Luka 13 - Chipangano Chabwangu

Fuma kumabifyo obe nangula ukufwa

¹ Pali njilya nshita, abantu bambi baebele Yesu ifyabena Galili, abo Pilato ayipeye nokusankanya umulopa wabo pafipupo ifyo balikupela kuli Lesa.

² Yesu abasukile ati, “Pamulandu wakuti abena Galili babepayile muli nji nshila, napo mwebo mukolanguluka ukuti mba bantu bali nimbifi ukuchila abena Galili bonse?

³ Iyowo! Nakambi nkomweba nati, kati tamukolekapo ukuchita ububi, bonse mwakwisa kufwa kubati nimulya bafwilile.

⁴ Mba balya bantu ikumi na basano na batatu abamu Siloamu abafwile ulo ichiteba chabawilile? Napo mwebo mukolanguluka ukuti mba bali ababi ukuchila abantu bonse abali mu Yelusalemu?

⁵ Iyowo! Nomba nga tamwalapilepo, mwakwisa kufwa kubati nimulya bafwilile.”

Ichelusho chamukunyu uutatwalapo ifitwalo

⁶ Epo Yesu abebele nchi chelusho ati, “Kwalipo umuntu uwali nechiti chamukunyu ichalikukula mwibala lyampesha. Bumbi bushiku, alile mukufwayako ifitwalo, kuntu tafisangileko.

⁷ Elo asosele kumulimi webala ati, ‘Bona mumyaka itatu nji yapita ndesa mukufwayako ifitwalo fyamakunyu, kuntu nshisangako nangu amo. Chiteme! Mba nindo chikolila bwaka umushili?’

⁸ Nomba umulimi ayasukile ati, ‘Bashikulu, chilekeni nguno wenka umwaka, nakwimba mumbali nokubikamo umufundo.

⁹ Kati chakutwala umwaka ukoyisa, chiweme, kuntu kati tachakatwalepo, elo mwakwisa kuchitema!’”

Yesu aposha umwanakashi ichilema pe Sabata

¹⁰ Pakasuba kamo ke Sabata, Yesu alikusambisha munanda yakulombelamo Lesa.

¹¹ Mulya mwali umwanakashi uwali nomupashi uubi uwamulengele ukuti abe umulwele imyaka ikumi na isano na itatu. Echo alikonkomene umusana, talikololokapo.

¹² Ulo Yesu amubwene, alimwitile. Elo amwebele ati, “We mwanakashi, wakakulwa kubulwele bobe!”

¹³ Abikile amaboko akwe pali ye, bwangu-bwangu alyololokele, epo atatikile nokutota Lesa.

¹⁴ Nomba umukulu uwamunanda iyo alikalipile pantu Yesu aposeshe umuntu pe Sabata. Epo asosele kubantu ati, “Kwaba inshiku shisano nabumo isho tulingile ukupyunga, iseni muli nshilya nshiku mukuposheka, kuntu pe Sabata tepopo!”

¹⁵ Elo Bashikulu balimwasukile ati, “Mwe bakutumpayika! Kanshi mukati kenu tekuti mukakulepo ing’ombe yenu nangula punda wenu mwichinka nokuyitwala mukunwa amenshi pakasuba ke Sabata?

¹⁶ Nomba ngu wamulupwa lwakwa Abulahamu uwo Satana asunga imyaka ikumi na isano na itatu, kanshi tekuti akakulwepo pakasuba ke Sabata?”

¹⁷ Ukwasuka kwaku Yesu kwalengele utupondo twakwe ukuba nensoni, kuntu abantu bonse balisekelele pafintu fyonse ifyakushimbwisha ifyo achitile.

Ichelusho chaluseke lwa Masitadi

¹⁸ Yesu afumbile ati, “Mba bufumu bwakumulu bwapalana nendo? Nikundo ningabulinganyako?

¹⁹ Bwaba kubati kaluseke kamasitadi akanini ako umuntu abulile nokukabyala mwibala. Kalikulile nokuba kubati chiti ichikulu, nefyuni fyalishile nokupikamo ifinsa mumisambo yachiko.”

Ichelusho chamimena

²⁰ Nakambi Yesu alifumbile ati, “Nikundo ningabupalanyako Ubufumu bwaku Lesa?

²¹ Ningabupalanyako nemimena iyo umwanakashi ayabikile muli bansako batatu, nokufuba umufuba ukufikila onse watutumuka.”

Umulyango uunini

²² Yesu apitile mumisumba namumishi, alikusambisha ulo ali mulwendo lwakuya ku Yelusalemu.

²³ Umuntu umo alimufumbile ati, “Mwe Mfumu, kanshi bantu banini bakupuluka?” Yesu alibasukile ati,

²⁴ “Esheni ukwinjila pamulyango uuche, pakuba mukasuba kakumupwilo abantu abenji bakafwaya ukwinjila, nomba bakwisa kufilwa.

²⁵ Umwine wananda akwisa kwimakana nokwisalako kumulyango, ulo mwebo mwakwimakana kunse nokutatika ukukonkonsha kuchibi nokweba ati, ‘Twiswileniko we Mfumu!’ Ye akwisa kumwasuka ati, ‘Tanshishibilepo noko mwafuma!’

²⁶ Elo namwe mwakwasuka mwati, ‘Twalile nokunwa nenu, mwasambishe namumusumba wesu!’

²⁷ Nomba akusosa nakambi ati, ‘Tanshishibilepo noko mwafuma mwebo. Fumeni mpa mwe bachita ububi!’

²⁸ Echo kukaba ukulila nokukwesanya ameno ulo mwakubona Abulahamu, Isake, Yakobe na basoseshi bonse mu Bufumu bwaku Lesa, ulo mwebo mwakuposwa panse!

²⁹ Abantu bakufuma konse kumutule-suba nakumboshi, kukapinda kamulyo nakuchipiko, bakwisa kwikala pamo mukulya umutebeto mu Bufumu bwaku Lesa ubutapwa.

³⁰ Epo abali abapanuma ebakuba abapantanshi, nabo abali pantanshi ebakuba abapanuma.”

Yesu atemwesha umushi wa Yelusalemu

³¹ Penka pali njilya nshita, bamo abamuba Falisi bayishile kuli Yesu nokuti kuli Ye, “Ukowamina ukufuma mpano, pantu Helodi akofwaya ukukwipaya.”

³² Yesu alibasukile ati, “Kamuya mukamwebe uyo mumbwe ati, ‘Nebo nkofumya imipashi iibi mubantu nokubaposha muli nkano kasuba namayilo, elo pakasuba akakulenga shitatu eko nakushilishamo umulimo wanji.’

³³ Nomba nebo ningile ukuba palwendo lelo, mayilo, nobushiku bwakonkapo. Nachine tachawamapo ukuti umusoseshi epayilwe kumbi, kuntu mu Yelusalemu mwenka.

³⁴ “Yelusalemu, Yelusalemu! We wipaya abasoseshi nokulasa amabwe abatumwa baku Lesa! Ilinji line nafwayile ukulonganya abana bobe nga mfilya nyina-nkoko afukatila utwana mumapindo akwe, kuntu webo walikene!

³⁵ Bona, inanda yaku Lesa yenu, yakuba ichibolya. Nachine nkomweba ati, tamwakambonepo nakambi iyowo, ukufikila mukasuba mwakwisa kusosa ati, ‘Alishuka uyo uukoyisa mwishina lyaku Bashikulu.’”