Luka 4 - Chipangano Chabwangu

Yesu Ayeshekwa kuli Satana

¹ Yesu afumine kumulonga wa Yolodani uwayiulamo no Mupashi Wabuta, alitanjililwe no Mupashi Wabuta ukumutwala muchiswebebe.

² Nkulya eko ayeshekelwe na Satana inshiku amakumi ane. Muli nshi nshiku shonse talilepo kantu. Napanuma yanshi nshiku, Yesu alyumfwile insala.

³ Elo Satana amwebele ati, “Kati niwe Mwana Lesa, eba amabwe nga ukuti aaluke umufuba.”

⁴ Elo Yesu amwasukile ati, “Chalilembwa ati, ‘Umuntu tangekala uwabumi pakulya umufuba wenka iyowo.’”

⁵ Nakambi Satana alimutwite apalundumene. Panshita inini amulangile amabufumu onse aamuchalo.

⁶ Epo Satana asosele kuli ye ati, “Nkoyisa kukupela insambu shonse nomuchinsi washiko, pakuti fyapelwa kuli nebo. Nakambi ndinefiso fyakupela kumuntu onse uwo ntemenwe.

⁷ Fyonse mfi fyakuba fyobe nga wanambila.”

⁸ Yesu amwasukile ati, “Chalilembwa ati, ‘Ulokulambila Bashikulu Lesa obe, mba benka ebo ulokupyungila!’”

⁹ Elo Satana atwite Yesu ku Yelusalemu nokumuteka pachitumbe chananda yaku Lesa. Elo asosele kuli Ye ati, “Nga uli Mwana waku Lesa chilukila panshi.

¹⁰ Pakuti chalilembwa ati, ‘Lesa akweba abangelo bakwe ukuti bese bakwanke.’

¹¹ Nakambi chalilembwa ukuti, ‘Bakwisa kukwelekela pamaboko abo ukuti wiyitutulapo amakasa obe pamabwe.’”

¹² Yesu alyasukile ati, “Chalilembwa ati, ‘Wiyeshapo Bashikulu Lesa obe.’”

¹³ Ulo Satana ashilile ukumwesha Yesu munshila shonse, alimushile mukashita kanini.

Yesu atatika umulimo wakwe mu Galili

¹⁴ Ulo Yesu abwelelemo ku Galili, nefiso fya Mupashi Wabuta fyali pali Ye. Epo ilyashi lyakwe lyaumfwikile konse-konse muli nchilya chalo.

¹⁵ Elo alikubilisha mumananda akulombelamo Lesa, nabantu bonse abalikumfwako balimutotele.

Yesu bamukana mu Nasaleti

¹⁶ Yesu ayile ku Nasaleti, uko akulile. Elo pakasuba ke Sabata ayinjile munanda yakulombelamo Lesa, ukubati kafuto kakwe. Alimine ukuti apende ifyamumalembo.

¹⁷ Elo bamupele ibuku lyamusoseshi Esaya. Aliswile, asangilepo apalembelwe mfi,

¹⁸ “Umupashi waku Lesa uli pali nebo, pakuti alinsuba ukuti nkabilishe, Ubutumi Bwawama kubachula. Alintumine ukubile imbila iyakuti bakakulwe abakakwa, nakambi nempofu ukuti shibone, nokulubula bo abasulwa.

¹⁹ Nokubila imbila yamwaka waku Bashikulu, yakupulushamo abantu bakwe.”

²⁰ Yesu ayisele ndi buku nokulipela kumupyungi, ayikala napanshi. Abantu bonse munanda yakulombelamo Lesa batontomekele amenso abo pali Ye.

²¹ Elo atatikile ukusosa nabo ati, “Lelo nga Malembo afikilishiwa ukubati ifyo mwaumfwa mukupenda.”

²² Nomba bonse balimulumbenye nokushimbwa pamashiwi alikusosa aamulangwe. Balikusosa bati, “Napo ngu temwana Yosefe?”

²³ Yesu asosele kuli bo, “Ina nchi chebo mwakwisa kusosa kuli ne ukuti, ‘We ng’anga, iposhe wemwine!’ Nakambi mwakwisa kulabila ati, ‘Chita munomushi mumyenu ifyo twaumfwile wachitile ku Kapenaumu.’”

²⁴ Elo abebele ati, “Nachine takwaba umusoseshi uungapokelelwapo muchalo chakumyabo.

²⁵ Nebo nkoebesha nati, kwali ifyokolo ifinji mu Isilaeli munshiku shaku Eliya, ulo kwali ichilala ichikulu pamyaka itatu nemyeshi isanu naumo. Elo nensala iikulu yaliponene muchalo chonse.

²⁶ Epo Eliya tatuminwepo kuli umo uwaku bo, kuntu atuminwe kuchokolo ichalikwikala mumushi wa Selepeta muchalo cha Sidoni.

²⁷ Elo eko bali abafyona abenji muchalo cha Isilaeli panshita yamusoseshi Elisha, kuntu takwalipo nangu umo uwaku bo uwaposhiwe, kuntu Namani enka uwamuchalo cha Siliya.”

²⁸ Abantu bonse munanda yakulombelamo Lesa pakumfwa nga mashiwi, balikalipile ukwinekantu.

²⁹ Balimine nokutulumuna Yesu kunse yamushi. Bamutwala pamulu walupili apo umushi wabo wayimekwe nokuti bamusunkile muchinkunu-nkunu.

³⁰ Nomba Ye apulilile mwibumba nokuya kaya.

Umuntu uwali nomupashi uubi

³¹ Ulo Yesu ayile ku Kapenaumu, umushi wamu muchalo cha Galili, alikusambisha abantu pe Sabata.

³² Bonse balishimbilwe pakusambisha kwakwe, pantu amashiwi akwe ali nensambu.

³³ Epo munanda yakulombelamo Lesa, mwalipo umuntu umo uwali nomupashi uubi. Ngu muntu alyawile neshiwi ilikulu ati,

³⁴ “Yangwee! Nindo ukofwaya kuli fwe, we Yesu waku Nasaleti? Napo wayishila ukutonaula? Ne ndikwishi, niwe Wabuta waku Lesa!”

³⁵ Yesu akalipile umupashi uubi ngulya ati, “Talala, fumamo muli ngu muntu!” Umupashi ngulya walimupamine panshi mulwalala. Penkapo walifuminemo ukwambula ukumuchena.

³⁶ Abantu bonse balishimbilwe, balikusoshanya umo nomunakwe bati, “Nga aya mashiwi alola mwisa? Munsambu nefiso uyu muntu akososa kumipashi iibi nayo ikofumamo!”

³⁷ Nomunkunta wakwe walyumfwikile konse-konse muli nchilya chalo.

Yesu aposha abantu abenji

³⁸ Yesu afumine munanda yakulombelamo Lesa, ayile kwinjila munanda yakwa Simoni. Banafyala wakwa Simoni pakuti balilwele umubili walikukaba. Epo balimwebele Yesu ifyakulwala kwabo.

³⁹ Yesu ayile kwimakana pambali yabulo bwamulwele, elo aebele ubulwele ukufumamo. Penkapo balipolele. Bwangu-bwangu batatikile nokubatebeta.

⁴⁰ Nomba akasuba ulo kali mukuwa, bonse abali namalwele apusene-pusene babatwite kuli Yesu. Naye alikubikapo amaboko akwe pali umo-umo nokubaposha bonse.

⁴¹ Elo imipashi iibi nayo yalikufuma mubenji, yalikusosa nokusosa ati, “Webo niwe Mwana Lesa!” Yesu naye aliyikalipile nokuyikanya ukusosa. Pakuba yena yalishibile ukuti Yesu e Wasubwa waku Lesa.

Yesu abilisha mu Yudeya

⁴² Kumacha, Yesu alimine nokuya kuchifulo chimo apaenka. Abantu batatikile ukumufwaya-fwaya. Ulo bamusangile balyeseshe ukumusungilila ukuti ebasha.

⁴³ Nomba asosele kuli bo, “Nebo nkowamina ukubilisha Ubutumi Bwawama ubwabufumu bwaku Lesa kumishi nayimbi pakuti echo natuminwe.”

⁴⁴ Epo alikubilisha mumananda akulombelamo Lesa muchalo chonse icha Yudeya.