Luka 9 - Chipangano Chabwangu

Yesu atuma abatumwa ikumi na babili

¹ Yesu ayitile pamo abakusambila bakwe ikumi na babili. Abapele ifiso nensambu ishakutamfya imipashi iibi nokuposha amalwele.

² Elo abatumine mukubilisha ubufumu bwaku Lesa nokuposha abalwele.

³ Asosele kuli bo ati, “Mwipintapo akantu pabulwendo bwenu, umusako, itumba, ifilyo nendalama. Nakambi mwipintapo nangu amalaya abili-abili.

⁴ Konse uko bakumupokelela ikaleni muli njilya nanda ukufikila apo mwakufuminamo muli ngulya mushi.

⁵ Konse uko bantu bakana ukumupokelela, fumenimo muli ngo mushi, mukakunte nolukungu kumakasa enu chibe ichakubachenjeshako.”

⁶ Abakusambila balimine nokuya kumishi yonse, bakobilisha Ubutumi Bwawama nokuposha abantu konse-konse.

Ukufulungana kwamano yamfumu Helodi

⁷ Ulo imfumu Helodi, kateka wakuchalo cha Galili, aumfwile fyonse ifyalikuchitika, amano akwe alifulungene, pantu abantu bambi balikusosa ati, Yohane Mubatishi abuka kubafwa.

⁸ Nomba bambi balikusosa ati, Eliya alibukile kubafwa, nakambi bambi ati, umo uwabasoseshi bakale eubukile kubafwa.

⁹ Helodi asosele ati, “Yohane nalimuputwileko umutwi. Nga uyu muntu nkoumfwila mfi fintu ninani?” Echo alikufwayisha ukubona Yesu.

Yesu alisha abantu amakana asano

¹⁰ Ulo abatumwa babwelele, baebele Yesu fyonse ifyo bachitile. Ye alibapintile apabenka kumushi uukoyitwa Betesaida.

¹¹ Ulo amabumba aumfwile uko ali, alimukonkele. Elo Yesu alibapokelele nokubasambisha ifyabufumu bwaku Lesa. Elo aposeshe abo abalikufwaya ukuposhewa.

¹² Ulo akasuba kali mukuwa, abakusambila ikumi na babili bayishile kuli Yesu nokuti, “Batumeni abantu baye mumishi namufifulo fyashinguluka nkuno ukuti bafwaye ifyakulya napakulala pakuti nkuno niku mpanga.”

¹³ Nomba Yesu asosele kuli bo ati, “Mwebo mwenka bapeleni ifyakulya!” Nabo basosele ati, “Ifyo tukwete mifuba isano bwaka nenswi shibili. Napo mukofwaya fwebo tukabashitile mba bantu bonse ifyakulya?” (

¹⁴ Impendwa yabo abalalume bali nangula amakana asano.) Yesu asosele kubakusambila bakwe ati, “Ebeni abantu bekale mumabumba aamakumi asano.”

¹⁵ Ulo abakusambila bachitile mfi, nabantu bonse bayikele panshi.

¹⁶ Elo Yesu abulile imifuba isano njilya nenswi shibili. Aliloleshe kumulu nokutotela kuli Lesa. Ulo ashilile ukutotela, alisunawile imifuba nji nokupela kubakusambila bakwe ukuti balumbe abantu.

¹⁷ Abantu bonse balilile nokwikuta nabakusambila batolele notwabufumfwa. Bayiwishe imiseke ikumi na ibili.

Petulo asosa ati Yesu e Wasubwa waku Lesa

¹⁸ Akasuba kamo ulo Yesu ali mukulomba apaenka, abakusambila bayishile kuli Ye. Elo abafumbile ati, “Nga abantu basosa ati nine nani?”

¹⁹ Nabo balimwasukile ati, “Bambi basosa ati niwe Yohane Mubatishi, bambi bati niwe Eliya, elo bambi nabo basosa ati uli umo uwabasoseshi abakale eubukile ukufuma kubafwa.”

²⁰ Elo Yesu abafumbile ati, “Mba mwe mweba ati nine nani?” Petulo alyasukile ati, “Niwe Uwasubwa waku Lesa.”

Yesu asosa pakuchula nemfwa yakwe

²¹ Elo Yesu alibakonkobeshe nokubasosha ukuti, “Tekwesha ukubushako umuntu.”

²² Nakambi alibebele ati, “Umwana wa Muntu ali nokuchula ukwinekantu. Elo akusulwa kubakulu Babayuda kuntungulushi shabachipupila, bafilolo nabasambishi ba Mafunde. Bakumwipaya, kuntu mukasuba kalenga shitatu akwisa kubuka kubafwa.”

²³ Yesu aebele nakambi bonse ati, “Umuntu kati akofwaya ukunkonka, ayikane umwine nokupinta umutashi wakwe lonse, elo ankonke.

²⁴ Pakuti umuntu onse ukofwaya ukupulusha ubumi bwakwe, akwisa kubuposa, kuntu uyo onse uwakuposa ubumi bwakwe pamulandu waku nebo, ewakubupulusha.

²⁵ Mba bune ndo chingamuletela umuntu nga anonka ichalo chonse, nomba alufya nangu aposa bumi bwakwe?

²⁶ Kati umuntu akukwata insoni pamulandu waku nebo namashiwi anji, Umwana wa Muntu naye akwisa kumukwatila insoni ulo akwisa mubuleme bwakwe nobwaku Bawishi pamo nabangelo ababuta.

²⁷ Nachine nkomweba ati, epobali bambi abemakanine mpano abatakafwepo kuntu abakabale ukubona ubufumu bwaku Lesa.”

Yesu asanguka pabakusambila bakwe

²⁸ Papitile umulungu umo apo Yesu asosele mfi fintu, epo Yesu abulile Petulo, Yohane na Yemusi, nokunina nabo palupili mukulomba.

²⁹ Penkapo ali mukulomba, ichinso chakwe chalisangukile, amalaya akwe alikubeka nokubutisha tuutu.

³⁰ Bwangu-bwangu, kwabwenekele abalalume babili balikusoshanya nakwe. Abalalume mbalya niba Mosesi na Eliya.

³¹ Babonekele mumuchinshi wakumulu, balikusoshanya na Yesu pafyo ali nokufwila mu Yelusalemu.

³² Elo Petulo nabanakwe bali mutulo twamfwa. Ulo babukile babwene umuchinshi waku Yesu nabalalume babili abayimakene nakwe.

³³ Ulo mbalya bali mukuya, Petulo aebele Yesu ati, “Bashikulu, chingawama kuli fwebo ukwikala mpano. Katwimake imisasa itatu: umo ube wenu, umbi nawo ube wakwa Mosesi, umbi ube wakwa Eliya.” (Nachine tayishibilepo ifyo alikusosa.)

³⁴ Ulo ali mukusosa, kwayishile ikumbi ilitubile tuutu nokubafimba. Abakusambila bali nomwenso uukulu ulo ikumbi lyayishile kubafimba.

³⁵ Elo mwafumine ishiwi mukati kekumbi ilyasosele ati, “Ngu Mwana wanji uwatemwekwa, uwo nasala, mumfweni!”

³⁶ Ulo ishiwi lyalekele, Yesu ashele enka. Abakusambila bayikele chelele pali mfi fyonse. Tabaebelepo nangu umo pafintu babwene pali njilya nshita.

Yesu aposha umulumbwana uwali nomupashi uubi

³⁷ Ubushiku bwakonkelepo, Yesu nabakusambila bakwe batatu batentemukile ulupili, nebumba lyabantu ilikulu lyalimukumenye.

³⁸ Elo umuntu umo mwibumba alibilikishe ati, “We musambishi! Nakupapata, ba nenkumbu pamwana wanji umwalalume umo enka nakwata.

³⁹ Umupashi uubi ulamwikata nokutatika ukwaula nokumupama panshi kafumya nepofu mukanwa. Ulamuchenaula, elo taumulekapo, yii.

⁴⁰ Nalombele abakusambila benu ukuti baufumyemo, kuntu chalibakangile.”

⁴¹ Yesu alibasukile ati, “Mama wesu ee, mwe nkulo iitachetekela neyakulufyanya? Nakwikala nenu ukufika lwisa? Nkoshipikisha nenu ukufika lwisa? Temulandupo, leteni umulumbwana kuli nebo!”

⁴² Ulo umulumbwana ali mukuya kuli Yesu, umupashi uubi walimupamine panshi nokumufulunganya. Elo Yesu aliukalipile umupashi ngulya nokuposha umulumbwana. Nomba elo amubweseshe kuli bawishi.

⁴³ Abantu bonse balishimbilwe pafiso fyaku Lesa ifikulu ifyakuposha. Abantu bonse balikushimbwa pali fyonse ifyo Yesu alikuchita. Elo Yesu aebele abakusambila bakwe ati,

Yesu asosa nakambi pamfwa yakwe

⁴⁴ “Mulokulabukilapo nga mashiwi nkososa kuli mwebo! Umwana wa Muntu akoyembulwa kubantu.”

⁴⁵ Nomba tabayishibilepo umo nchi chalolele. Chali ichafisama kuli bo ukuti bangachumfwa, nakambi balikutina ukufumba Yesu pali nchi.

Ninani umukulu mubufumu bwakumulu

⁴⁶ Mwabukile ichitala mukati kabakusambila baku Yesu pakufwaya ukwishiba nga umukulu pali bo ninani.

⁴⁷ Nomba Yesu alishibile ukulanguluka kwabo, elo abulile akayiche, akemanikile apo ali.

⁴⁸ Elo asosele ati, “Umuntu onse uupokelela akana kanini mwishina lyanji, akopokelela nebo, nakambi na onse uwapokelela nebo, apokelela nowantumine. Pakuti uukoyichefya muli mwebo, emukulu pali bonse.”

Uutali mulwani wenu muntu wenu

⁴⁹ Yohane asosele ati, “Bashikulu, twabwene umuntu akofumya imipashi iibi mwishina lyenu, kuntu twalimukenye pakuba taba mwibumba lyesu.”

⁵⁰ Elo Yesu aebele Yohane nabakusambila bambi ati, “Mwimukanyapo iyowo, pakuti uutali mulwani wenu muntu wenu.”

Bakana Yesu mu Samaliya

⁵¹ Ulo inshita yapalamine iyakuti Yesu apintilwemo ukuya kumulu, alangulukile ukuya kumusumba wa Yelusalemu.

⁵² Elo atumine intumi pantanshi yakwe. Bayile mumushi wabena Samaliya ukuti bakamuwamishe ifintu fyonse.

⁵³ Nomba abantu bamumushi ngu tabamupokelelepo pantu chalishibilwe ati alikuya ku Yelusalemu.

⁵⁴ Ulo abakusambila bakwe, Yemusi na Yohane, babwene nchi, basosele ati, “Bashikulu, tamukofwayapo ukuti twite umulilo ukufuma kumulu wise uboche?”

⁵⁵ Yesu alyalukile nokubakalipila.

⁵⁶ Elo Yesu nabakusambila bakwe bayile kumushi umbi.

Abo abangaba abakukonka Yesu

⁵⁷ Ulo balikuya munshila, umuntu umo aebele Yesu ati, “We musambishi nakukukonka konse uko walikuya.”

⁵⁸ Elo Yesu amwasukile ati, “Bamumbwe balikwata imimba, nefyuni nafyo fyaliba nefinsa, kuntu Umwana wa Muntu takwatapo napakusamina umutwi.”

⁵⁹ Nakambi Yesu aebele umuntu umbi ati, “Nkonka!” Nomba naye aasukile ati, “Bashikulu nsuminisheni mbale nje nkashike bata.”

⁶⁰ Nomba Yesu alimwasukile ati, “Leka abafwa balokushika abafwa banabo. Nomba webo koya bwaka mukubila imbila ya bufumu bwaku Lesa.”

⁶¹ Umbi naye asosele ati, “Nkoyisa kumukonka mwe Mfumu, pali nomba lekeni nje nkalaye abantu banji.”

⁶² Yesu amwebele ati, “Umuntu uyo uwatatika ukulima noluse nakambi akocheba kunuma, talingilepo mu bufumu bwaku Lesa.”