Maliko 13 - Chipangano Chabwangu

Yesu afisulula ukonayika kwananda yaku Lesa

¹ Ulo Yesu alikufuma munanda yaku Lesa, uwakusambila wakwe umo amwebele ati, “We Musambishi, boneni mfi ifyamabwe ubukulu, nefya mananda nafyo!”

² Yesu amwebele ati, “Napo ni mfi ifyamananda fikulu efyo ukotamba? Ala tapakashalepo ibwe nangu limo pamulu walinakwe, onse nga akubungumuka.”

Kwakwisa kuba ubwafya namachushi

³ Ulo Yesu ayikele palupili lwa Maolife umulungatanya nenanda yaku Lesa, Petulo, Yemusi, Yohane na Andileya balikumufumba kumbali bati, “Twebeko, kanshi mfi fintu nilwisa fyakwisa kubako?

⁴ Elo chindo icho twakwishibilako ukuti mfi fintu fyonse fyakuchitika?”

⁵ Nomba Yesu abasukile ati, “Chenjeleni ukuti umuntu nangu umo ekamubepapo.

⁶ Pakuba abenji bakwisa nokuyishimbula ati, ‘Nine Klistu,’ elo bakubepa balikubepa abantu abenji.

⁷ Elo ulo mwalikumfwa inkondo nomukunkunto wankondo, mwilokusakamikwapo iyowo. Mfi fintu fili nokwisa kuchitika, kuntu ukushila kwachalo takulayisa.

⁸ Pantu umutundu umo wakwimina umutundu unakwe, kabili nobumfumu bwakulwisha ubumfumu bunakwe. Kwakwisa kuba finkukuma konse-konse, kabili kwalikuba nensala. Mfi fyonse fyakuba ekutatika kwamachushi.

⁹ “Echo mwebo muchenjele. Pakuba balikumutwala mufilye, nakambi balikumupamina ifikoti mukati kamananda akulombelamo Lesa. Balikumulubulwisha kuli bakateka nakuli bashamfumu pamulandu wanji, pakuti mwakuba bakamboni banji kuli bo.

¹⁰ Ulo umupwilo taulayisa, Ubutumi Bwawama bwakubala bushimikilwe kumitundu yonse.

¹¹ Ulo balikumwikata nokumutwala mukumulubulwisha, mwilokusakamanapo ifyakuya mukusosa. Mwakuya mukusosa bwaka ifyo mwalangililwa panshita yenka njilya, pantu te mwebopo mwalikusosa iyowo, kuntu Mupashi Wabuta ewalikusosa.

¹² Wabo alikwipayisha wabo, wishi naye alikwipayisha umwana, nabana nabo balikwalukila abafyashi babo nokubepayisha.

¹³ Ukuba abantu bonse bakumupata pamulandu wakuti muli bantu banji. Nomba uyo uwakushipikisha ukufikila kumupwilo, ewakupuluka.

Ichabunani nakambi ichabonaushi chikoyisa

¹⁴ “Ulo mwakubona ichabunani nakambi ichabonaushi chilimakene apo chitalingile ukwimakana (uukopenda eluke umo chilolele). Nomba abamu Yudeya bakabutukile kumpili.

¹⁵ Uuwali kuli pamutenje wananda yakwe, eyikapo ukuya kubula ifili munanda yakwe.

¹⁶ Uuwakuba mwibala lyakwe, ekabwelapo kunanda mukubula ilaya lyakwe.

¹⁷ We shamo we kubanakashi abali kwimitile nakubali konsha muli nshilya nshiku!

¹⁸ Mulokulomba Lesa ukuti mfi fintu fiyisa kuchitika panshita yampepo!

¹⁹ Pantu panshita njilya kwakuba amachushi aakulu ukwinekantu atabonekapo ukufuma apo Lesa atalile ichalo ukufika nanduno. Elo takwakabepo amachushi ayakuba nga aya.

²⁰ Epo nga chakuti Shikulu tayipifisheko inshiku nshilya, nga tapapulukilepo umuntu nangu umo iyowo. Nomba pamulandu wabantu bakwe abasalwa, alipifyako isho nshiku.

²¹ “Munshiku nshilya umuntu kati akumweba ati, ‘Boneni, Klistu ngu!’ Nangula, ‘Ngulya,’ tekwesha ukusumina iyowo.

²² Pantu ba Klistu nabasoseshi ababufi bakwima, balikuchita ifyafiso ifikulu nefyakushimbwisha, ichakweba ati babepayike nabasalwa kumo nga chingachitika.

²³ Nomba mwebo muchenjele. Namwebela kabela ulo ifuntu fyonse mfi afitalachitika.

Ukwisa kwa Mwana wa Muntu

²⁴ “Nomba muli nshilya nshiku ulo mbulya buchushi bwakupita, akasuba kakufita fititi, umwenshi nawo wakuleka ukusanika,

²⁵ nakambi intandala shakupona kumulu, nefiso fyamumulu fyakutenkana.

²⁶ Elo bakubona Umwana wa Muntu akoyisa mumakumbi ali nefiso, elo nobuleme ubukulu.

²⁷ Akutuma abangelo bakwe mukulonganya abasalwa bakwe, ukufuma konse kutupinda tune utwachalo, ukutatikila uko ichalo chapela, ukufikila nakumpelo kunakwe.

Isambililo lyachiti chamukunyu

²⁸ “Sambilileni kuchiti chamukunyu. Ulo mubona amabula atatika ukusoka ulutundwa muleshiba ukuti amayinsa apalama.

²⁹ Munshila imo yenka, ulo mwakubona mfi fintu fikochitika, mwakwishiba ukuti Klistu ali apepi, ali bwaka pamulyango.

³⁰ Nachine nkomweba ati, abantu banjino nkulo pakufwa sembi mfi fintu fyonse fikabale fikachitike.

³¹ Umulu nechalo fyakupita, kuntu amashiwi anji akubelelela umuyayaya.

Ubushiku nenshita yakwisa kwaku Yesu tafyayishibikwapo

³² “Ulo nkalya kasuba kakufika, tapapo umuntu uwayishiba, nangu bangelo bakumulu nangu Mwana iyowo, sembi Bawishi benka.

³³ Mulokuchenjela, mulokwibukila nokulomba pantu tamwishibilepo apo njilya nshita ulo yakufikila.

³⁴ Chaba kubati umuntu ulo talayima nokusha inanda yakwe pakuya mufyalo, kubala asha alanga abapyungi bakwe umo-umo umulimo wakwe, nokweba malonda ukulinda.

³⁵ Kanshi, mulokulindila pantu tamwishibilepo ulo umwine wananda akubwela. Nalimo kuti abwela kuchungulo, nalimo pakati kabushiku, nalimo nipali tambala mutanshi, nalimo kumacha.

³⁶ Kamulindila ukwebati kati akwisa ichakumupuminkisha, ekamusanga muli mutulo.

³⁷ Icho nkososa kuli mwebo, nkoeba onse umuntu nati, lindilileni!”