Luka 14 - Chipangano Chabwangu

Yesu aposha umulwele

¹ Pakasuba kamo ake Sabata, Yesu ayile mukulya kunanda yamukulu umo wa Bafalisi. Nomba abantu balikumulolesha.

² Elo umuntu umo uwo amolu namaboko afimbile, ayishile kuli Yesu.

³ Yesu afumbile abasambishi ba Mafunde na Bafalisi ati, “Napo ifunde lyesu lyalisuminisha ukuposha pe Sabata nangula iyowo?”

⁴ Nomba bo tabasoselepo akantu. Elo Yesu abulile umuntu ngulya nokumuposha. Panuma yaku mfi, amwebele ukuti aye.

⁵ Elo Yesu asosele kuli bo ati, “Kati umo uwaku mwebo ali nomwana umwalalume nangula intungu, elo nga chakuti chimo ichaku mfi chawila muchilindi pe Sabata, napo tekuti muye bwangu penka pe Sabata nokumufumyamo?”

⁶ Nomba bo tabakwetepo chakwasuka pali nchi.

Ukuyichefya nokupokelela

⁷ Ulo Yesu abwene bambi abayitilwe balikusala ififulo ifiweme, bonse abebele ichelusho nchi.

⁸ Asosele ati, “Ulo umuntu akwita kukulya ukwapabwinga, wiyikalapo pachipuna ichamuchinshi pantu kwingaba umuntu umbi uuchindeme uwitilwe ukuchila webo.

⁹ Nomba, uumwitile bonse babili, kuti ayisa kuli webo nokukweba ati, ‘Leka ngu abule nchi chifulo.’ Epo webo wakuba nensoni pakwikala pachipuna ichitali chamuchinshi.

¹⁰ Ulo wayitwa koya ukekale pachipuna ichitali chamuchinshi. Nga uukwitile ayisa kuli webo nokusosa ati, ‘Isa nkuno, we munanji, pachifulo ichamuchinshi,’ kuti chakuletela umuchinshi pali bonse abetilwe.

¹¹ Pantu onse uuyikusha akuchefekwa, nangulya uuyichefya akuchinshikwa.”

¹² Yesu asosele kuwamwitile mukulya ati, “Ulo watebeta ifyakulya fyakasuba nangula ifyachungulo, wiyesha ukwita ifibusa fyobe, nangula bawenu, nangula abamukowa obe, nangula abena mupalamano bobe abachindama. Pakuti nabo bakwisa kukwita, namuli nji nshila wakupelelwamo fimo mufintu wabachitile.

¹³ Nomba ulo wawamisha ifyakulya, ita abachula, abafungauka imibili, efilema nempofu.

¹⁴ Elo webo wakupelwa ishuko, pakuti tabakwetepo ifyakukubwesesha. Lesa akwisa kukulambula ulo abalungama bakwisa kubuka kubafwa.”

Ichelusho chamutebeto uukulu

¹⁵ Ulo umuntu umo pali bo abali na Yesu pakulya aumfwile mfi, aebele Yesu ati, “Bakuba nokusekelela abo abakwisa kulya umutebeto Mubufumu bwaku Lesa!”

¹⁶ Elo Yesu asosele kuli ye ati, “Kwali umuntu uwawamishe ifyakulya ifinji nokwita abantu abenji.

¹⁷ Ulo yafikile inshita yamutebeto, atumine umupyungi wakwe ukuya kweba abayitilwe ati, ‘Iseni, ifintu fyonse tulipekenye!’

¹⁸ Nomba bonse batatikile ukufwaya umwakukanina. Uwakubalilapo aebele umupyungi ati, ‘Nebo elo nashita ibala, nkoya mukubona ifyo lili. Napapata banakilileko.’

¹⁹ Umbi asosele ati, ‘Nebo nashita intungu ishamakongwa asano, ndi munshila ukuya mukushesha. Napapata banakilileko.’

²⁰ Umbi naye asosele ati, ‘Nebo naupa lelo, napamulandu ngu tanshayiseko iyowo.’

²¹ “Elo ngu mupyungi alibwelele nokweba wishikulu mfi fyonse. Umwine wananda alikalipile ukwinekantu nokweba umupyungi wakwe ati, ‘Endesha, koya mumisebo namutushila tunini utwamumusumba. Wite abachula, abafungauka imibili, impofu nefilema.’

²² Ulo umupyungi abwelele, asosele ati, ‘Bashikulu, ifyo mwasosa filichitikilwe, nomba ichifulo eko chili umwakwikala nabambi.’

²³ Elo wishikulu amwebele umupyungi wakwe ati, ‘Koya mumisebo iyalola mumisumba namutushila tunini, ubakakatishe abantu ukuti bese benjile munanda ukuti yiwule.

²⁴ Nkomweba ati, pabantu mbalya abakene ubwite tapakabepo nangu umo uwakwisa kulyako imitebeto yanji iyachungulo!’”

Ichilambu chingapelwa mukuba uwakusambila

²⁵ Ulo amabumba abantu alikuya pamo na Yesu, alyalukile nokuti kuli bo,

²⁶ “Onse uwakwisa kuli nebo tekuti abe uwakusambila wanji, kuntu antemwe ukuchila bawishi nabanyina, abakashi nabana bakwe, bawakwe nabankashi shakwe, nangula ubumi bwakwe.

²⁷ Onse uutapintapo umutashi wakwe nokunkonka talingile ukubapo uwakusambila wanji.

²⁸ Nga umo uwaku mwebo akopekanya ukwimaka ichiteba, pakubala alekala nokupenda indalama alinokuposapo pakuti abone kati alikwete indalama shakushilisha umulimo.

²⁹ Atachitile mfi, ye tekuti abepo nefiso fyakupwa ukwimaka ichiteba panuma yakwimba umufulwa. Bonse abakubona mfi bakwisa kumusekuluka.

³⁰ Elo abantu bakusosa ati, ‘Ngu muntu atatikile ukwimaka, kuntu afilwa ukupwisha ngu mulimo!’

³¹ Nimfumu ndo iyishibile ukuti umulwani wayiko akofwaya ukulwisha ichalo chakwe alikwete abashilikali amakana amakumi abili, utangekala bwangu panshi nokulanguluka kati abashilikali bakwe abali amakana ikumi nga kuti balwa nokuchimfya imfumu inakwe iikoyisa?

³² Kati tayikoselepo, ikotuma intumi ukuya kukumanya njilya yinakwe ulo yena ichili apatali ukuti basoshanye ifyamutende.

³³ Yesu ashilishe nokuti, ‘Munshila imo yenka, takupo nangu umo uwingaba uwakusambila wanji, kuntu nga asha fyonse ifyo aakwata.’”

Umuchele uukubulukile

³⁴ “Umuchele uuweme, kati umuchele wakubuluka, mba ukoyisa kulowa nendo?

³⁵ Taulingilepo ukubika mwibala nangula pamufundo, kuntu ukoposwa bwaka. Uyo uukwete amatwi aakumfwa, omfwe!”