Luka 7 - Chipangano Chabwangu

Yesu aposha umubomfi wamukulu wabashilikali

¹ Ulo Yesu ashilile ukusambisha abantu amashiwi akwe onse, ayinjile mu Kapenaumu.

² Umukulu uwabashilikali umo bachi Loma, alikwete umubomfi uwo atemenwe ukwinekantu. Umubomfi ngu ali alilwele mupepi nokufwa.

³ Ulo umukulu wabashilikali aumfwile ifyo Yesu alikuchita, atumine abakulu bambi Abachiyuda ukuti bakamufumbe ese aposhe umubofi wakwe.

⁴ Ulo bafikile kuli Yesu, abakulu mbalya balimupapatile ukwinekantu nokuti, “Ngu alingile ukumwafwa

⁵ pakuti, alitemwa abantu besu, nakambi ewatwimakila inanda yakulombelamo Lesa.”

⁶ Echo Yesu alile nabo. Nomba ulo apalamine kunanda, umukulu wabashilikali atumine kuli Yesu ifibusa fyakwe nokuti, “Bashikulu, mwiyichushapo, nshilingile ukuti mwise mwinjile munanda yanji.

⁷ Echo nshimwene uulingile ukwisa kuli mwe. Nomba soseni bwaka ishiwi, umubomfi wanji akupola.

⁸ Pakuti nandibo ndikwete isambu ishafuma kubakulu banchito. Elo ndikwete abashilikali abo ntungulula. Njeba kuli ngu, ‘Koya!’ naye kaya, nakuli umbi, ‘Isa!’ naye kaisa. Nakumupyungi wanji, ‘chita nchi!’ naye kachita.”

⁹ Yesu alishimbilwe pakumfwa nchi. Apilibukile kwibumba ilyamukonkele nokusosa ati, “Nkomweba nati, tanshabala nsangapo ichichetekelo ichaba mfi nangu nimubena Isilaeli!”

¹⁰ Ulo intumi shabwelele kunanda yaku mukulu wabashilikali, basangile umubomfi wakwe alipolele.

Yesu abusha umwana wachokolo

¹¹ Panuma yaku mfi, Yesu ayile kumushi uwitwa Naini. Abakusambila bakwe pamo nebumba ilikulu bayile nakwe.

¹² Ulo afikile mupepi napamulyango welinga lyamushi, Yesu akumenye abantu abatembele uwafwa. Ngu mwana umwalalume ali umo mpo muli banyina, bo abali nibachokolo. Abantu abenji abamumushi bali pamo nakwe.

¹³ Ulo Bashikulu bamubwene, umutima wabo wayiketwe nenkumbu. Basosele kuli banyina ati, “Wilila.”

¹⁴ Epo Bashikulu balipalamine nokwikata kumbokoshi yamfwa. Elo abatembele balimakene. Yesu asosele ati, “We mulumbwana, nkososa kuli webo nati, buka!”

¹⁵ Bwangu-bwangu uwafwile alibukile nokwamba ukusosa. Bashikulu bamupele nakuli banyina.

¹⁶ Elo abantu bonse balishimbilwe ukwinekantu. Epo batatikile ukuchinshika Lesa nokusosa ati, “Umusoseshi umukulu ayisa mukutandalila abantu bakwe!” Nakambi, “Lesa ayisa mukupulusha abantu bakwe.”

¹⁷ Nomunkunta waku Yesu walikumene konse-konse muchalo cha Yudeya namumishi yonse iyashinguluka.

Intumi shafumine kuli Yohane Mubatishi

¹⁸ Yohane balimubushishe abakusambila bakwe fyonse mfi fintu. Elo ayitilepo abakusambila bakwe babili,

¹⁹ nokubatuma kuli Bashikulu Yesu mukufumba ati, “Napo niwe basosa ukuti alinokwisa nangula tuli nokulindilila umbi?”

²⁰ Ulo abakusambila bafikile kuli Yesu, basosele ati, “Yohane Mubatishi atutuma kuli webo akofumba ati, ‘Napo niwe basosa ukuti alinokwisa, nangula tuli nokulindilila umbi?’”

²¹ Panshita yenka njilya, Yesu alikuposeshe abantu abenji kumalwele nakumyalu nambalya abali nemipashi iibi, nempofu nasho shalikubona.

²² Elo ayasukile abatuminwe ati, “Bwelelenimo mukamushimikileko Yohane ifyo mwabona nokumfwa: impofu shikobona, abalemana bakoyenda, abafyona bakopola, bankoma-matwi bakoumfwa, abafwa nabo bakobuka, nabachula bakoshimikilwa Ubutumi Bwawama.

²³ Balishuka abantu abatakayikapo pali nebo!”

²⁴ Panuma ulo intumi shakwa Yohane shafuminepo, Yesu atatikile ukusosa kumabumba abantu ifyakwa Yohane ati, “Ulo mwayile kuli Yohane muchiswebebe, findo mwalikufwaya ukubona? Napo mwalikufwaya ukubona ifyo itete lisunkana kumwela?

²⁵ Nindo mwafwayile ukuya mukubona? Napo muntu uufwite ifyakufwala ifyelele? Iyowo, abantu bafwala ifyelele basangwa mumananda amfumu!

²⁶ Njebeniko, findo mwayile ukubona? Napo musoseshi? Ina, nachine mwabwene umuntu umukulu ukuchila umusoseshi.

²⁷ Pakuti Yohane eye Amalembo asosapo ati, ‘Lesa asosele ati, nakutuma intumi yanji, nakwituma pantanshi yobe, ukuti ikuwamishe inshila yobe.’

²⁸ Nachine nkomweba ati, tapapo nangu umo umukulu uuchilile pali Yohane. Nomba umunini mubufumu bwaku Lesa, mukulu ukuchila pali ye.”

²⁹ Abantu bonse pamo nabamusonko baumfwile amashiwi akwa Yohane. Ulo balikubatishiwa na Yohane, balisumine ukuti Lesa e Mulungami.

³⁰ Nomba Abafalisi nabasambishi ba Mafunde balikene ukuchita ukufwaya kwaku Lesa, pakuba balikene ukubatishiwa na Yohane.

³¹ Yesu asosele ati, “Kanshi nikundo ningabalinganyako mba bantu bamuli njino nkulo? Bakopalana nendo?

³² Bali ukubati bana abekele pachisanke abakoyitana nabanabo ati, ‘Twalimulishishe tumitolilo twapabwinga, nomba mwe namasha kayafishisha kumo! Twalimbile inyimbo shapachililo, nomba mwe nomusowa kawafishisha kumo!’

³³ Nachine Yohane Mubatishi alishile, alikwikanya ukulya nokunwa waini, kuntu mwebo mwalikusosa ati, ‘Ali nomupashi uubi!’

³⁴ Elo Umwana wa Muntu alishile, alikulya nokunwa. Mwebo mwasosele ati, ‘Boneni ngu muntu! Wakumutoba, nichakolwa, nakambi nichibusa wabamisonko nembifi.’

³⁵ Nomba umulangwe waku Lesa ulaboneka uwachine kuli bo abampokelela muchine.”

Yesu munanda yaku Simoni Umufalisi

³⁶ Umufalisi umo ayitile Yesu mukulya nakwe. Yesu alinjile munanda nokwikala nokulya pamo nakwe.

³⁷ Muli ngulya mushi mwalipo umwanakashi umo uwali mbifi, umuchende. Ulo aumfwile ukuti Yesu alimukulya munanda ya Mufalisi, ayishile nomusashi wamafuta aanunkila bwino.

³⁸ Alishile nokwimakana kunuma yaku Yesu kumakasa, akolila nokuponya iminsoshi pamakasa aku Yesu. Elo nokuasumuna nemishishi yakwe. Nakambi alifyomfyontele amakasa aku Yesu nokuasuba namafuta.

³⁹ Ulo Umufalisi uwayitile Yesu abwene mfi, alangulukile ati, “Ngu muntu nga aaba ati musoseshi, nga alishibile ifyo mwanakashi uukomukumya aba, nga ngu ayishiba ukuti nimbifi!”

⁴⁰ Nomba Yesu alisosele kuli ye ati, “Simoni, ndipo neshiwi lyakukweba.” Simoni asosele ati, “Ina, we musambishi, njebeniko.”

⁴¹ Yesu asosele kuli ye ati, “Kwalipo abalalume babili abakongwele indalama kumuntu umo. Umo akongwele indalama imyanda isano ishabuseke. Umunakwe naye amakumi asano.

⁴² Pakuti tabakwetepo ifyakumubwesesha, alibanakilile bonse babili inkongole shabo. Nomba njebeniko, niwisa uwaku bo uwakuchilapo ukutemwesha?”

⁴³ Simoni ayasukile ati, “Nebo nkolanguluka ukuti ningulya uwakongwele ishinji.” Yesu asosele ati, “Wayasuka bwino.”

⁴⁴ Elo ayalukile kumwanakashi nokusosa kuli Simoni ati, “Ulimubwene ngu mwanakashi? Nyinjile munanda yobe, kuntu taumpelepo amenshi yakusamba amakasa anji. Nomba ye anasha amakasa anji neminsoshi yakwe nokuasumuna nemishishi yakwe.

⁴⁵ Webo taumpelepo ukufyomfyonta ukwabuchibusa umo nyinjilile muno, kuntu ngu talekelepo ukufyomfyonta amakasa anji.

⁴⁶ Webo taunsubilepo umutwi wanji namafuta, kuntu ngu waasuba amakasa anji namafuta aabwema.

⁴⁷ Epo nkokweba ukuti pamulandu wakuti alintemenwe ukwinekantu, amabifyo akwe nangu apakile shani, anakililwa. Nomba umuntu uyo banakilila apanini, eukotemwa panini.”

⁴⁸ Yesu asosele kumwanakashi ngulya ati, “Amabifyo obe anakililwa.”

⁴⁹ Abayikele pakulya pamo nakwe batatikile ukusoshanya bati, “Nga uyu naye ninani uukonakilila amabifyo?”

⁵⁰ Nomba Yesu aebele umwanakashi ati, “Ukuchetekela kobe kwakupulusha. Endelapo umutende.”