Luka 21 - Chipangano Chabwangu

Ubupe bwachokolo

¹ Yesu aliloleshe nokubona abantu abasambashi uko balikuposamo ifyabupe muchipawo chamunanda yaku Lesa.

² Nakambi abwene ichokolo ichachula chabikamo utumakobili tubili utwamukuba.

³ Elo Yesu asosele ati, “Nkomweba nati, ichokolo nchi chabikamo ukuchila bonse.

⁴ Pantu bambi bapela ifyabupe fyabo ukufumya pamwina, kuntu nchi ichachula, chapela tonse uto chaali nokulilamo.”

Yesu asosa ukonaulwa kwananda yaku Lesa

⁵ Bambi abakusambila balikusosa pafyananda yaku Lesa ifyo yalikuboneka bune namabwe ayiko aaweme ukwinekantu nefyabupe ifyalikupelwa kuli Lesa. Elo Yesu asosele ati,

⁶ “Fyonse mfi ifyo mwabona, inshita yakwisa ulo tapakashalepo ibwe nangu limo pamulu walinakwe, onse nga akubungumuka.”

Amafya namachushi

⁷ Elo bafumbile Yesu ati, “We musambishi, nilwisa mfi fintu fyakwisa kubako? Chishibilo ndo chakubako?”

⁸ Elo Yesu abasukile ati, “Chenjeleni ukuti umuntu nangu umo ekamubepapo. Pakuba abenji bakwishila mwishina lyanji nokusosa ati, ‘Nine Klistu!’ Nakambi, ‘Inshita nomba yafika!’ Nomba mwibakonka.

⁹ Mwilenga mube nomwenso ulo mwakumfwa ilyashi lyankondo nefyafitala muchalo. Mfi fili nokwisa kuchitika, kuntu tafikoyalulapo ati ukushila kwachalo kwapalamina.”

¹⁰ Yesu alipitilishe mukusosa ati, “Ifyalo fyakwisa mukulwa nefyalo finakwe, nobufumu nabo bwakwisa kulwa nobufumu bunakwe.

¹¹ Kwakwisa kuba ifinkukuma, insala, nemyalu konse-konse. Kwakwisa kuba ifyakutinya nefishibilo ifinji ifyakufuma kumulu.

¹² Ulo mfi fyonse, fitalachitika, bakumwikata nokumuchusha. Elo bakumutwala mukupingulwa mumananda akulombelamo Lesa, nokumuposa muchifungo. Bakumutwala kuli bakateka nabapingushi pamulandu wanji.

¹³ Ndi lyakuba lishuko lyenu ilyakubilisha Ubutumi Bwawama.

¹⁴ Ishibileni limo, mwiyisa mukusakamikwa nokulanguluka ifyo mwakuyichingilila.

¹⁵ Pakuti nakumupela amashiwi nomulangwe ichakweba ati nangu utupondo twenu tatwakamuchile nangu ukulengulula ifyo mwakusosa.

¹⁶ Mwakwisa kwembulwa kubafyashi benu, bawenu, abamukowa wenu, nefibusa fyenu. Elo bambi abamuli mwe bakwipayikwa.

¹⁷ Bonse bakumupata pamulandu muli bantu banji.

¹⁸ Nomba takupo pali mwe uwakulofya nangu umushishi umo kumitwi yenu.

¹⁹ Mube abakosele, elo mwakwipulusha mwebene.

Yesu asosa ukonaulwa kwaku Yelusalemu

²⁰ “Ulo mwakubona Yelusalemu washingulukwa nefita, elo mwakwishiba ukuti nibwangu akonaulwa.

²¹ Nomba abamu Yudeya bakabutukile kumpili, na bo abakuba mumusumba kabafumemo, kuntu abali kumabala bebwelelamo.

²² Pakuti nji eshita yamachushi, nku ekufikilisha fyonse ifyalembwa.

²³ We shamo we kubanakashi abali kwimitile nakubali konsha muli nshilya nshiku! Kwakuba ubuchushi ubukulu muchalo, nobukali bwaku Lesa bwakwisa kuba pali mba bantu.

²⁴ Bambi bakwisa kwipayiwa nemyele yankondo, bambi bakwisa kupintwa ubusha mufyalo fyonse. Abenafyalo bakunyantaula Yelusalemu ukufikila apo inshita yabo yakukumanina.

Ukwisa kwa Mwana wa Muntu

²⁵ “Kwakwisa kuba ifishibilo kukasuba, kumwenshi nakuntandala. Napanonshi, kwakwisa kuba ifyakutinya nefinkukuma fyaku bemba namatamba ayiko.

²⁶ Abantu bakwisa kufwa chipunge-punge kumwenso wakulinda ichikoyisa muchalo chonse pakuti ifiso fyamumulu fyakwisa kutenkana.

²⁷ Elo Umwana wa muntu akwisa kuboneka mumakumbi ali nefiso, elo nobuleme ubukulu.

²⁸ Ulo mfi fyakuchitika imakaneni, musansule imitwi yenu pakuti ukupuluka kwenu kwafika apepi.”

Isambililo lyachiti chamukunyu

²⁹ Elo Yesu abebele nchi chelusho ati, “Langulukeni nechiti chamukunyu nefiti fimbi.

³⁰ Ulo mubona amabula atatika ukusoka ulutundwa, muleshiba ukuti amayinsa apalama.

³¹ Munshila imo yenka, ulo mwakubona mfi fintu fikochitika, mwakwishiba ukuti Ubufumu bwaku Lesa buli apepi.

³² “Nachine nkomweba ati, abantu banjino nkulo pakufwa, sembi mfi fintu fyonse fikabale fikachitike.

³³ Umulu nechalo fyakupita, kuntu amashiwi anji akubelelela umuyayaya.

Ukulindilila ekufwayikwa

³⁴ “Ikaleni abayibukila! Muyiposa mukulya namukukolwa namumasakamiko yaku mbuno bumi, ichakuti nkalya kasuba keyisa kumupumikisha bwaka nokwikatwa

³⁵ nga chitembo. Pantu kakwishila abantu bonse panonshi.

³⁶ Beni abayibukila nokulomba inshiku shonse ukuti mube nefiso fyakwisa kupulamo muli fyonse ifyakuchitika. Elo mwakwisa kwimakana kuntanshi ya Mwana wa Muntu.”

³⁷ Yesu aposele shonse nshi nshiku akosambisha munanda yaku Lesa. Elo kuchungulo alikuya ku Lupili lwa Maolife.

³⁸ Muchalo chonse abantu bonse balikuya kunanda yaku Lesa mukumfwa ukusambisha kwakwe.