Luka 24 - Chipangano Chabwangu

Yesu abuka kubafwa

¹ Muluchelo-chelo pakasuba kakwamba aka Mulungu abanakashi bayile kumanda, bapintile namafuta anunkila awo bawemye.

² Basangile ibwe lilikunkulukilepo pamulyango wamanda.

³ Elo balinjile mukati kamanda, nomba tabasangilemo umubili waku Bashikulu Yesu.

⁴ Balimakene mpalya nokushimbwa pali nchi. Bwangu-bwangu abalalume babili abafwite ifyabekesha bayimakene nabo.

⁵ Epo abanakashi mba bali nomwenso uukulu, nokwinama panshi. Elo abalalume basosele kuli bo ati, “Nindo mukofwayila umuntu uwabumi mukati kabafwa?

⁶ Talimo muno, abuka! Ibukisheni ifyo asosele kuli mwe ulo ali mu Galili ati,

⁷ ‘Umwana wa Muntu akapelwa kuminwe yambifi, nokusamikwa. Elo pakasuba kalenga shitatu akoyisa kubuka kubafwa.’”

⁸ Elo abanakashi bayibukishe amashiwi aku Yesu.

⁹ Echo babwelele ukufuma kumanda, basosele fyonse mfi kubakusambila ikumi na umo nakuli bambi bonse.

¹⁰ Abanakashi mba bali niba Maliya Magadala, Yoana, na Maliya banyina bakwa Yemusi. Mba nabanakashi bambi, ebasosele mfi fintu fyonse kubatumwa.

¹¹ Nomba abatumwa balangulukile ati ifyasosa abanakashi tamupo mano. Echo tabafichetekelepo.

¹² Nomba Petulo abutukile kumanda. Ulo alengelemo, abwenemo bwaka insalu isho bamupombelemo, fimbi tamwalipo. Elo abwelele kumushi nokushimbwa pafintu ifyachitikile.

Ifyo Yesu aendele ulwendo lwakuya ku Emausi

¹³ Muli kenka nkalya kasuba, abakusambila babili balikuya kumushi uwalikwitwa Emausi. Ubutali pali ukubati milundu isano na ibili ukufuma ku Yelusalemu.

¹⁴ Ulo balikuya, balikusoshanya pafintu fyonse ifyachitikile.

¹⁵ Ulo balikusoshanya nokufumbashanya, Yesu umwine ayishile apepi nokwenda nabo pamo.

¹⁶ Balimubwene, kuntu tabamwishibilepo.

¹⁷ Elo Yesu abafumbile ati, “Findo ifyo mukososhanyapo?” Bayimakene chelele, nefinso ifyachikonko.

¹⁸ Umo uwaku bo, uwalikwitwa Keleopasi, alimufumbile ati, “Napo ulimulwendo wenka mu Yelusalemu uuteshibilepo ifintu fyalikuchitika nkulya muli nshi nshiku shinini shapitapo?”

¹⁹ Yesu alibafumbile ati, “Fintu ndo?” Elo bayasukile ati, “Ifyo achitile nokusosa ayilangile ukwebati ali umusoseshi uwafiso, elo asekeshe Lesa nabantu bonse.

²⁰ Intungulushi shabachipupila nabapingushi besu ebamutwele kukupingulwa kukwipayiwa. Elo balimusamikile pamutashi.

²¹ Twalichetekele ukuti ngu ewishile mukulubula Isilaeli! Lelo ekasuba kakulenga shitatu apo fyachitikile.

²² Nomba bambi abanakashi abamwibumba lyesu batupapusha fwebo, ulo bachelele kumanda.

²³ Tabasangilemo umubili wakwe. Ulo balikubwelela balikusosa ati balibwene ifimonwa fyabangelo abo ababebele ati abuka.

²⁴ Bambi abamwibumba lyesu bele kumanda basangile fyenka ifyo abanakashi basosele, kuntu Yesu tabamubwenepo.”

²⁵ Yesu asosele kuli bo ati, “Mwebo mwalipunama, tamuchetekelapo bwangu fyonse ifyo abasoseshi basosele!

²⁶ Kanshi tachaweme Uwasubwa waku Lesa ukuti achulile mfi fintu, elo enjile mumuchinshi wakwe?”

²⁷ Echo Yesu abalondolwelele nefyakwe ifyasoselwe mu Malembo Apatulika, ukutatikila mumabuku alembele Mosesi nokufikila naku Malembo onse aabasoseshi.

²⁸ Ulo bapalamine kumushi balikuyako, Yesu achitile ukubati akopitilila,

²⁹ kuntu balimubweseshe nokweba ati, “Ikaleni nafwe, akasuba kaya mukuwa nemfinshi ikoyisa.” Elo ayinjile munanda nokwikala nabo.

³⁰ Alikele nokulya nabo. Abulile umufuba, alomba aushukisha, ausuna nokubapela.

³¹ Penkapo balimwishibile, kuntu alifuminepo pali bo. Tabamubwenepo nakambi.

³² Batatikile ukusoshanya bati, “Napo amashiwi akwe taali kutulasapo ulo alikusosa pamusebo nokulondolola ifyalembwa Mumalembo Apatulika?”

³³ Bwangu-bwangu balimine ukubwelela ku Yelusalemu, uko basangile abakusambila ikumi na umo balongene pamo nabambi.

³⁴ Basosele ati, “Nachine Bashikulu balibukile! Baboneka nakuli Simoni!”

³⁵ Mba babili balondolwele ifyabwenekele munshila, nefyo bayishibile ukuti ni Bashikulu ulo asunawile umufuba.

Yesu aboneka kubakusambila bakwe

³⁶ Ulo mbalya babili bachili bakobeba amashiwi nga, Bashikulu abene bayimakene mukati kabo nokusosa kuli bo ati, “Umutende ube namwebo.”

³⁷ Epo balyebekele ukwinekantu nokututuma. Balangulukile ati babona ichipuku.

³⁸ Nomba asosele kuli bo ati, “Mulandu ndo mwayebekela? Mulandu ndo mukokayikila?

³⁹ Boneni amaboko namakasa anji, nokwishiba ati ninebo nenka. Njikateni nakambi mwakwishiba, pantu ichipuku tachabapo iminofu namafupa ngefyo mubwene nkwete.”

⁴⁰ Ulo asosele mfi, abalangile amaboko namakasa akwe.

⁴¹ Nomba napo pene tabachetekelepo pantu bali nokusekelela ukukulu, nokushimbwa. Elo abafumbile ati, “Napo mulikwetepo ifyakulya mpano?”

⁴² Echo bamupele ichipinswa chanswi ichaochelwe.

⁴³ Elo abulile nokuchilya pachinso chabo.

⁴⁴ Elo asosele kuli bo ati, “Mfi efyo namwebele ulo nali nenu. Fyonse ifyalembwa ifyaku nebo mu Mafunde, nefyalembwa nabasoseshi, nefya Malumbo fyakwisa kuchitika.”

⁴⁵ Elo ayiswile imitwi yabo ukuti bomfwikishe ifya Mumalembo Apatulika.

⁴⁶ Asosele kuli bo ati, “Nchi echalembwa ukuti Uwasubwa waku Lesa alingile ukuchula nokubuka kubafwa pakasuba kalenga shitatu.

⁴⁷ Elo mwishina lyakwe ubutumi bubilishiwe kubantu bamitundu yonse ukutatika mu Yelusalemu ukuti balapile ukwebati Lesa abanakilile.

⁴⁸ Elo nimwe bakamboni baku mfi fintu.

⁴⁹ Nebo nakumutumina icho Bata bamulaya. Nomba mulingile ukulindilila mumusumba muno ukufikila ulo ifiso fyakwisa pali mwe ukufuma kumulu.”

Yesu apintwa kumulu

⁵⁰ Elo abafumishe mumusumba wa Yelusalemu nokubatanjilila kumushi wa Betani, uko ayimishe amaboko akwe nokubashukisha.

⁵¹ Ulo alikubashukisha, alilekene nabo nokupintwa kumulu.

⁵² Nabo balimulambile nokubwelelamo ku Yelusalemu, abayiwilemo nokusekelela ukukulu.

⁵³ Inshita shonse bali munanda yaku Lesa balelumbanya Lesa.