Luka 19 - Chipangano Chabwangu

Yesu na Sakeyo

¹ Yesu ayinjile mumushi wa Yeliko nokupitilila.

² Nomba mwali umukulu wabamusonko ishina lyakwe ni Sakeyo, ali umusambashi.

³ Sakeyo alikufwaya ukubona Yesu, kuntu pamulandu wabwipi tamubwenepo, elo kwali nabantu abenji.

⁴ Epo abutukile kuntanshi yebumba nokunina kuchiti cha sokomole, ukuti abone Yesu ulo alikupita pali njilya nshila.

⁵ Ulo Yesu afikilepo pali nchilya chifulo, ayinwine amenso nokulabila ati, “Sakeyo, angufyanya ika, pakuti lelo nakwikala nawebo kunanda yobe.”

⁶ Bwangu-bwangu Sakeyo alikile, nokupokelela Yesu nensangalashi.

⁷ Ulo abantu bamubwene, batatikile ukuyilishanya bati, “Ngu muntu ayinjila munanda nokwikala pamo nembifi!”

⁸ Naye Sakeyo alimine nokusosa kuli Bashikulu ati, “Umfweni, mwe Mfumu! Nakupela ichipande chabuboni bwanji. Fimbi mpeleko abachula, nakambi kati nalichenjelekapo umuntu uuli onse, nakumubweseshapo ukuchila imiku ine.”

⁹ Elo Yesu amwebele ati, “Nkano kasuba ipusukilo lili muli njino nanda, pantu ngu muntu, naye mwana wakwa Abulahamu.

¹⁰ Pakuti Umwana wa Muntu ayishile mukufwaya nokupulusha abaluba.”

Ichelusho chandalama sha golide

¹¹ Ulo abantu balikumfwa nga mashiwi, Yesu apitilile mukubeba ichelusho pakuti ali apepi nokufika ku Yelusalemu. Abantu nabo balangulukile ukuti Ubufumu bwaku Lesa buli apepi ukufika.

¹² Epo asosele ati, “Kwali umuntu umuchindami uwalikuya kuchalo ichakutali, ukuya mukuba imfumu. Alangulukile ukubwelela kumushi.

¹³ Ulo atalaya, ayitile abapyungi bakwe ikumi ukubapela umo-umo indalama yagolide nokubeba ati, ‘Fungashanyeni, tubone isho mwakusangamo ukufikila nkabwele.’

¹⁴ Nomba abekashi balimupatile. Elo batumine intumi uko ayile ati, ‘Tatukofwayapo ngu muntu ukuti abe mfumu yesu.’

¹⁵ “Nangu chali mfi, ngulya muntu alibikilwepo pabufumu nokubwelelamo. Bwangu-bwangu ayitile abapyungi bakwe abo apele indalama ukuti asange isho bafungashenyemo.

¹⁶ Uwakwamba asosele ati, ‘Mwe mfumu, nafungashenyemo indalama ikumi pali imo iyo mwampele.’

¹⁷ Imfumu yamwebele ati, ‘Wachita bwino, we mupyungi uuweme! Apo uli uwachetekelwa patunini, nkokubika ukuti ube kateka wamishi ikumi.’

¹⁸ Uwachibili naye asosele ati, ‘Mwe mfumu, nafungashenyemo indalama shisano pali imo iyo mwampele.’

¹⁹ Elo imfumu yamwebele ati, ‘Webo walikuteka imishi isano.’

²⁰ Umupyungi uwakulekelesha naye alishile nokuti, ‘Mwe mfumu, indalama yenu ninji. Naliyikakilile kukasalu nokuyisunga.

²¹ Nalitinine pakuti uli mukali. Ubula nefitali fyobe nokulobolola umo utaminshilemo.’

²² Imfumu yamwebele ati, ‘We mupyungi mubi! Walishiba ukuti ndimukali, elo ndabula nefitali fyanji nokulobolola umo ntaminshilemo.

²³ Chiweme, nga nindo utabikilepo ndalama yanji uko babika indalama? Nandibo pakubwela nga ndisangile nambiikilapo.’

²⁴ “Nomba imfumu yaebele abayimakene apepi ati, ‘Mupokeni indalama yakwe mupele uyo uukwete indalama ikumi!’

²⁵ Nomba baebele imfumu ati, ‘Mwe mfumu, ngu alikwete kale indalama ikumi!’

²⁶ “Imfumu yabasukile ati ‘Nkomweba ati, kumuntu onse uukwete akubikilwapo nafimbi, kuntu uukwete akanini, nakanini ako akwete akupokwa.

²⁷ Nomba kuli ntulya utupondo twanji, ututalikumfwayapo ukuti mbe mfumu yatuko, tuleteni nkuno ukuti mutwipayile pamenso anji.’”

Basekelela Yesu pakwinjila mu Yelusalemu

²⁸ Ulo Yesu asosele nga mashiwi, abatanjilile ukuya ku Yelusalemu.

²⁹ Ulo apalamine apepi nemishi ya Betefage na Betani yaku Lupili lwa Maolife, atumine abakusambila bakwe ukuya mumushi ngulya.

³⁰ Elo abebele mfi, “Kamuya kumushi uuli kuntanshi yenu. Pakwinjilamo, mwakusanga umwana punda uwakakwa kuchiti, uyo uutaninwapo umuntu. Mukakuleni, nokumuleta nkuno.

³¹ Kati umuntu akumufumba ati, ‘Mba nindo mukomukakwila?’ Mumwasuke mwati, ‘Bashikulu ebakomufwaya.’”

³² Abatuminwe balile nokusanga mwenka umo Yesu abebele.

³³ Ulo balikukakula mwana punda, umwine asosele ati, “Nindo mukomukakwila?”

³⁴ Bayasukile ati, “Bashikulu ebakomufwaya.”

³⁵ Elo batwite mwana punda kuli Yesu. Epo bayanshikile ifyakufwala fyabo pamwana punda nokumuninikapo Yesu.

³⁶ Ulo Yesu alikuya ku Yelusalemu alininine pali mwana punda, abantu bayanshikile ifyakufwala fyabo mumusebo.

³⁷ Ulo apalamine ku Yelusalemu, alikutentemuka Ulupili lwa Maolife, ibumba ilikulu ilyabakusambila bakwe lyatatikile ukutota Lesa nokumutondayisha mumashiwi ayakubilikisha pafintu ifyakushimbwisha ifyo babwene.

³⁸ Basosele ati, “Lesa ashukishe Imfumu iikoyishila mwishina lyaku Bashikulu! Umutende mumulu nomuchinshi kuli Lesa Mukulu!”

³⁹ Bambi abamu Bafalisi abali mwibumba ndilya basosele kuli Yesu ati, “We musambishi, bakanyeni abakusambila bobe ukupanga ichongo!”

⁴⁰ Yesu abasukile ati, “Namweba ati, nga mba bayikala chelele, amabwe akotatika ukwaula.”

Yesu alilila umusumba wa Yelusalemu

⁴¹ Ulo Yesu apalamine apepi nomusumba wa Yelusalemu nokuubona, alililile

⁴² nokwebati, “Chilibipile ukweba ati nanduno abantu bobe tabeshibilepo ichakubaletela umutende! Nomba chafiswa ukufuma kuli we!

⁴³ Echo inshita yakukufikila ulo utupondo tobe tukakushingulusha amalinga nokukubika pakati, elo nokukuchilikila mumbali shonse.

⁴⁴ Bakwisa kutobaula umusumba nokwipaya abantu bobe. Tabayise kushapo ibwe nangu limo pamulu walinakwe, pakuba tawayishibilepo inshita iyo Lesa ayishile mukukupulusha!”

Yesu aya munanda yaku Lesa

⁴⁵ Nomba Yesu ayinjile munanda yaku Lesa. Elo atatikile ukutamfisha panse abantu abali kushitishamo.

⁴⁶ Elo asosele kuli bo ati, “Chalilembwa Mumalembo ati Lesa akoti, ‘Inanda yanji yakuba ninanda yakulombelamo.’ Nomba mwebo eyo mwasangula ukuba uluchengo lwabang’o!”

⁴⁷ Inshiku shonse Yesu alikusambisha munanda yaku Lesa. Intungulushi shabachipupila nabasambishi ba Mafunde, nabafilolo babantu, balikufwaya ukumwipaya.

⁴⁸ Nomba tabasangilepo inshila yakuchitilamo nchi pakuti abantu bonse balikumfwisha ifyo Yesu alikusosa.