Maliko 11 - Chipangano Chabwangu

Yesu ayinjila mu Yelusalemu nomuchinshi

¹ Ulo bapalamine ku Yelusalemu, apepi napamushi wa Betefage na Betani, bafikile kulupili lwa Maolife. Yesu atumine abakusambila bakwe babili

² nokubeba ati, “Kamuya kumushi uuli kuntanshi yenu. Ulo mukoya kwinjilamo, bwangu-bwangu mukoya kusanga umwana punda alikakilwe, uwo umuntu taninapo iyowo. Mukakuleni nokundetela nkuno.

³ Kati umuntu akumufumba ati, ‘Mba nindo mukokakwila mwana punda?’ Musose mwati, ‘Ni Bashikulu bakomufwaya, nokubwesha bakomubwesha bwangu-bwangu.’”

⁴ Epo balile kumushi nokusanga umwana punda balimukakile pamulyango panse uwalungatana nomusebo. Ulo balikumukakula,

⁵ bambi abayimakenepo balifumbile ati, “Chindo icho mukokakwila umwana punda?”

⁶ Nabo bayasukile mwenka umo Yesu abebele. Na bantu balibalekele baya nokuya.

⁷ Ulo batwite umwana punda kuli Yesu, bayanshikilepo insalu shabo pamusana waku punda. Elo Yesu anininepo nokunina.

⁸ Abantu abenji bayanshikile insalu shabo mumusebo, bambi nabo balikukonaula imisambo yafiti mumpanga, bakoyanshika mumusebo.

⁹ Abatanjile pantanshi nabali kukonka panuma, balikwaula bati, “Tondayisheni Lesa Mukulu! Lesa ashukishe ngu uwayisa mwishina lyaku Bashikulu!

¹⁰ Lesa ashukishe ubufumu ubukoyisa ubwakwa nshifwe Davide! Tondayisheni Lesa Mukulu!”

¹¹ Yesu ayinjile mu Yelusalemu nokuya munanda yaku Lesa, aloleshe konse-konse nokubona ifyalimo. Pakuba akasuba kali apepi nokuwa, alifuminemo, ayile nabakusambila bakwe ikumi na babili kumushi wa Betaniya.

Yesu alapisha ichiti chamukunyu

¹² Uluchelo ulo balikubwela ku Betani, Yesu yalimwikete insala.

¹³ Ulo abwene umukunyu patali-patali uli namabula aaweme, eko ayile mukubona kati walitwala ifitwalo. Pakufika nkulya, asangileko bwaka amabula enka-enka, pakuba tayalipo enshita amakunyu atwalilapo.

¹⁴ Nomba Yesu alapishe umukunyu ati, “Takwakabepo nangu umo umuntu uwakulyako ifitwalo kuli we!” Nabakusambila bakwe nabo balyumfwileko.

Yesu aya munanda yakulombelamo Lesa

¹⁵ Ulo bafikile mu Yelusalemu, Yesu ayinjile munanda yaku Lesa. Atatikile ukutamfisha panse abalikushitishamo ifintu. Nokupenaula namatebulu abantu abali kukabushanya indalama, nefipuna fyaku bo abali kushitisha inkunda.

¹⁶ Tasuminishepo nabantu bonse abali kupinta ifintu nokupitana munanda yaku Lesa.

¹⁷ Elo alikusambisha abantu ati, “Kanshi tachalembwa mu Mashiwi aku Lesa ukuti, ‘Inanda yanji yakwitwa ukuti ninanda yakulombelamo abantu bonse.’ Nomba mwe eyo mwasangula uluchengo lwabang’o!”

¹⁸ Ulo intungulushi shabachipupila nabasambishi ba Mafunde baumfwile, balikufwayilisha inshila yakumwipayilamo Yesu. Nomba balikutina, pantu abantu bonse balishimbilwe pakusambisha kwakwe.

¹⁹ Ati bwile ubushiku, Yesu nabakusambila bakwe balifuminemo mumusumba.

Isambililo lyachiti chamukunyu

²⁰ Muluchelo-chelo ulo balikuya munshila, babwene ngulya mukunyu ulyumine ukufika nakumishu.

²¹ Petulo alibukishe ifyachitikilwe, elo aebele Yesu ati, “We musambishi, bona ngulya mukunyu walapishe ulyumine!”

²² Yesu abasukile ati, “Mulokuchetekela muli Lesa.

²³ Nachine nkomweba ati, umuntu nga aeba ndu lupili ati, ‘Fuma mpa, uye uyipose muli bemba,’ ukwambula ukukayika mumutima wakwe, kuntu akosumina ukuti icho akososa chikochitika, chili nokuchitika.

²⁴ Kanshi pali nchi nkomweba ati chonse icho mwakufumba mukulomba kwenu, sumineni ukuti mwapelwa. Nachine mwakupelwa.

²⁵ Elo lonse ulo mukolomba kati mulipo nomulandu umo uubi nomuntu umbi, munakilileni pakuti Bawishinwe bakumulu nabo bengamunakilila amabifyo enu. [

²⁶ Nomba mwebo nga tamukonakililapo amabifyo, namwe Bawishinwe bakumulu nabo tabakamunakililepo amabifyo enu.]”

Ubuleme bwaku Yesu uko bwafuma

²⁷ Balibwelele nakambi ku Yelusalemu. Nomba ulo Yesu alikwendauka munanda yaku Lesa, intungulushi shabachipupila nabasambishi ba Mafunde pamo nabakulu Babayuda, bayile kuli Yesu nokumufumba ati,

²⁸ “Ninsambu ndo uchitilamo mfi fintu? Mba uwakupela nshi nsambu ninani?”

²⁹ Elo Yesu abasukile ati, “Nandibo nkomufumbapo chimo bwaka, namwe nga mwangasuka, elo nandibo nkomwebako ukwafuma nshi nsambu nchitilamo mfi fintu.

³⁰ Napo ulubatisho lwakwa Yohane nikuli Lesa lwafumine nangula nikubantu? Ngasukeni tumfwe.”

³¹ Batatikile ukutalikishanya bati, “Nga twaeba ati, ‘Lwafumine kuli Lesa,’ Yesu akutweba ati, ‘Mba nindo mutachetekele Yohane?’

³² Elo atwaeba ati, ‘Lwafumine kubantu.’” (Baletina pantu abantu bonse balishininkishe ukweba ati Yohane ali musoseshi uwachine.)

³³ Echo bayasukile Yesu ati, “Tatwishibilepo.” Elo Yesu naye asosele ati, “Kanshi nandibo nshamubushepo ukwafuma insambu nshi nchitilamo mfi fintu.”