Luka 23 - Chipangano Chabwangu

Yesu aatwalwa kuli Pilato

¹ Abantu abenji balimine nokutwala Yesu kuli Pilato.

² Nkulya batatikile ukumwebaula ati, “Twayikete ngu muntu pakuti akolufyanya abantu besu. Akobeba ati mwilokupelapo imisonko kuli kateka mukulu waku Loma nakambi akoeba ukuti Ewasubwa waku Lesa, imfumu.”

³ Pilato alimufumbile ati, “Napo webo niwe mfumu ya Bayuda?” Yesu amwasukile ati, “Wasosa.”

⁴ Elo Pilato asosele kuntungulushi shabachipupila nakumabumba ati, “Nebo tanshisangilemo umulandu muli ngu muntu.”

⁵ Nomba bo balikatishe ukwinekantu ati, “Mukusambisha kwakwe akotatika ifimfulunganya mukati kabantu ukupita monse muchalo cha Yudeya. Atatikile mu Galili nakambi ayisa nankuno.”

Yesu atumwa kuli Helodi

⁶ Ulo Pilato aumfwile nchi, alifumbile ati, “Kanshi ngu muntu waku chalo cha Galili?”

⁷ Ulo ye ayishibile ati Yesu afumine kuchalo chitekwa na Helodi, atumine Yesu kuli Helodi, uwali mu Yelusalemu pali njilya nshita.

⁸ Helodi alitemenwe ukwinekantu ulo abwene Yesu pakuti alikufwayisha ukumubona panshita iitali. Pantu alikufwayisha ukuti abonepo ichishibilo icho Yesu angachita.

⁹ Epo Helodi afumbile Yesu amafumbo ayenji, kuntu Yesu tamwasukilepo.

¹⁰ Elo intungulushi shabachipupila nabasambishi ba Mafunde bayishile kuntanshi nokusosesha nefiso mukwebaula Yesu mufintu ifinji.

¹¹ Nakambi Helodi pamo nabashilikali bakwe basekulukile Yesu nokumusalula ukwinekantu. Elo bamufwikile umwinjila uuweme nokumubwesesha kuli Pilato.

¹² Mwenka muli nkalya kasuba, Helodi na Pilato baambene buchibusa, kuntu afitalabako mfi balipatene.

Yesu apingulwa ukwipayiwa

¹³ Pilato ayitile pamo intungulushi shabachipupila, bafilolo nabantu.

¹⁴ Asosele kuli bo ati, “Mwaletele ngu muntu kuli nebo nokweba ati alikupufyanya abantu. Nomba nebo namufumbile pamenso enu, tanshisangilemo umulandu nangu umo muli fyonse ifyo mwamwebelela.

¹⁵ Nangu ni Helodi naye tasangilemo umulandu. Echo amubweseshe kuli fwebo. Takupo nangu chimo icho ngu muntu achitile ichingalenga ukuti epayiwe.

¹⁶ Epo nkomupanda bwaka ifikoti nokumuleka alokuya.” [

¹⁷ Panshita yakulya Chakulya Chakuchilila Pilato alikubakakwila umo uwaku bo abafungwa.]

¹⁸ Nomba ibumba lonse ilyabantu lyalibilikishe ati, “Mwipayeni ngu! Utukakwile Balabasi.” (

¹⁹ Balabasi ngu abikilwe muchifungo pantu ewali intanjishi wafimfulunganya ifyali mumusumba, pamulandu wakwipaya umuntu.)

²⁰ Nomba Pilato afwayile ukukakula Yesu, epo alifumbile abantu nakambi.

²¹ Elo abantu balibilikishe bati, “Musamikeni! Musamikeni!”

²² Pilato asosele kuli bo inshita yachitatu ati, “Nomba mulandu ndo uwo achitile? Nshisangilepo umulandu uwo achitile uwakuti alingile epayiwe! Nebo nkomupanda bwaka ifikoti nokumuleka alokuya.”

²³ Nomba balikatishe nokubilikisha ukwinekantu mumashiwi abo ukuti Yesu alingile ukusamikwa pamutashi. Kumupwilo chilya chongo chabo chalyumfwikilwe.

²⁴ Elo Pilato alipingwile Yesu ukulingana nomo abene balikufwayila.

²⁵ Abakakwilile Balabasi, uyo uwaposelwe muchifungo pamulandu wachimfulunganya nokwipaya, elo abapele Yesu ukuti bamuchitile ifyo balikufwaya.

Basamika Yesu pamutashi

²⁶ Elo abashilikali bapintile Yesu. Ulo balikuya, bakumenye umuntu uwafumine kumushi wa Sailini, uwitwa Simoni. Alikwisa mumusumba wa Yelusalemu ukufuma mumpanga. Balimwikete nokumutwika umutashi ukuti apinte nokukonka Yesu panuma.

²⁷ Elo ibumba ilikulu ilyabantu lyalimukonkele. Mukati kabo mwali nabanakashi abali kulila imisowa.

²⁸ Yesu achebele kunuma nokuti kuli bo, “Mwe banakashi bamu Yelusalemu! Mwindilila, kuntu muyililile mwenka nabana benu.

²⁹ Pantu inshita ikoyisa ulo abantu bakwisa kusosa bati, ‘Balishuka abanakashi abatafyalapo nokonsha abana!’

³⁰ Yakuba ninshita iyo abantu bakusosa kumpili ati, ‘Wileni pali fwebo!’ Nakutupili ati, ‘Tufiseni fwebo!’

³¹ Kati mfi fikochitika kuchiti ichibishi, mba kwakwisa kuba shani kuchauma?”

³² Abantu mbalya bapintile utupondo tubili ukuti tukepayiwe pamo na Yesu.

³³ Ulo bafikile kuchifulo ichitwa, “Ifupa Lyamutwi,” bapopele Yesu pamutashi pamo notupondo ntulya. Kamo kukuboko kwakwe ukwamulyo, kambi nako kuchipiko.

³⁴ Yesu asosele ati, “Bata, banakilileni pantu tabeshibilepo icho bakochita.” Elo bayakene amalaya yakwe mukuchita bumwine-mano.

³⁵ Abantu bambi abayimakene mpalya balikutamba ulo intanjishi sha Bayuda shalikumusekuluka ati, “Alikupulusha bambi, lekeni ayipulushe umwine enka, kati chine e Wasubwa waku Lesa, wasalwa!”

³⁶ Nabo abashilikali balimusekulukile. Baletele waini uwasasa nokumupela ukuti anwe.

³⁷ Epo basosele ati, “Ipulushe wemwine kati niwe Mfumu ya Bayuda!”

³⁸ Pamutashi wamutwi wakwe palilembelwepo nga mashiwi, “Ngu ni Mfumu ya Bayuda.”

³⁹ Umo uwaku bo bandeta-twebo uwasamikilwe mpalya alimwebawile nokumusalula Yesu ati, “Napo te wepo Uwasubwa waku Lesa? Ipulushe wemwine nafwe pamo!”

⁴⁰ Umbi ngulya, nangu chali mfilya, alimukalipile nokuti, “Taukotinapo Lesa? Pantu nobe wapingulwa ukufwa pamo naye.

⁴¹ Fwebo nangu chili mfi, chatulinga pantu twapokelela ukulingana nefyo twachita. Nomba ngu tabifyapo akantu.”

⁴² Elo asosele kuli Yesu ati, “Mwe Yesu mukanjibukishe ulo mwakwisa mubufumu bwenu!”

⁴³ Yesu asosele kuli ye ati, “Nachine, nkano kasuba wakuba nandibo muchifulo chakusekelela.”

Imfwa yaku Yesu

⁴⁴ Inshita yali kubati 12 koloko, kwayishile imfinshi muchalo chonse ukufika panshita ya 3 koloko wachungulo.

⁴⁵ Epo nechansalu ichali munanda yaku Lesa chalyabakene pakati.

⁴⁶ Yesu ayawile neshiwi ilikulu ati, “Bata! Nabika umupashi wanji mumaboko enu!” Ulo asosele nga mashiwi, nokufwa kafwa.

⁴⁷ Umukulu wabashilikali ulo abwene ifyachitikilwe, achinshikile Lesa ati, “Nachine ngu umuntu takwetepo umulandu!”

⁴⁸ Elo abantu balongene nkulya mukutamba ifyalikuchitika, babwelelemo kumyabo ulo bayikunkunsha pafifuba.

⁴⁹ Abo bonse abali kwishiba Yesu nabanakashi abafumine ku Galili, bayimakene akatalamukila nokubona mfi fyonse.

Ukushikwa kwaku Yesu

⁵⁰ Kwali umuntu uwalikwitwa Yosefe, uwamu chilye cha Bayuda. Ye ali muntu uuweme nakambi uulungeme.

⁵¹ Afumine muchalo cha Yudeya, mumushi wa Alimateya alikulindilila ukwisa kwa Bufumu bwaku Lesa. Nangu ali uwamukabungwe kafilolo, tasuminishenyepo nabo mukupingula nemichitile yabo.

⁵² Ayile kuli Pilato mukulomba umubili waku Yesu.

⁵³ Elo asamwine umubili ngulya, aupombele munsalu iyambafuta nokuubika mumanda iyo bafukwile mwibwe, iitashikwamo umuntu.

⁵⁴ Kali kasuba kakupekanya pakuti Isabata lyali apepi ukutatika.

⁵⁵ Abanakashi abayishile na Yesu ukufuma ku Galili bakonkele Yosefe nokubona imanda nefyo umubili waku Yesu baulalikile.

⁵⁶ Elo babwelelemo kumushi mukupekanya utwanunji amafuta ayanunkila. Nomba pakasuba ke Sabata balitushishe ukulingana ne Funde.