Luka 22 - Chipangano Chabwangu

Bapinga ukwipaya Yesu

¹ Nomba inshita yalipalamine iya Kasuba kakulu akakulya Imifuba Iitatutumuka iyalikwitwa Chakulya Chakuchilila.

² Intungulushi shabachipupila nabasambishi ba Mafunde balikutina abantu, elo balikufwayilisha inshila yakwipayilamo Yesu mubumfinshi.

Yuda asumina ukwembula Yesu

³ Elo Satana ayinjile muli Yuda, uwali kwitwa Isikaliyoti, uwali umo uwabakusambila ikumi na babili.

⁴ Echo Yuda alile nokusosa nentungulushi shabachipupila nabafilolo abakunanda yaku Lesa umo angembwila Yesu kuli bo.

⁵ Nabo balitemenwe nokulaya ukumupela indalama.

⁶ Naye Yuda alisumine pali nchi nokutatika ukufwaya inshila iiweme iyakwembwilamo Yesu ukwambula abantu ukwishiba.

Yesu apekanya Chakulya Chakuchilila

⁷ Akasuba kalifikile akakulyamo Imifuba Iitatutumuka ako balikwipayamo umwana wambelele ukuba nga ipupo lya Chakulya Chakuchilila.

⁸ Yesu atumine Petulo na Yohane nokubeba ati, “Kamuya mukatuwamishishe Chakulya Chakuchilila.”

⁹ Nabo balimufumbile ati, “Kanshi nikwisa uko mukofwaya ukuti tumuwamishishe chakulya nchi?”

¹⁰ Naye alyasukile ati, “Ulo mukoya kwinjila mumusumba, mukoya kukumanya umwalalume umo uupintile umutondo wamenshi. Mumukonke kunanda uko akoya kwinjila.

¹¹ Elo mwebe umwine wananda ati, ‘Umusambishi akokufumba ati, mba chipinda chabalwendo icho nebo nabakusambila banji twakulilamo Chakulya Chakuchilila chili kwisa?’

¹² Naye akoya kumulanga ichipinda chapamulu ichikulu ichayanshikwa. Mwenka mulya emo mukawamishishe.”

¹³ Balile nokusanga ifintu fyonse fili bwaka mwenka umo Yesu asosele. Nabo baliwamishishe Chakulya Chakuchilila.

Umulalilo waku Bashikulu

¹⁴ Ulo inshita yafikile, Yesu abulile ichifulo chakwe petebulu pakulya pamo nabatumwa bakwe ikumi na babili.

¹⁵ Elo asosele kuli bo ati, “Ndifwayishe ukwinekantu ukulya pamo nenu Chakulya Chakuchilila nchi ulo ntalachushiwa!

¹⁶ Nomba nkomweba ati, tanshayise kulya nenu Chakulya nchi chimbi ukufikila ulo mfi fyakuchitika mu Bufumu bwaku Lesa.”

¹⁷ Elo Yesu abulile inkombo, alitotele kuli Lesa nokuti, “Buleni ulukombo ndu mwabane.

¹⁸ Nkomweba ati ukufuma nduno tanshayise kunwapo amenshi afitwalo fya mpesha ukufikila Ubufumu bwaku Lesa bukese.”

¹⁹ Elo abulile umufuba nokutota kuli Lesa, aliusunawile, epo alibapele nokuti, “Ngu mubili wanji, [uwapelwa pamulandu wenu. Chiteni nchi mukunjibukisha.”

²⁰ Munshila imo yenka alibapele nenkombo panuma yamulalilo, nokuti, “Ngu mulopa wanji uwachipangano ichabwangu chamumulopa wanji uwayitikilwe pamulandu waku mwebo.”]

²¹ “Nomba, boneni! Uyu uukonyembula ali mpano petebulu pamo nandibo!

²² Umwana wa Muntu akufwa ukulingana nomo Lesa alangulukile, kuntu ishamo kuli uyo umuntu ukomwembula!”

²³ Elo abakusambila batatikile ukufumbashanya bati, “Ninani wakwisa kuchita nchi?”

Ifyo umukulu alingile ukuba

²⁴ Mwali ukutalikishanya mukati kabakusambila baku Yesu ichakuti beshibe mba ninani uungaba umukulu mukati kabo.

²⁵ Yesu asosele kuli bo ati, “Imfumu shabenafyalo shalikwata ifiso pabantu babo abamuno chalo, nabakapingula bakoyitwa ‘Ifibusa fyabantu.’

²⁶ Nomba nji tenshilapo chingabelamo nakuli mwebo. Echo umukulu mukati kenu alingile ukuba nga mwayiche, nomutanjishi alinga ukuba nga umupyungi.

²⁷ Mba umukulu ninani, uwikala panshi nokulya nangula uyo uukobapyungila? Chakwebesha, ningulya uwikala panshi nokulya. Nomba nebo ndi mukati kenu ukubati mupyungi.

²⁸ “Mwebo mwayikala nandibo munshita shonse ishakwesheka kwanji.

²⁹ Echo mwenka umo Bata bampelela ifiso fyakuteka, epo nafipela nakuli mwe.

³⁰ Mwakwisa kunwa nokulya petebulu lyanji mu Bufumu bwanji. Elo mwakwisa kwikala pafipuna ifyabufumu nokupingula pamikowa ikumi na ibili ya Baisilaeli.

Yesu asosa ifyakukanwa na Petulo

³¹ “Simoni! Simoni! Umfwa! Satana asuminishiwa ukuti amweshe mwe bonse, ukupatula ubune ukufuma kububi, ukubati nimfilya umulimi apatula umusungu kuli tiligu.

³² Nomba we Simoni nakulombela ukwebati ukuchetekela kobe kwibwelelapo kunuma. Ulo wakubwelela kuli nebo, ulingile ukukosha bawenu.”

³³ Petulo alyasukile ati, “Bashikulu, nebo ndi uwayipekanya ukuya namwe kuchifungo, nokufwila pamo nenu.”

³⁴ Yesu asosele ati, “Nkokweba Petulo nati, tambala atalalila mbuno bushiku bwenka, ukoyisa kunkana imiku itatu ukuti tawanjishibapo.”

Ichikwama, itumba nomwele

³⁵ Elo Yesu afumbile abakusambila bakwe ati, “Ulo namutumine njilya nshita ukwambula ichikwama, itumba nangu inkwabilo, napo mwalichulilepo akantu?” Nabo bayasukile ati, “Tatwachulilepo akantu iyowo.”

³⁶ Elo Yesu asosele ati, “Kuntu nomba, uyo onse uuli nechikwama nangula itumba alingile ukupinta, na uyo uutakwetepo umwele kashitishe ilaya lyakwe ukuti ashite.

³⁷ Pakuti nkomubusha Amalembo Apatulika ngalya ayasosa ati, ‘Ye balimupendele pamo notupondo,’ ukwebati filange ukwebesha nefyalembelwe pali nebo, pakuti ifyalembelwe pali nebo fili apepi nokufikilishiwa.”

³⁸ Abakusambila bakwe basosele ati, “Boneni, Bashikulu! Nkuno tukweteko imyele ibili!” Yesu aasukile ati, “Chalinga.”

Yesu alomba palupili lwa Maolife

³⁹ Yesu alifuminemo mumusumba nokuya nga mfilya alikuchita lonse, ku Lupili lwa Maolife, nabakusambila bakwe bayile nakwe.

⁴⁰ Ulo afikile kuchifulo nchilya asosele ati, “Lombeni ukuti mwiwila mukweshewa.”

⁴¹ Yesu afuminepo pali bo, ayileko panini pantanshi apakuti ibwe alyaposwa kuti lyafikapo. Elo alifukeme nokulomba.

⁴² Elo Yesu alombele ati, “Bata, nga mukofwaya, fumyenipo ndu lukombo lwamachushi pali nebo. Nomba tekufwayapo kwanji, kuntu kufwaya kwenu eko kuchitikwe.” [

⁴³ Elo umungelo ayishile kuli Ye nokumukosha.

⁴⁴ Mukupenga ukukulu ukwamutima, Yesu alilombele ukuchisha napakubala, ichibe chakwe chapalile ati mulopa walikuswila panshi!]

⁴⁵ Ulo Yesu ayimine apo ali mukulomba, abwelele kubakusambila bakwe nokubasanga balilele utulo, pantu bali nechikonko.

⁴⁶ Elo asosele ati, “Nindo mwalalila? Bukeni nokulomba ukuti mwiwila mukweshewa.”

Bayikata Yesu

⁴⁷ Yesu ulo alimukusosa, ibumba lyabantu lyalishile. Lyatanjililwe na Yuda, umo uwabakusambila ikumi na babili. Ayishile kuli Yesu nokumufyomfyonta.

⁴⁸ Nomba Yesu asosele ati, “Yuda, kanshi nku kufyomfyonta eko ukoyembwilako Umwana wa Muntu?”

⁴⁹ Ulo abakusambila bali pamo na Yesu babwene ichikofwaya kuchitika, balifumbile bati, “Bashikulu, napo nafwe tubomfye imyele?”

⁵⁰ Umo uwaku bo asolomwene umwele akwempula ukutwi kwakukulyo ukwamusha wakwa chipupila mukulu.

⁵¹ Nomba Yesu asosele ati, “Emfilya, leka!” Elo ayikete ukutwi kwaku ngulya umwalalume nokukuposha.

⁵² Elo Yesu asosele kuntungulushi shabachipupila nakuli bafilolo abalikulinda inanda yaku Lesa, nakubakulu abayishileko ukumupinta ati, “Napo nebo ndi chipondo apo mwayisa nemyele nenkoli mukunjikata, bayi?

⁵³ Inshiku shonse nalikwikala namwebo nkosambisha munanda yaku Lesa, nokuti munjikatepo, yii. Nomba nji enshita yenu nakambi iyafiso fyamfishi.”

Petulo akana Yesu

⁵⁴ Elo balimwikete Yesu nokumutwita kunanda yakwa chipupila mukulu. Petulo alikonkele akatalamukila.

⁵⁵ Nomba balikoseshe umulilo mwisano na Petulo alipamo nambalya abalikonta umulilo.

⁵⁶ Ulo umo uwabapyungi abanansungu abwene Petulo alikele pamulilo, alimulolekeshe nokusosa ati, “Ngu muntu naye aali pamo na Yesu!”

⁵⁷ Nomba Petulo alikene ati, “We mwanakashi, nshamwishibapo nokumwishiba!”

⁵⁸ Panuma ulo papitile akashita kanini, umbi umwalalume naye alimubwene Petulo nokwebati, “Namwe muli umo waku mba!” Petulo alyasukile ati, “We mwalalume, tenepo!”

⁵⁹ Elo ukubati papitile ola umo umwalalume umbi alishininkishe ati, “Tekuti pabepo nokukayika. Nachine ngu muntu aali pamo na Yesu, pantu naye mwina Galili!”

⁶⁰ Nomba Petulo alyasukile ati, “We mwalalume, tanshishibilepo nefyo ukusosa!” Lwenkolo, ulo achili akososa, tambala alililile.

⁶¹ Bashikulu balyalukile nokulolesha pali Petulo. Elo Petulo ayibukishe ifyo Bashikulu basosele kuli ye ati, “Tambala atalalila mbuno bushiku, ukonkana imiku itatu ati tawanjishibapo.”

⁶² Elo Petulo afumine panse nokulila ukwinekantu.

Yesu bamusekuluka nokumupama

⁶³ Nomba abantu abalikulindila Yesu balimusekulukile nokumupama.

⁶⁴ Balimufimbile pamenso nokumufumba ati, “Lota! Ninani wakupama?”

⁶⁵ Basosele ifintu ifinji ifyakumusalula.

Yesu aletwa kuchilye

⁶⁶ Ulo bwachele, abakulu Babayuda, intungulushi shabachipupila nabasambishi ba Mafunde bakumene pamo, na Yesu aletelwe pachilye.

⁶⁷ Balimufumbile bati, “Twebe, napo ewe Uwasubwa waku Lesa?” Yesu alibasukile ati, “Nga namweba, tamwanchetekelepo.

⁶⁸ Elo nga namufumbapo ifumbo, tekuti mwasukepo.

⁶⁹ Ukufuma nomba Umwana wa Muntu akwikala kukuboko kwamulyo ukwaku Lesa Uwafiso fyonse.”

⁷⁰ Elo bonse bamufumbile ati, “Kanshi, nachine, uli Mwana waku Lesa?” Naye alibasukile ati, “Ifyo mwasosa efyo naba.”

⁷¹ Nabo basosele ati, “Mulandu ndo tukofwayilapo nabakamboni bambi? Fwebo fwenka twayumfwila ifyo asosele!”