Luka 17 - Chipangano Chabwangu

Ukubifya

¹ Yesu asosele kubakusambila bakwe ati, “Ifintu filenga abantu ukubifya eko fyaba, kuntu alishama uyo fishilamo!

² Nga chalinga ukumukakila ichilibwe chakupelako mumukoshi wakwe nokuposwa muli bemba, ukuchila ukulenga umo uwaku mba abanini ukubifya.

³ Kanshi chenjeleni nefyo muchita! “Kati wenu abifya, muchenjeshe, nga alapila munakilile.

⁴ Kati akubifisha imiku isano na ibili mukasuba kamo, namunshita yonse akoyisa kuli we nokusosa ati, ‘Nalapila,’ webo ulingile ukumunakilila.”

Ichichetekelo

⁵ Elo abatumwa baebele Bashikulu ati, “Tukushisheniko ichichetekelo chesu!”

⁶ Bashikulu bayasukile ati, “Nga mwakwete ichichetekelo ukubati uluseke lwamasitadi, kuti mwasosa kuli nchi chiti chakumalubeni mwati, ‘Shuluka ukayilimbe muli bemba!’ Nachine chakumumfwila.”

Umulimo wamupyungi

⁷ “Kati umo uwaku mwebo ali nomupyungi uwakulima nangula uukoembela imbelele. Ulo abwela kwibala, napo kuti mwamweba ati, ‘Endesha ukulya?’

⁸ Nachine iyowo! Muchifulo chakuchita mfi, wakusosa kuli ye ati, ‘Mpekanishishako ichakulya, fwaleni bwino ukuti unumbe, elo nakulya umulalilo wanji. Elo panuma wakulya nokunwa. Anashila ukulya, elo wakukwata ichakulya chobe.’

⁹ Napo umupyungi alatotwa nga achita icho bamweba ukuchita?

¹⁰ Epamo penka namwe, ulo mwachita fyonse ifyo mwebelwe ukuchita, soseni ukuti, ‘Tuli bapyungi bwaka. Twabomba lukoso imilimo iyo tulingile ukuchita!’”

Yesu aposha abalalume ikumi abafyona

¹¹ Ulo Yesu ali palwendo ukuya ku Yelusalemu, ayilekupita kumupaka waku Samaliya na Galili.

¹² Ulo alikuya mumishi, abalalume ikumi abalwele ifyona bayimakene apatali

¹³ nokubilikisha ati, “Mwe Bashikulu Yesu! Tukwatileni inkumbu!”

¹⁴ Yesu alibabwene nokubasosha ati, “Kamuya kuli bachipupila, bakamuchenchente bwino.” Ulo balikuya munshila, balipolele!

¹⁵ Ulo umo abwene ati apola, alibwelelepo kuli Yesu, kaya akotondayisha Lesa neshiwi ilikulu.

¹⁶ Ulo afikile, afukeme pamakasa aku Yesu nokumutotela. Ngu muntu ali mwina Samaliya.

¹⁷ Elo Yesu asosele ati, “Abantu baposhewe bali ikumi, mba bambi basano nabane balikwisa?

¹⁸ Mulandu ndo ngu umwinafyalo enka ewabwela mukutotela Lesa?”

¹⁹ Elo Yesu asosele kuli ye ati, “Ima, koya, ichichetekelo chobe chakuposha.”

Ukwisa kwa Bufumu bwaku Lesa

²⁰ Bambi Abafalisi bafumbile Yesu ati, “Ubufumu bwaku Lesa bwakwisa lwisa?” Yesu abasukile ati, “Ubufumu bwaku Lesa tabwisapo munshila yakuti bulibonekele.

²¹ Takupo uwingeba ati, ‘Boneni, tembuno!’ Nangula, ‘Mbulya mpalya!’ Pantu Ubufumu bwaku Lesa buli mukati kenu.”

²² Elo Yesu asosele kubakusambila bakwe ati, “Inshita ikoyisa iyo mwingafwaya ukubona ubushiku bwakubwela kwa Mwana wa Muntu, kuntu tamwakabubonepo.

²³ Kwakwisa kuba bamo abakusosa kuli mwebo bati, ‘Lolesheni ngulya nkulya.’ Nangula, ‘Boneni ali nkuno!’ Nomba mwiyako mukubona.

²⁴ Pakuti ukubati nimfilya akampeshi kabyata ukuchilinganya umulu ukufuma kulubali lumbi nokufika kulunakwe, efyo chakuba napakubwela kwa Mwana wa Muntu.

²⁵ Nomba pakwamba alingile achulisha nokwisa kusulwa kubantu bamuli njino nkulo.

²⁶ Nga mfilya chali nakunshita yakwa Nowa, efyo chakwisa kuba namunshiku sha Mwana wa Muntu.

²⁷ Munshiku nshilya abantu bonse balikulya nokunwa, nakambi balikuupana nokupwa, ukufikila ulo Nowa ayinjile mubwato nechama kachibepaya bonse.

²⁸ Elo chakuba kubati munshita yakwa Loti. Bonse balikulya nokunwa, ukushita nokushitisha, ukubyala nokwimaka amananda.

²⁹ Mubushiku ubo Loti afumine mu Sodomu, kwalokele amafyanga aamulilo na silubale ukufuma kumulu kubati nimfula nokubepaya bonse.

³⁰ Efyo chakwisa kuba pakasuba ulo Umwana wa Muntu akwisa kuyifisululamo.

³¹ “Pali nkalya kasuba umuntu uuli pamulu wamutenje wananda yakwe, takekilepo panshi nokwinjila munanda mukubula ifipe fyakwe. Munshila imo yenka, noyo uwali kuli mwibala, takabwelelepo munanda.

³² Ibukisheni muka Loti!

³³ Onse uwakwesha ukupulusha ubumi bwakwe, ewakubuposa. Na uyo uwakuposa ubumi bwakwe, ewakubupulusha.

³⁴ Nkomweba ati, muli mbulya bushiku kwakuba abantu babili balikulele pamo, umo akubulikwapo, umunakwe akushala.

³⁵ Nakambi kwakuba abanakashi babili balikupela pamo, umo akubulikwapo, umunakwe akushala. [

³⁶ Abalalume babili bali kulima mwibala, umo akubulikwapo, umunakwe akushala.]”

³⁷ Abakusambila balifumbile bati, “Nikwisa uko fyakuchitikila mfi, Bashikulu?” Yesu alibasukile ati, “Uko ukuli ichitumbi, eko namakubi alongana.”