Luka 5 - Chipangano Chabwangu

Yesu ayita abalofi banswi bane

¹ Ubushiku bumo Yesu ayimakene mumbali yachishiba ichikulu icha Genesaleti. Abantu abenji bali kumufininkisha ukuti bomfwe amashiwi aku Lesa.

² Abwene amato abili mululamba lwaku bemba awo abalofi bashile. Epo balikusamfya amasumbu abo.

³ Yesu apateme mubwato bumo, ubwakwa Simoni. Amwebele ukuti atalamusheko panini kumulundu. Elo ayikele mubwato atatikile ukusambisha abantu.

⁴ Ulo alekele ukusambisha, asosele kuli Simoni ati, “Sesheni ubwato buye mwitenga, muteye namasumbu yenu ukuti mwipaye inswi ishinji.”

⁵ Simoni ayasukile ati, “Bashikulu, ubushiku bonse tulichulile, tatwipeyepo nangu kamo, kuntu pakuba mwasosa mwebo katuteye amasumbu.”

⁶ Baliteyele nokwikatamo inswi ishinji ukwinekantu ichakuti namasumbu ali apepi nokulepuka.

⁷ Epo bachebwile abanabo abali mubwato bumbi ukwisa kubafwako. Balishile nokwiusha amato onse abili nenswi ichakuti namato alikufwaya ukwibila.

⁸ Simoni Petulo pakubona ichachitikile, afukeme pamakasa aku Yesu nokulabila ati, “Bashikulu, fumeniko kuli nebo pantu ndi mbifi!”

⁹ Simoni nabanakwe ali nabo balishimbilwe pabwinji bwanswi bayipeye.

¹⁰ Elo abanakwe bakwa Simoni, Yemusi na Yohane abana bakwa Sebedi, nabo balishimbilwe. Yesu asosele kuli Simoni ati, “Witina, ukufuma nomba wakuba umulofi wabantu.”

¹¹ Bakulile amato abo pamulundu, balishile fyonse nokukonka Yesu.

Yesu aposha uwafyona

¹² Panshita imo Yesu ali mumushi umwali umuntu uwalwele ifyona. Ulo ngu muntu abwene Yesu, alifukeme nokumulomba ati, “Bashikulu, kati mukofwaya kuti mwamposha!”

¹³ Elo Yesu atambulwile ukuboko kwakwe nokumukumya nokusosa ati, “Ina, nkofwaya, pola!” Bwangu-bwangu nefyona fyakwe fyalipolele.

¹⁴ Elo Yesu amukonkobeshe ati, “Wibushapo umuntu nangu umo. Nomba koya ukayilange kuli chipupila, ukatwale ichipupo ichakupola kobe kubati nimulya Mosesi aebele, chibe chilangililo kuli bonse.”

¹⁵ Nomba umunkunta waku Yesu walyumfwikile konse-konse, namabumba abantu ayishile kuli Ye mukumfwa nokuposhewa kumalwele abo.

¹⁶ Elo ena alifumineko nokuya kumpanga enka mukulomba.

Yesu aposha umuntu uwauminine umubili

¹⁷ Ubushiku bumo ulo Yesu alikusambisha, Abafalisi bambi nabasambishi ba Mafunde akwa Mosesi nabo epo bali. Mba bonse bafumine mumishi yamuchalo cha Galili namu Yudeya elo nakumusumba wa Yelusalemu. Ifiso fyaku Lesa ifyakuposha ubulwele emo fyali muli Yesu.

¹⁸ Epo boneni abantu bambi baletele pamachila ichilema. Balyeseshe ukwinjila munanda ukuti bamutwale kuli Yesu.

¹⁹ Pamulandu webumba lyabantu, tababwenepo inshila yakumwinjishishamo munanda. Echo baninine pamutenge wananda nokutibula ichipunda. Elo bamwishishe pamachila ukulungatana napabelele Yesu.

²⁰ Ulo Yesu abwene ukuchetekela kwabo, asosele ati, “We munanji, amabifyo obe anakililwa.”

²¹ Abasambishi ba Mafunde akwa Mosesi naba Falisi balikusoshanya ati, “Nga uyu ninani uukopontela Lesa? Tepo Lesa enka eunganakilila amabifyo?”

²² Yesu alishibile amalangulushi abo. Epo asosele ati, “Mba nindo mukolangulukila mfi mumitima yenu?

²³ Nichisa ichayanguka ukusosa ukwebati ati, ‘Amabifyo obe anakililwa,’ nangula ukwebati ati, ‘Ima wende’?

²⁴ Pakuti mwishibe ukuti Umwana wa Muntu ali nensambu muchalo ishakunakilila amabifyo.” Elo aebele uwauminina umubili ati, “Nkokweba nati, ima, bula amachila obe uye kunanda yobe.”

²⁵ Bwangu-bwangu alimakene nabonse balimubwene. Abulile amachila nokuya kunanda yakwe, ulo atondayisha Lesa.

²⁶ Elo abantu bonse bayiketwe mwenso uukulu, bachinshika Lesa nokusosa bati, “Lelo twabona ifyakushimbwisha.”

Yesu ayita Lefi

²⁷ Panuma yaku mfi, Yesu alifumine kunse. Abwene uwamusonko umo uwitwa Lefi, ayikele pamulimo wakwe munanda yamusonko. Yesu amwitile ati, “Nkonka.”

²⁸ Elo ashile fyonse alimine nokumukonka.

²⁹ Elo Lefi atebetele Yesu ifyakulya ifinji munanda yakwe. Kwali ibumba ilikulu ilyabakusonkesha nabantu bambi abayikele pakulya.

³⁰ Bambi Abafalisi nabasambishi ba Mafunde baliyilishenye kubakusambila bakwe ati, “Mba nindo mukolila nokunwena pamo nabakasonkesha nembifi?”

³¹ Elo Yesu abasukile ati, “Abakosele tabafwayapo ing’anga iyowo, kuntu abalwele.

³² Tanshayisapo mukwita abaololoka imitima, sembi imbifi ukuti shilapile kumabifyo ashiko.”

Ukwikanya ukulya

³³ Abantu bambi basosele kuli Yesu ati, “Abakusambila bakwa Yohane balayikanya ukulya libili-libili nakambi balalomba, abakusambila baba Falisi nabo efyo bachita, nomba abakusambila benu balalya nokunwa.”

³⁴ Yesu abasukile ati, “Napo mungakanya abanakwe bakwa nshibwinga ukulya ulo bali nanshibwinga? Nangu panini!

³⁵ Nomba akasuba kakwisa ulo nshibwinga akupintwa pali bo, elo bakuyikanya ukulya.”

³⁶ Nakambi Yesu abebele nchi chelusho ati, “Takupo umuntu uulepula ichikamba kwilaya lyabwangu nokukambika pelaya lyakale. Nga achita mfi, ekwebati aonaula ndilya ilyabwangu, nechikamba chansalu yabwangu tachalinganepo nelyakale.

³⁷ Elo tabetulwilapo waini wabwangu mumatumba ampapa akale, pakuti amatumba akalepauka, nawaini akoyisa kuswila panshi.

³⁸ Echo bikeni waini wabwangu mumatumba ampapa aabwangu!

³⁹ Elo umuntu uwanwa waini wakale tayise kufwaya uwabwangu, pantu kuti asosa ati, ‘Ngu wakale euweme.’”