Luka 8 - Chipangano Chabwangu

Abanakashi abakonkele Yesu

¹ Ulo papitile inshita, Yesu alikwenda mumishi iikulu namumishi iinini, mukubilisha Ubutumi Bwawama ubwa Bufumu bwaku Lesa. Abakusambila ikumi na babili bayile nakwe.

² Nabo abanakashi abo aposeshe kumipashi iibi nakumalwele ambi balimukonkele. Amashina abo ninga: Maliya Magadala, uwo Yesu afumishemo imipashi iibi isano na ibili,

³ Yoana, umukashi wakwa Chusa kabilo wamfumu Helodi, Susana nabambi abenji abanakashi abalikupela ubupe ubwakwafwilisha Yesu nabakusambila bakwe.

Ichelusho chawakuminsa

⁴ Abantu abenji balikwisa kuli Yesu ukufuma kumishi nemishi. Ulo balongene, Yesu asosele muchelusho ati,

⁵ “Kwali umuntu uwayile mukuminsa imbuto. Ulo ali kuminsa, imbuto shimbi shawile munshila, balishinyantawile, elo nefyuni fyalishile nokushilya.

⁶ Shimbi shawile palubwelekese. Ulo shamenene, shalyumine pakuba tapali namuntonshi.

⁷ Shimbi shawile muminga, iminga yalikulile pamo nembuto nokushitabilisha.

⁸ Nomba shimbi mbuto shawile pamushili uuweme, shalimenene nokutwala nefitwalo umwanda umo.” Pakulekelesha Yesu asosele ati, “Umfweni, ukwete amatwi akumfwa, omfwe!”

Ubulondoloshi bwafyelusho

⁹ Abakusambila baku Yesu balimufumbile umo nchi chelusho chalolele.

¹⁰ Yesu abasukile ati, “Kuli mwebo kwapelwa ifyamfiso ifyabufumu bwaku Lesa, ekuti kuli bambi nimufyelusho. Ukuti ukubona balikubona nomba tabalokubweneshapo, nokumfwa balikumfwa nomba tabalokumfwishapo.

Yesu alondolola ichelusho chawakuminsa

¹¹ “Ichelusho chikoyalula mfi: Imbuto eshiwi lyaku Lesa.

¹² Imbuto shawile munshila ebantu abakoumfwa amashiwi aku Lesa. Nomba Satana alesa nokufumyamo mumitima yabo ukuti bechetekelapo nokupuluka.

¹³ Imbuto ishawile mulubwelekese, ebantu abomfwa amashiwi aku Lesa nokuyapokelela elo nokusekelela, nomba tayenjilisha mumitima yabo. Bakochetekela pakashita akanini bwaka. Ulo inshita yakwesheka yaisa balanakuka.

¹⁴ Imbuto shawile muminga, ebantu abomfwa amashiwi aku Lesa. Nomba amasakamiko nobusambashi namangalo aapanonshi, filabapulula, echo nefitwalo fyabo tafipyapo.

¹⁵ Nomba imbuto shawile mumushili uuweme ebantu abomfwa amashiwi aku Lesa nokuyasunga mumutima uuweme nakmbi uwachumfwila. Balapitilila ukufikila batwala nefitwalo.

Inyali iyafunikwapo imbale

¹⁶ “Tapapo umuntu uwasha inyali nokwifunikapo munongo, nangu ukubika mwifungu. Nomba alabika apasansukile pakuti abantu bonse balokwinjila munanda umwabuta.

¹⁷ “Chonse ichafisama chikaletwa apabuta, nachonse ichafunikilwa chikesa kufimbulwapo nokuba apabuta.

¹⁸ “Nomba chenjeleni nefyo mukoumfwa, pakuti ukwete akubikilwapo. Nomba ukwete kanini akupokwa nako akwete.”

Banyina nabawabo baku Yesu

¹⁹ Banyina nabawabo baku Yesu balishile kuli Ye, kuntu balifililwe ukufika apo ali pamulandu wabwinji bwabantu.

²⁰ Elo umuntu umo aebele Yesu ati, “Banyinenwe nabawenu bali panse bakofwaya ukumubona.”

²¹ Elo Yesu abasukile ati, “Bama nabawesu nimbalya abakoumfwa amashiwi aku Lesa nokuyasunga.”

Yesu atalalika amatamba

²² Akasuba kamo Yesu ayinjile mubwato pamo nabakusambila bakwe. Elo abebele ati, “Katwabukile kwishilya lyaku bemba.” Epo balimine nokuya.

²³ Ulo balikuya mubwato, Yesu alisepukile mutulo. Elo ichipupu chalimine pali bemba, namatamba atatikile ukwinjila mubwato. Ubwato bwali mupepi nokubunda.

²⁴ Elo abakusambila bayile kuli Yesu nokumubusha bati, “Bashikulu, Bashikulu! Tuli apepi nokufwa!” Yesu alishibukile nokukalipila ichipupu namatamba. Fyonse fyalilekele, patalele chelele.

²⁵ Elo Yesu afumbile abakusambila bakwe ati, “Nga ichichetekelo chenu chili kwisa?” Nomba bo balishimbilwe nokuba nomwenso uukulu. Balifumbene bati, “Nga yu muntu aba shani uwakuti aeba ichipupu namatamba neshiwi bwaka, nokumumfwila fyamumfwila?”

Yesu aposha umuntu uwali nemipashi iibi

²⁶ Yesu nabakusambila bakwe bayabukile kuchalo cha Gelasa nchilya kwishilya lyaku bemba wa Galili.

²⁷ Ulo Yesu afumine mubwato pachabu, akumene nomwalalume uwafumine mumushi uwali nemipashi iibi. Alikwenda ubwamba inshita ishinji. Elo talikwikala munanda, kuntu kumanda.

²⁸ Ulo abwene Yesu, alilile neshiwi ilikulu nokufukama pamakasa akwe nokuti, “Nindo ukofwaya kuli nebo webo Yesu, we Mwana waku Lesa Uwapulamo? Napapata, winchu-shapo!”

²⁹ Asosele mfi pakuti Yesu aebele kale umupashi uubi ukufumamo muli ye. Inshita ishinji ulo alikuchula nomupashi ngu balikumulinda uwakakwa namangwelengwende elo nobunyololo kumaboko. Nomba fyonse alikufiputaula, elo nomupashi uubi wali kumutwala muchiswebebe.

³⁰ Elo Yesu alimufumbile ati, “Ishina lyobe niwe nani?” Naye alimwasukile ati, “Nine Ibumba, pakuti tuli abenji.”

³¹ Elo imipashi iibi yafumbile Yesu ukuti eyitamfisha muchilindi chabula impelo.

³² Elo kwalipo umukuni uwankumba uwalikulya mululamba lwalupili. Nomba imipashi iibi yalimupapatile Yesu ukuti ayisuminishe ukuya kwinjila munkumba. Naye alisuminishe.

³³ Imipashi nji yalifumine mumuntu nokuya kwinjila munkumba. Elo umukuni onse walifulumukile pachinekami nokuya kwibila muli bemba, nokufwa kashifwa.

³⁴ Ulo bachembela babwene mfi, babutukile kumusumba nakumishi yamumbali mukweba abantu ilyashi ndi.

³⁵ Abantu balile mukubona ichachitikile. Ulo bafikile kuli Yesu, basangile umuntu uwo imipashi yafuminemo alikele mupepi na Yesu, alifwite, namano akwe alibwelelemo. Elo bonse baliiketwe nomwenso.

³⁶ Bo ababweneko balisosele ifyo apolele.

³⁷ Abantu bonse abamuchalo cha Gelasa, balombele Yesu ukuti abafuminemo muchalo chabo pamulandu wakuti bali nomwenso uukulu. Elo Yesu ayinjile mubwato nokubwelela uko afumine.

³⁸ Umuntu uwo imipashi iibi yafuminemo alipapatile Yesu ati, “Lekeni ndokuya nenu.” Yesu alimutumine nokweba ati,

³⁹ “Iyowo, bwelela bwaka kumyenu. Kabebe fyonse ifyo Lesa akuchitila.” Nachine alile akoshimika mumishi yonse ifyo Yesu amuchitile.

Yesu abusha mwana Yayilo aposha nomwanakashi

⁴⁰ Ulo Yesu abwelele kwishilya linakwe ilyaku bemba, ibumba lyabantu lyalimupokelele, nokusekelela pakuti bonse balikumulindilila.

⁴¹ Elo umuntu uwalikwitwa Yayilo ayishile. Ali umukulu wananda yakulombelamo Lesa. Elo afukeme pamakasa aku Yesu nokumupapatila ukwebati aye nakwe kunanda yakwe,

⁴² pakuti akwete umwana umo umwanakashi uwamyaka ikumi na ibili, uwali apepi nokufwa. Pakuya Yesu, abantu abenji abafumine mumbali shonse balimushingulukile nokumufininkisha.

⁴³ Mwibumba mwalipo nomwanakashi uwalikulwala umukunko pamyaka ikumi na ibili. Aliposayikile ifyuma fyonse akwete kung’anga, kuntu takwalipo nangu umo uwamuposeshe.

⁴⁴ Ayishile mwibumba kunuma yaku Yesu nokukumyako kumukope welaya lyakwe. Penkapo nomukunko walilekele.

⁴⁵ Yesu afumbile ati, “Ninani wankumya?” Bonse balikene. Elo Petulo asosele kuli Yesu ati, “We musambishi, abantu abamushingulukile ebamukumya.”

⁴⁶ Nomba Yesu asosele ati, “Umo ankumya pantu naumfwa ukuti ifiso fyanji fyafumamo muli nebo.”

⁴⁷ Ulo umwanakashi abwene ukuti ayishibikwa, alishile nokukanka, afukama napamakasa aku Yesu. Elo pamenso abantu bonse, alimwebele ifyo amwikatile, nomo apolele mukwangufyanya.

⁴⁸ Elo Yesu asosele kuli ye ati, “We mwana wanji, ichichetekelo chobe chakuposha. Endelapo umutende.”

⁴⁹ Ulo Yesu alikusosa mfi, intumi yalishile ukufuma kunanda yakwa chilolo nokuti, “Umwanansungu obe afwa. Mba nindo ukochushisha musambishi?”

⁵⁰ Pakumfwa mfi, Yesu asosele kuli Yayilo ati, “Witina, chetekela bwaka, umwanansungu obe akoyisa kuba nobumi.”

⁵¹ Ulo Yesu afikile kunanda, tasuminishe nangu umo ukwinjila pamo nakwe, kano Petulo, Yohane, Yemusi, bawishi wamwana nabanyina.

⁵² Abantu bonse balikulila nokulosha ngulya mwana. Elo Yesu asosele ati, “Lekeni ukulila, pakuba umwana tafwilepo, alele bwaka utulo!”

⁵³ Abantu bonse balimusekulukile Yesu pantu balishibile ukuti umwana alifwile.

⁵⁴ Nomba Yesu alikete umwana pakuboko nokumwita ati, “We mwana, buka!”

⁵⁵ Bwangu-bwangu ubumi bwakwe bwalibwelelemo, nokwima kayima. Elo Yesu abebele ukuti bapeleko umwana ichakulya.

⁵⁶ Abafyashi bamwana balishimbilwe ukwinekantu. Echo Yesu alibebele ati tekwesha ukwebako ichachitikile umuntu nangu umo.