Luka 2 - Chipangano Chabwangu

Ukufyalwa kwaku Yesu

¹ Muli nshilya nshiku, imbila yafumine kuli Ogasitasi, Kateka Mukulu waku Loma, ukuti abantu bonse abali muchalo chakwe balembwe.

² Nku ekulembwa ukwakwamba, kwachitikile ulo Kwiliniyasi ali kateka waku Siliya.

³ Pali ngu mulandu, abantu bonse umo-umo balikuya mukulembwa kumishi yabo.

⁴ Yosefe naye alimine ukufuma ku Galili, kumushi waku Nasaleti, nokuya ku Yudeya, kumushi wakwa Davide, uukoyitwa Betelehemu, pakuba ali uwamukowa wa Davide.

⁵ Ayile mukulembwa pamo na Maliya uwo alumbile. Maliya alimitile.

⁶ Ulo bachili mu Betelehemu, inshiku ishakupapa shalifikile.

⁷ Maliya alifyele umwana umwalalume nokumupomba munsalu. Amulalikile muchililo chang’ombe pakuti munanda yabalwendo tamwalipo chifulo chakulalamo.

Bachembela nabangelo

⁸ Emo bali bachembela muli nchilya chalo abalikwikala mumpanga nokulinda ifitekwa fyabo ubushiku.

⁹ Umungelo waku Lesa alibonekele kuli bo, epo nomuchinshi waku Bashikulu walibasanikile. Elo balitinine ukwinekantu.

¹⁰ Umungelo asosele kuli bo ati, “Mwitina! Pakuti namuletela mwebo ilyashi iliweme, ilyakusekelela ukukulu ukukoyisa kuba kubantu bonse.

¹¹ Pakuti kwafyalikwa kuli mwebo muli nkano kasuba mumushi wakwa Davide, Umupulushi, eye Klistu Bashikulu!

¹² Epo nchi chakuba ichishibilo kuli mwe, mukoya kusanga umwana alipombelwe munsalu, alilele namuchililo chang’ombe.”

¹³ Bwangu-bwangu kwabwenekele ibumba ilikulu lyabangelo pamo nomungelo ngulya, lyalikulumbanya Lesa ati,

¹⁴ “Umuchinshi ube kuli Lesa mumulu mwine, epo nomutende panonshi mubantu abo atemwa!”

¹⁵ Ulo abangelo bafuminepo nokuya kumulu, bachembela balisoshenye bati, “Katulokuya lwenka nduno ku Betelehemu, tukabone nchi chintu chachitika icho Bashikulu bafisulula kuli fwe.”

¹⁶ Elo bayile nakasaku basangile Maliya na Yosefe nokubona umwana alilele muchililo chang’ombe.

¹⁷ Pakubona umwana, bachembela balisosele kuli bo ifyo umungelo abebele pamulandu waku ngu mwana.

¹⁸ Ulo bonse baumfwile ifyo bachembela basosele, balishimbilwe ukwinekantu.

¹⁹ Nomba Maliya alisungile ifyebo fyonse nokufilanguluka mumutima wakwe.

²⁰ Ulo bachembela babwelele, balikuchinshika nokwimbila Lesa pali fyonse ifyo baumfwile nokubona. Fyali kubati mwenka umo umungelo abebele.

Bayinika Yesu ishina

²¹ Ulo inshiku shisano nashitatu shakumanine ishakumushilimuna bamwinikile ati Yesu, ndi eshina umungelo amwinikile apo talaambulwa namwifumo.

Yesu atwalwa munanda yaku Lesa

²² Ulo inshita yakumanine iyakuti Yosefe na Maliya basangululwe ukubati Amafunde akwa Mosesi, balimutwite Yesu ku Yelusalemu mukumupela kuli Lesa.

²³ Kubati ifyo chalembwa mumafunde aku Lesa ukuti, “Umwana umwalalume onse uwabubele alokupelwa kuli Lesa.”

²⁴ Elo nokutula ichipupo ukulingana nefunde lyaku Bashikulu ilyakuti, mulete ifiba fibili nangula ifinkanda fibili.

²⁵ Boneni mu Yelusalemu mwali umuntu uwali kwitwa Simyoni, umuntu uwaololoka uwalikumfwila Lesa. Alikulindilila ichakupulusha Isilaeli. Umupashi Wabuta wali pali ye.

²⁶ Epo Umupashi Wabuta walimufisulukile ukuti tali nokufwa ulo atalabona Uwasubwa waku Lesa.

²⁷ Ulo Simyoni atanjililwe no Mupashi Wabuta, ayinjile munanda yaku Lesa. Elo abafyashi baku Yesu bayinjile nomwana munanda njilya ukuti bakamuchitile ukulingana nakafuto kamwifunde.

²⁸ Simyoni alipokele umwana mumaboko akwe nokutotela Lesa ati,

²⁹ “Nomba mwe Shikulu, kuti mwamusuminisha umusha wenu afwe mumutende, pantu mwafikilisha ichilayo chenu.

³⁰ Pakuti amenso anji abona ichipulusho chenu,

³¹ icho mwawamishe pachinso chabantu bonse.

³² Mwapela ukusanika ukuti kusanikile kubenafyalo, nokuba umuchinshi kubantu benu abena Isilaeli.”

³³ Bawishi nabanyina balishimbilwe pafintu Simyoni asosele pali Yesu.

³⁴ Simyoni alibashukishe nokusosa kuli Maliya banyina ati, “Bona ngu mwana wabikwa ukuti abenji mu Isilaeli bakuwa, abenji nabo bakwima. Akuba ichishibilo chakwa Lesa icho abantu abenji balikukana.

³⁵ Elo bakufisulula amalangulushi amumitima yabo. Nachine nechikonko, chakulasa umutima obe kubati mwele wankondo.”

³⁶ Kwalipo naumbi umusoseshi umwanakashi uwalikwitwa Ana, umwana wakwa Fanuele, uwamukowa waku Aseli. Ngu aali umukote. Ulo ali umwanansungu, alyupilwe kumwalalume uwo ayikele nakwe imyaka isanu na ibili bwaka.

³⁷ Epo alikele bumukamfwilwa imyaka amakumi asano na atatu nayine. Talikufumako kunanda yaku Lesa. Ali uwakupyungila Lesa akasuba nobushiku. Alikulomba nokwiikanya ukulya.

³⁸ Naye Ana alishile panshita yenka njilya nokutondayisha Lesa. Asosele pamulandu wamwana nokwebako bonse abalikulindilila ukuti Lesa alubule Yelusalemu.

Babwelela ku Nasaleti

³⁹ Ulo Yosefe na Maliya bashilile ukuchita fyonse ukulingana namafunde aku Lesa, balibwelele kuchalo chaku Galili, kumushi kumyabo ku Nasaleti.

⁴⁰ Umwana alikulile mwifumbi, mumano namubwanshi bwaku Lesa bwali pali ngo.

Yesu munanda yaku Lesa

⁴¹ Umwaka nomwaka abafyashi baku Yesu balikuya ku Yelusalemu kukulya Chakulya Chakuchilila.

⁴² Ulo Yesu ali nemyaka ikumi nayibili, bayile mukulya ichakulya nchi, ukulingana nakafuto kabo.

⁴³ Ulo inshiku shakulya shashilile, pakubwelela kumushi, umwana Yesu ashele mu Yelusalemu. Abafyashi tabayishibilepo.

⁴⁴ Balikulanguluka ati, Yesu ali mwibumba. Panuma yakwenda ulwendo lwakasuba kamo, abafyashi batatikile ukumufwaya-fwaya mubenababo namufibusa.

⁴⁵ Pakusanga ukuti tabonekele, babwelele ku Yelusalemu mukumufwaya.

⁴⁶ Pabushiku bwakulenga shitatu, eli bamusangile munanda yaku Lesa ekele pakati kabasambishi ba Mafunde, alikubakutika nokubafumba amafumbo.

⁴⁷ Abantu bonse abalikuumfwako balishimbilwe pamulandu wakwasuka kwakwe ukwamulangwe.

⁴⁸ Abafyashi bakwe balishimbilwe ulo bamubwene. Banyina basosele ati, “We mwana wanji, nindo watuchitila mfi? Bona bawiso nandibo ulitupamfishe intibi mukufwaya-fwaya.”

⁴⁹ Yesu alibasukile ati, “Mba findo mwalikumfwayila? Kanshi tamwayishibilepo ukuti nebo ndi nokuba munanda yaku Bata?”

⁵⁰ Abene abafyashi tabaumfwilepo ichebo icho asosele nabo.

⁵¹ Elo Yesu nomba ayile nabo ku Nasaleti uko alikwikala nokubomfwila. Banyina balisungile mumutima wabo fyonse ifyasosekelwe.

⁵² Elo Yesu alikulile mwifumbi namumulangwe. Lesa pamo nabantu balimutemenwe ukwinekantu.