Maliko 10 - Chipangano Chabwangu

Umulandu wakubengana mufyupo

¹ Ulo Yesu afuminepo, ayile muchalo chaku Yudeya, ayabukile Yodani. Nakambi amabumba abantu ayishile kuli Ye, alikubasambisha ukubati fintu alikuchita inshiku shonse.

² Bambi abamu Bafalisi bayile kuli Yesu nokumwesha bati, “Twebeniko, napo ifunde lyesu lilasuminisha umwalalume ukubenga umukashi wakwe?”

³ Yesu alibasukile ati, “Lifunde ndo ilyo Mosesi amupele?”

⁴ Bayasukile ati, “Mosesi alisuminishe umwalalume ukulemba kalata wakubenganinapo nokupela umukashi wakwe ukuti alokuya.”

⁵ Yesu alibasukile ati, “Mosesi alimulembele ndi funde pakuba mwaba abakutomfwa.

⁶ Nomba pakubala, ulo ichalo chatalilwe, chalisoswa ukuti, ‘Lesa abumbile umwanakashi nomwalalume.

⁷ Pamulandu ngu, umwalalume akusha bawishi nabanyina nokuyilundanya kumukashi wakwe.

⁸ Echo mba babili bakuba umubili umo.’ Nomba tabalipo babili iyowo, kuntu bali umo bwaka.

⁹ Echo icho Lesa alunda, umuntu elundululapo.”

¹⁰ Ulo babwelele munanda, abakusambila balifumbile Yesu pali ngu mulandu.

¹¹ Elo Ye asosele kuli bo ati, “Umuntu nga abenga umukashi wakwe nokupa umbi, epela achita ubuchende.

¹² Munshila imo yenka, umwanakashi naye nga abengwa kumwalalume wakwe nokupwa kuli umbi, naye wachita ubuchende.”

Yesu ashukisha abana banini

¹³ Abantu bambi baletele abana banini kuli Yesu ukuti abike amaboko akwe pali bo nokubashukisha. Nomba abakusambila bakwe ulo bababwene, balibakalipile.

¹⁴ Ulo Yesu abwene mfi, alikalipile nokuti kubakusambila bakwe, “Lekeni abana banini bese kuli nebo, mwibakanyapo, pakuti Ubufumu bwakumulu bwaku bo abali nga mba.

¹⁵ Nachine nkomweba ati, uyo onse uutapokelapo Ubufumu bwaku Lesa ukubati akana, tayise kwinjilamo.”

¹⁶ Elo Yesu abulile abana nokubafukata mumaboko akwe nokubashukisha.

Umuntu umusambashi

¹⁷ Ulo Yesu alikuya, umwalalume umo alimubutukile, ayile kufukama pantanshi yakwe, nokumufumba ati, “We musambishi uuweme, chindo ningachitapo ukuti nkapoke ubumi butapwa?”

¹⁸ Yesu alimwasukile ati, “Mba nindo wanjitila nebo uuweme? Takupo uuweme, sembi Lesa enka.

¹⁹ Walishiba amafunde aku Lesa asosa ati, ‘Wilokwipaya, wilokuchitapo buchende, wilokwiba, wilokubepeshapo umunobe, wilokuchenjelekapo abantu, chinshika bawiso nabanoko.’”

²⁰ Walyasukile ati, “We musambishi, nga mafunde onse naliyalama ukufuma kubwayiche bwanji.”

²¹ Yesu alimulolekeshe nokutemwa nokuti, “Ichikofwayikwa chimo. Koya ukashitishe ifintu fyonse ifyo wakwata. Indalama wakusangamo, ushipele kubachula, elo wakwisa kuba nobuboni kumulu, elo wise unkonke.”

²² Ulo aumfwile nga mashiwi, ichinso chakwe chalifitilwe, epo ayile nechikonko pantu ali nobuboni ubwinji ukwinekantu.

²³ Yesu aloleshe pabakusambila bakwe nokuti kuli bo, “Mwandi chaliba ichakosa kubantu ababuboni ukwinjila mu Bufumu bwaku Lesa!”

²⁴ Abakusambila bakwe balishimbilwe pakumfwa nga mashiwi. Nomba Yesu alipitilile mukusosa ati, “Mwe bana banji, chaliba ichikosele pakwinjila mu Bufumu bwaku Lesa.

²⁵ Chaliba ichangukile ingamila ukupula mulinso lyakashinje ukuchila umusambashi ukwinjila mu Bufumu bwaku Lesa.”

²⁶ Abakusambila bakwe balishimbilwe pakumfwa nga mashiwi, elo balifumbene umo nomunakwe ati, “Nga muntu shani wakwisa kupuluka?”

²⁷ Yesu alibalolekeshe nokubasuka ati, “Nchi chaba ichafishe kubantu, kuntu tekuli Lesa iyowo. Kuli Ye takupo ichafishe.”

²⁸ Elo Petulo asosele ati, “Boneni, fwebo twalisha ifintu fyonse nokumukonka.”

²⁹ Yesu alibebele ati, “Nachine nkomweba ati, takupo nangu umo uwasha inanda yakwe, bawakwe, bankashi shakwe, banyina, bawishi, abana, namabala, pamulandu waku nebo napamulandu wa Butumi Ubwawama,

³⁰ uutayise kupokela ifinji muli njino nkulo. Akwisa kupokela mananda ukuchila imiku umwanda umo, bawabo, bankashi, banyinabo, abana, amabala, kuntu nefisunsho alikuli nafyo, epo munshita ikesako akwisa kupokelapo ubumi butapwa.

³¹ Elo abenji abali pantanshi ebakuba panuma, nabo abapanuma abenji ebakuba pantanshi.”

Yesu asosa inshita yachitatu ifyamfwa yakwe

³² Ulo Yesu nabakusambila bakwe balikuya ku Yelusalemu, Yesu ewali pantanshi. Abakusambila bali panuma. Bo batatikile ukushimbwa, nambalya abamukonkele bali nomwenso. Elo ayitile abakusambila bakwe ikumi na babili pambali nokubeba ifintu ifyakwisa kumuchitikila.

³³ Asosele ati, “Boneni! Tukoya ku Yelusalemu uko Mwana wa Muntu bakoya kumutwala kuntungulushi shabachipupila nakubasambishi ba Mafunde. Bakoya kumupingula ukumwipaya nokumupela muminwe yabenafyalo.

³⁴ Bakoya kumusekuluka, ukumushipila amate, ukumupuma ifikoti nokumwipaya. Nomba mubushiku bwalenga shitatu akwisa kubuka kubafwa.”

Yakobe na Yohane balomba ubukulu

³⁵ Elo Yemusi na Yohane, bamwana Sebedi, bayile kuli Yesu nokusosa ati, “We musambishi, eko chili ichintu icho tukofwaya ukuti utuchitile.”

³⁶ Naye Yesu abafumba ati, “Chindo icho mukofwaya ukuti muchitile?”

³⁷ Bamwasukile bati, “Fwebo tukomulomba ukuti tukekale umo kukuboko kwenu ukwamulyo naumbi ukwakuchipiko ulo mwakwisa kwikala pamupando wenu uwabuchindami.”

³⁸ Yesu asosele ati, “Mwebo tamuchishibilepo icho mukofumba. Napo namwe mwakwisa kunwa kulukombo lwamachushi ulo nebo ningile ukunwenako? Nangula mungeshiba ukubatishiwa munshila iyo nebo nakubatishiwamo?”

³⁹ Nabo balimwasukile ati, “Ina, kuti twachita.” Yesu abasukile ati, “Nachine mwakwisa kunwako kulukombo nebo nakunwenako, nakambi mwakwisa kubatishiwa munshila iyo nebo nakubatishiwamo.

⁴⁰ Nomba tanshikwetepo insambu ishakusala abakwisa kwikala kukuboko kwanji ukwamulyo nokwakuchipiko. Ni Lesa umwine ewakupela ififulo kuli abo, abo apekanishishe.”

⁴¹ Ulo abakusambila banabo ikumi baumfwile mfi, balikalipile Yemusi na Yohane.

⁴² Elo Yesu abetile bonse nokuti, “Mwebo mwalishiba ukuti abantu abasontwa ukuba abapingushi, balikwata ubuleme bwakweba abantu ifyo bakowamina ukuchita.

⁴³ Nomba tachili mfyilya kuli mwe. Uyo onse uwakuba umukulu mukati kenu, abe umupyungi wenu. Na uyo onse uwakuba wantanshi mukati kenu, abe umusha wabonse.

⁴⁴ Kati umo uwakumwebo akofwaya ukuba uwapantanshi, abe umusha wakubonse.

⁴⁵ Pakuti nangu Mwana wa Muntu umwine tayishilepo ukuti bakamupyungile iyowo, kuntu wena ayisa mukupyunga nokupela ubumi bwakwe ukuti abantu abenji bakalubulwe.”

Yesu aposha Batimeyasi impofu

⁴⁶ Elo Yesu nabakusambila bakwe bafikile mumusumba wa Yeliko. Ulo Yesu nabakusambila bakwe nebumba ilikulu ilyabantu balikufuma mumusumba, mwalalume umo impofu uwali kwitwa Batimeyasi, umwana wakwa Timeyasi, alikwikala mumbali yanshila nokupula-pula utuntu kubapita-nshila.

⁴⁷ Ulo aumfwile ukuti ni Yesu waku Nasaleti uwalikupita, atatikile ukubilikisha ati, “Yesu! We Mwana Davide! Nkwatileni ichisa.”

⁴⁸ Nomba abantu balimukalipile nokumweba ukuti atalale. Elo ye alibilikishe ukuchilamo ati, “We Mwana Davide, nkwatileni ichisa.”

⁴⁹ Yesu alimakene ati, “Mwiteni.” Epo bayitile impofu njilya nokueba ati, “Sanguluka! Ima, akokwita.”

⁵⁰ Elo aposele ifyakufwala fyakwe nokuchiluka ukuya kuli Yesu.

⁵¹ Epo Yesu alimufumbile ati, “Findo ukofwaya ukuti nkuchitile?” Impofu yalimwasukile ati, “We musambishi, nkofwaya ukubona.”

⁵² Yesu amwebele ati, “Koya, ichichetekelo chobe chakuposha.” Bwangu-bwangu atatikile ukubona, elo akonkele Yesu.