Luka 3 - Chipangano Chabwangu

Ukubilisha kwakwa Yohane Mubatishi

¹ Epo mumwaka wekumi nayisano iyabufumu bwaku Tibeliyasi, kateka uwaku Loma na Pontiyo Pilato ewali kateka waku Yudeya. Elo Helodi ewali imfumu yamu Galili, nawabo Filipo naye ewali imfumu yamufyalo ifyaku Ituleya naku Tulakonitisi. Lisaniyasi naye ewali imfumu yamuchalo cha Abilene.

² Nomba Anasi na Kayafasi bali bachipupila bakulu pali njilya nshita. Ishiwi lyaku Lesa lyalishile kuli Yohane, mwana Sekeliya, muchiswebebe.

³ Yohane ayile muchalo chonse ichaku Yolodani, akobilisha ati, “Lapileni nokubatishiwa ukuti Lesa amunakilile amabifyo enu.”

⁴ Ukubati nimfilya chalembwa mwibuku lyaku Esaya umusoseshi ati, “Umuntu akobilikisha muchiswebebe ati, ‘Wamyeni umusebo waku Bashikulu, lungamikeni bwino inshila yabo, ukuti bese bendemo!

⁵ Iwisheni imipoka yonse nokutambalalika amapili nemilundu. Ongololeni imisebo iyapotama, wamyeni nenshila ishabipa.

⁶ Nemishobo yonse yabantu yakwisa kubona ichipulusho chaku Lesa!’”

⁷ Abantu abenji bayishile kuli Yohane mukubatishiwa kuli ye. Elo asosele kuli bo ati, “Mwebana bansoka mwe! Ninani wamuchenjeshe ukubutuka kubukali bwaku Lesa ubukoyisa?

⁸ Chiteni ifintu ifyakulanga ukupilibuka kwamitima yenu. Elo mwilokwibepapo mumitima yenu mwati, twaliba nanshifwe Abulahamu. Nachine nkomweba ati, Lesa aakwalula nga mabwe ukuti abe abana bakwa Abulahamu.

⁹ Isembe lilipekanishiwe kale pamushu uukulu uuli onse uwachiti. Pakuti ichiti chonse ichitatwalapo ifitwalo ifiweme bakuchitema nokuchiposa mumulilo.”

¹⁰ Elo abantu bamufumbile ati, “Mba nindo twakuchita fwebo?”

¹¹ Yohane ayasukile ati, “Uyo onse uuli neminjila ibili, apeleko uutakwetepo. Nangulya uukwete ichakulya achite mumo mwenka.”

¹² Abamisonko bambi nabo balishile mukubatishiwa nokumufumba ati, “We musambishi, mba fwebo nindo twakuchita?”

¹³ Naye asosele kuli bo ati, “Mwilokusonkesha abantu indalama ukuchila pachipimo chefunde.”

¹⁴ Abashilikali bambi nabo kabamufumba bati, “Mba fwebo, Nindo twakuchita?” Yohane asosele ati, “Mwilokupoka indalama kumuntu mukupatikisha nangu ukumubepesha. Amalipilo awo mupokelela nienka ayo.”

¹⁵ Ichichetekelo chabantu chalikulile, nokulanguluka bati, “Nangula ngu Yohane kuti aba Ewasubwa waku Lesa.”

¹⁶ Yohane alyasukile ati, “Nebo nkomubatisha namenshi, kuntu uwakwisa alinchililepo ifiso, tanshilingilepo nokukakula ulushinga lwankwabilo shakwe. Ngu akoyisa kumubatisha no Mupashi Wabuta nomulilo.

¹⁷ Alikwete nolupe muminwe yakwe ulwakwelako tiligu. Elo akututila tiligu mubutala bwakwe, kuntu imisungu akayocha mumulilo uutashimapo.”

¹⁸ Munshila ishinji, Yohane alikubasambisha abantu ulo alikubilisha Ubutumi Ubwawama.

¹⁹ Nomba Yohane akalipile imfumu Helodi pamulandu wakupa Helodiya umukashi wakuwabo, nefibi fyonse ifyo Helodi achitile.

²⁰ Elo Helodi achitile ichibi ukuchila pali fyonse, ukubika Yohane muchifungo.

Ukubatishiwa kwaku Yesu

²¹ Ulo abantu bonse babatishiwe, Yesu naye alibatishiwe. Munshita ali mukulomba, kumulu kwalisukile,

²² no Mupashi Wabuta wayikele pali Ye, uwapalile ukubati ninkunda. Neshiwi lyafumine kumulu ati, “Webo uli mwana wanji uwatemwekwa, muli webo nkosekelela.”

Ifikolwe fyaku Yesu

²³ Ulo Yesu atatikile ukusambisha ali nemyaka nangula amakumi atatu. Abantu balangulukile bati nangula nimwana Yosefe, umwana wakwa Heli,

²⁴ umwana wakwa Matati, umwana wakwa Lefi, umwana wakwa Meleki, umwana wakwa Yanai, umwana wakwa Yosefe,

²⁵ umwana wakwa Matatiyasi, umwana wakwa Amosi, umwana wakwa Nahumi, umwana wakwa Esili, umwana wakwa Nagayi,

²⁶ umwana wakwa Maati, umwana wakwa Matatiyasi, umwana wakwa Semeyini, umwana wakwa Yoseki, umwana wakwa Yoda,

²⁷ umwana wakwa Yowanani, umwana-Lesa, umwana wakwa Selubabeli, umwana wakwa Shealitiyeli, umwana wakwa Neli,

²⁸ umwana wakwa Meleki, umwana wakwa Adi, umwana wakwa Kosamu, umwana wakwa Elimadamu, umwana wakwa Ele,

²⁹ umwana wakwa Yoshua, umwana wakwa Eliyesa, umwana wakwa Yolimu, umwana wakwa Matati, umwana wakwa Lefi,

³⁰ umwana wakwa Simyoni, umwana wakwa Yuda, umwana wakwa Yosefe, umwana wakwa Yonamu, umwana wakwa Eliyakimu,

³¹ umwana wakwa Meleya, umwana wakwa Mena, umwana wakwa Matata, umwana wakwa Natani, umwana wakwa Davide,

³² umwana wakwa Yese, umwana wakwa Obedi, umwana wakwa Boasi, umwana wakwa Salimoni, umwana wakwa Nashoni,

³³ umwana wakwa Aminadabu, umwana wakwa Adimini, umwana wakwa Alini, umwana Hesiloni, umwana wakwa Peleshi, umwana wakwa Yuda,

³⁴ umwana wakwa Yakobe, umwana wakwa Isake, umwana wakwa Abulahamu, umwana wakwa Tela, umwana wakwa Naho,

³⁵ umwana wakwa Seluki, umwana wakwa Leu, umwana wakwa Pelegi, umwana wakwa Ebeli, umwana wakwa Shela,

³⁶ umwana wakwa Kainani, umwana wakwa Afakisadi, umwana wakwa Shemu, umwana wakwa Nowa, umwana wakwa Lameki,

³⁷ umwana wakwa Metusela, umwana wakwa Enoki, umwana wakwa Yaledi, umwana wakwa Mahalaleli, umwana wakwa Kenani,

³⁸ umwana wakwa Enoshi, umwana wakwa Seti, umwana wakwa Adamu, umwana waku Lesa.