasuka, yii. Umukulu waku bachipupila nakambi afumba ati, “Napo webo niwe Klistu Umwana waku Lesa uwachinshikwa?”

⁶² Yesu amwasukile ati, “Ina, nine, nakambi mwakubona Umwana wa Muntu ekele kukuboko kwamulyo ukwaku Lesa umwine wafiso fyonse, mwakubona uko akwisa mumakumbi amumulu!”

⁶³ Penkapo chipupila mukulu alepawile insalu shakwe nokuti, “Mulandu ndo tukofwayila nabakamboni bambi?

⁶⁴ Nomba mwayumfwila mwebene umusalula! Mukotipo shani mwebo?” Bonse balyasukile chapamo bati, “Alingile bwaka ukuti afwe.”

⁶⁵ Bambi abantu batatikile ukushipila Yesu amate, ukumufimba pamenso, ukumututaula ifimfunshi nokuti, “Ishiba, utubushe uwakupama!” Abashilikali nabo balikumupama bubi-bubi.

Petulo akana Yesu

⁶⁶ Pali nji nshita Petulo ayikele panshi muchipango. Nomba kwayishilepo umwanansungu umo umupyungi waku chipupila mukulu.

⁶⁷ Abwene Petulo akoonta umulilo, amulolesesha nokumweba ati, “Nawebo kumo wali pamo na Yesu waku Nasaleti.”

⁶⁸ Petulo alikene ati, “Nebo, nshishibilepo icho ukososa webo, nokumfwa uko chilolele.” Ulo Petulo alikufumina panse mulukolo, penkapo tambala alililile nokulila.

⁶⁹ Umwanansungu ngulya umupyungi, ulo abwene Petulo nakambi atatikile ukubusha abayikelepo ati, “Ngu muntu ewabamo aba muli Yesu!”

⁷⁰ Nampa napo Petulo alikene. Ulo papitile akanshita, abayimakenepo baebele Petulo ati, “Ukuba nachine nawebo kumo uli munabo pantu nawe uli mwina Galili.”

⁷¹ Nomba Petulo atatikile ukuyilapisha ati, “Nalapa, Lesa antobaule. Nebo uyo muntu mukolumbula tanshimwishibilepo nangu panini!”

⁷² Tambala alililile nenshita iyakulenga shibili. Elo Petulo ayibukishe ifyo Yesu asosele ati, “Ulo tambala atalalila imiku ibili, akunkana imiku itatu.” Elo Petulo afumine panse nokulila ukwinekantu.