Luka 18 - Chipangano Chabwangu

Ichelusho chachokolo nomupingushi umubi

¹ Yesu aebele nakambi abakusambila bakwe ichelusho ichakuti bakowamina ukulomba inshita shonse ukwambula ukunaka.

² Asosele ati, “Mumushi umo mwalipo kapingula wamilandu uuwatali kutinapo Lesa nangula ukuchinshika abantu.

³ Namuli ngulya mushi mwalipo ichokolo, ichalikwisa libili-libili kuli ye nokuti, ‘Mpinguleni nomwina-mulandu wanji!’

⁴ Kunshita iitali kapingula ngulya alikukana ukupingula. Elo panuma mumutima wakwe asosele ati, ‘Nangu ntakomutinapo Lesa nangu ukuchinshika umuntu,

⁵ pamulandu wakuti nchi chokolo chikonkatasha, nkachipingwile umulandu wachiko, chinkatasha kumukubi wachiko!’”

⁶ Bashikulu balipitilile mukusosa ati, “Mwaumfwa ifyo ngu mupingushi mubi asosele!

⁷ Nga Lesa angabapela shani umulandu abapatulika bakwe, abalilila kuli Ye akasuba nobushiku ukuti abafwe? Kanshi kuti akana shani ukubafwa?

⁸ Nkomweba nati takabapelepo umulandu, elo akuchita nchi ichakubawamina bwangu-bwangu munshila iiweme. Nomba nga ayisa Umwana wa Muntu, napo akwisa kusanga abachetekela pano chalo?”

Ichelusho cha Mufalisi nowamusonko

⁹ Nakambi Yesu asosele ichelusho kubantu abali kuyichetekela ukuti ebalungama nokusula abanabo.

¹⁰ Asosele ati, “Abalalume babili bayile munanda yaku Lesa mukulomba. Umbi ali mu Falisi umunakwe ali nikasonkesha!

¹¹ Elo umu Falisi alimakene nokulomba apaenka ati, ‘Nkomutotela mwe Lesa pakuti nshapalanapo nabantu bambi, abachenjeleka, abatalungama, abachende, nabonse bwaka, nangula kubati ningu uwamusonko.

¹² Ndayikanya ukulya libili mwi Sabata limo, ndapela ichekumi ichaku fyonse ifyo nonka!’

¹³ “Nomba uwamusonko alimakanine ukutali, tafwayilepo nokwinusha ichinso chakwe kumulu, lelo ayinamine nokupama pachifuba chakwe nokuti, ‘Mwe Lesa, nkwatilenipo inkumbu nembifi!’

¹⁴ Yesu asosele ati, ‘Nachine nkomweba ati, ngu uwamusonko abwelele kunanda yakwe uwanakililwa ukuchila umunakwe! Pakuti onse uukoyikusha akuchefekwa, kuntu uyo uwichefya akusumbukwa.’”

Yesu ashukisha abana banini

¹⁵ Abantu bambi baletele abana banini kuli Yesu ukuti abike amaboko akwe pali bo nokubashukisha. Nomba abakusambila bakwe ulo bababwene, balibakalipile.

¹⁶ Elo Yesu alitile abana nokuti, “Lekeni abana banini bese kuli nebo, mwibakanyapo, pakuti Ubufumu bwaku Lesa bwaku bo abali nga mba.

¹⁷ Nachine nkomweba ati, onse uutakopokelelapo Ubufumu bwaku Lesa ukubati akana, tayise kwinjilamo nangu panini iyowo.”

Umwalalume umusambashi

¹⁸ Intanjishi ya Bayuda imo yafumbile Yesu ati, “We musambishi uuweme, chindo ningachita ukuti nkapoke ubumi butapwa?”

¹⁹ Yesu amwasukile ati, “Nindo ukonjitila uuweme? Tapapo uuweme, sembi Lesa enka.

²⁰ Walishiba amafunde aeba ati, ‘Wilokuchitapo buchende, wilokwipaya, wilokwiba, wilokubepapo umunobe, chinshika bawiso nabanoko.’”

²¹ Umuntu ngulya alyasukile ati, “Amafunde onse nga nalisunga kale ukufuma kubwayiche bwanji.”

²² Ulo Yesu aumfwile mfi, asosele kuli ye ati, “Eko chili ichintu chimo ichikofwayikwa ukuti uchite. Koya ukashitishe ifintu fyonse ifyo wakwata. Indalama wakusangamo, ukashipele kubachula, elo wakwisa kuba nobuboni kumulu. Epo wakwisa kunkonka.”

²³ Umusambashi pakumfwa mfi, abele nechikonko ichikulu pantu ali nobuboni ubwinji ukwinekantu.

²⁴ Yesu alimuloleshe nokusosa ati, “Chaliba ichakosa kubantu abali nobuboni ukwinjila Mubufumu bwaku Lesa!

²⁵ Nachine chaliba ichayanguka ingamila ukupula mulinso lyakashinje ukuchila umusambashi ukwinjila mu Bufumu bwaku Lesa.”

²⁶ Abantu abaumfwile ifyo asosele balifumbile bati, “Nga muntu shani wakwisa kupuluka?”

²⁷ Yesu alibasukile ati, “Icho ichayafya kubantu, kuli Lesa tachafishepo.”

²⁸ Elo Petulo asosele ati, “Boneni! Fwebo twalisha imishi yesu nokumukonka.”

²⁹ Yesu alibasukile ati, “Ina, nachine nkomweba ati, takupo nangu umo uwasha inanda yakwe, nangula umukashi, nangula bawakwe, nangula abafyashi bakwe, nangula abana pamulandu wa Bufumu bwaku Lesa,

³⁰ uutakapokelelepo ifinji ukuchila muli njino nshita, nobumi butapwa munshita iikoyisa.”

Yesu asosa inshita yachitatu ifyamfwa yakwe

³¹ Yesu aitile abakusambila bakwe ikumi na babili pambali. Elo abasoseshe ati, “Boneni! Tukoya ku Yelusalemu uko fyonse fikoya kuchitika ifyalembele abasoseshi pamulandu wa Mwana wa Muntu.

³² Bakoya kumupela kubenafyalo, nabo bakoya kumusekuluka, ukumusalula nokumushipila amate.

³³ Bakumupama nokumwipaya, nomba pakasuba kakulenga shitatu akwisa kubushiwa kubafwa.”

³⁴ Nomba abakusambila tabaumfwilepo nangu chimo ichaku mfi. Ukwalula kwamashiwi nga kwalifishilwe kuli bo nakambi tabayishibilepo nefyo Yesu alikusosa.

Yesu aposha impofu

³⁵ Ulo Yesu apalamine ku Yeliko, asangile impofu imo yalikwikala mumbali yanshila nokupula-pula.

³⁶ Pakumfwa ibumba lyabantu lyalikupita, impofu yalifumbile ati, “Chindo chiliko?”

³⁷ Bamwebele ati, “Ni Yesu waku Nasaleti akopita.”

³⁸ Elo yabilikishe ati, “Yesu! We Mwana Davide! Nkwatileni inkumbu!”

³⁹ Abali kuntanshi baliyikalipile ukuti italale, kuntu impofu yalibilikishe ukwinekantu yati, “We Mwana Davide! Nkwatileni inkumbu!”

⁴⁰ Elo Yesu ayimakene nokubeba ukuti balete impofu njilya kuli Ye. Ulo yapalamine, Yesu aliyifumbile ati,

⁴¹ “Findo ukofwaya nkuchitile?” Elo yayasukile ati, “Bashikulu, nkofwaya ukubona nakambi.”

⁴² Yesu asosele ati, “Bona! Ichichetekelo chobe chakuposha.”

⁴³ Bwangu-bwangu yatatikile ukubona, elo yakonkele Yesu nokuchinshika Lesa. Ulo abantu bonse babwene mfi, balichinshikile Lesa.