Luka 12 - Chipangano Chabwangu

Ukuchenjesha kwakuli bo abakutumpayika

¹ Munshita njilya, ulo amakana namakana yabantu balongene pamo ichakwebati balikunyantana, Yesu abalile ukusosa kubakusambila bakwe ati, “Chenjeleni nemimena ya Bafalisi abakutumpayika.

² Pakuti chonse ichafimbwapo chakwisa kufimbulwa, nakambi chonse ichafisama chakwisa kufisululwa.

³ Elo nomba, chonse icho mwakusosela mumfinshi chakwisa kumfwika apabuta, nakambi namfilya musosela mutuntepe-ntepe mukati kananda, fyakumfwikila mukasuba-kutuba.

Uwo tuli nokutina

⁴ “Nkomweba mwe fibusa fyanji ati, mwitinapo bo abepaya umubili bwaka kuntu panuma takupo chimbi icho bengachitapo.

⁵ Nomba nkomulanga uwo mulingile ukutina. Tineni Lesa pantu Ye panuma yakwipaya umubili ali nefiso fyakumuposa mumulilo utashima. Ina, Eye mulingile ukutina.

⁶ “Napo ututiti tusano tatushitwapo amakobili abili? Nomba takupo nangu kamo akalabukilwa na Lesa.

⁷ Nachine nangu imishishi yamumutwi wenu yonse yalipendwa. Kanshi mwitinapo iyowo, pakuba mwebo mwalichindama ukuchila patutiti utwinji.

Ukusumina nokukana Yesu

⁸ “Elo nkomweba nati, uyo onse uwansumina pamenso abantu, Umwana wa Muntu naye akwisa kumusumina pamenso abangelo baku Lesa.

⁹ Nomba onse uwakunkana pamenso abantu, Umwana wa Muntu naye akwisa kumukana pamenso abangelo baku Lesa.

¹⁰ “Elo umuntu uwakwebaula Umwana wa Muntu kuti anakililwa, nomba onse uwakwebaula Umupashi Wabuta, takanakililwepo iyowo.

¹¹ “Ulo bakumutwala mumananda yabo ayakulombelamo Lesa mukumulubulusha nangula kumafumu, nangula bakateka, mwilokusakamanapo umwakuya mukusosela pakuyichinjililako.

¹² Pantu Umupashi Wabuta wakumusambisha pali njo nshita ifyo muli nokusosa.”

Ichelusho chamusambashi uupuneme

¹³ Umuntu umo uwali mwibumba asosele kuli Yesu ati, “We musambishi, ebeni wesu ukuti aangabanyeko ububoni ubo bata batushila.”

¹⁴ Yesu amwasukile ati, “We munanji, mba ninani uwampela ubupingushi, nangula ifiso ifyakwabanya ububoni bwenu babili?”

¹⁵ Epo Yesu alipitilile ukusosa kuli bonse ati, “Chenjeleni, elo muyitalamushe kufyalunkumbwa fyonse, pantu ubumi bwamuntu tabusangwapo mufintu akwata, nangu abe nobuboni ubwinji.”

¹⁶ Elo Yesu abebele nchi chelusho ati, “Kwalipo umusambashi uwali nebala umo afumishe ifyakulya ifiweme ifinji.

¹⁷ Abalile ukuyilangulukila umwine ati, ‘Nshikwetepo kumbi uko ningatutila ifilyo fyanji. Nakuchita shani?

¹⁸ Mfi efyo ndinokuchita. Nakutobolola amatala anji nokwimaka ambi ayakulu, emo nakututila ifilyo fyanji fyonse nafimbi ifyuma fyanji.

¹⁹ Elo nakuyisosha nati, Nalishuka! Nalikwata ifintu ifinji ifiweme ifingafwayikwa kuli nebo mumyaka iyinji. Ati ubune kuli ne! Nomba nakuyilemena, nakulya, nakunwa nakambi nakusekelela!’

²⁰ Nomba Lesa asosele kuli ye ati, ‘Wechipuba webo! Muli bwenka mbuno bushiku ubumi bobe bwashila. Mba ninani wakwisa kubula ifintu fyobe fyonse ifyo wayisungila?’”

²¹ Epo Yesu ashilishe nchi chelusho ati, “Efyo chaba kubantu abayilonganishisha ububoni, kuntu tebasambashi kuli Lesa.”

Chetekela muli Lesa

²² Nakambi Yesu asosele kubakusambila bakwe ati, “Mulokusakamanapo pabumi bwenu mwati, ‘Nindo tukolyapo,’ nangula pamubili wenu mwati, ‘Nindo tukofwalapo?’

²³ Napo ubumi twabwachilapo pafyakulya, nangula umubili tawachindamapo pafyakufwala.

²⁴ Boneni bachankole, tabaminsapo nangula ukulobolola, tabakwatapo mwakusungila nangula amatala, kuntu Lesa eubalisha! Kanshi mwebo tamwayishibapo ukuti Lesa alimutemwesha ukuchila pafyuni!

²⁵ Mba ninani uwamuli mwe mukusakamana kwakwe engalundapo nangu akasuba kamo kubumi bwakwe?

²⁶ Kati tamungeshibapo ukuchita akantu akanini, mba nindo mwingasakamikwa nefintu fimbi?

²⁷ Findo mukosakamanina nefintu fimbi? Boneni amaluba aamumpanga ifyo akula! Yo taabombapo nangula ukupikula insalu shakufwala iyowo. Nachine, nangu imfumu Solomoni uwali nobuboni ubwinji, tafwelepo ifiweme kubati limo ilyamumaluba nga.

²⁸ Nomba nga Lesa alafwika mfi amaluba amumpanga aaliko lelo mailo aposwa mumulilo, napo mwebo tekuti amufwikepo ukwinenene? Mwe bachichetekelo ichinini!

²⁹ “Kanshi mwilokusakamanapo inshita shonse, ifyo mwakulya nakambi nefyo mwakunwa. (

³⁰ Fyonse mfi efyo abantu abatayishibapo Lesa babikapo imitima yabo.) Nomba mwe mwishibe ukwebati Bawishinwe bakumulu balishiba ati fyonse mfi mulafikabila.

³¹ Echo baleni mufwaye ubufumu bwakwe, elo fyonse mfi fyakupelwa kuli mwe.

Ububoni mumulu

³² “We kabumba kanini kambelele, witina pantu ba Nshinwe balasekelela pakumupela ubu bufumu.

³³ Shitisheni fyonse ifyo mwakwata nokupela indalama kubachula. Muyiwamishe mwebene ifikwama ifitasapuka, nakambi musungile ichuma chenu kumulu uko tachingachepa, pantu umung’o tekuti afikeko nefinamumpapila nafyo tekuti bufyonaule.

³⁴ Pakuti ukuli ububoni bobe ekuba nomutima obe.

Abamilimo abayibukila

³⁵ “Mube abayibukila muli fyonse ifyakumwishila. Mufwalile kukulwa nokusanika inyali shenu lonse

³⁶ kubati abamilimo abakolindila shikulu wabo ukubwela ukufuma kukulya kwabwinga. Ulo ayisa nokukonkosha, bakomwiswila mukwangufyanya.

³⁷ Mba bapyungi bakuba nokusekelela ulo shikulu wabo akwisa kubasanga bakololela nokuyiteyanya ulo abwela! Nachine nkomweba ati, akwisa ukufulako ikoti lyakwe lyamuchinshi nokubekalika ukuti abatebete.

³⁸ Mba bapyungi bakuba nokusekelela ulo shikulu wabo akwisa kubasanga abayiteyanya, nangu kati ayishile pakati kabushiku nangu kumacha.

³⁹ Elo ibukileni ukuti umwine wananda nga ayishibile inshita umung’o engeshilapo, nga tekuti amuleke enjile munanda nokwiba.

⁴⁰ Echo namwe, mulokwipekenye pakuti panshita mutebukilepo epo Umwana wa Muntu akwishilapo.”

Uwamilimo wachetekelwa noutachetekelwa

⁴¹ Elo Petulo asosele ati, “Bashikulu, kanshi nifwebo fwenka mukososela nchi chelusho, nangula nikubantu bonse?”

⁴² Bashikulu balimwasukile ati, “Kanshi, ninani uwingaba uwakuchetekela nowamano? Ningulya uwo wishikulu akusonta ukuba umukulu pali bonse, mukuba uwakupela ifyakulya kubamilimo bonse panshita yalinga.

⁴³ Ngu mupyungi akuba uwakusekela kati wishikulu akumusanga akochita mfi ulo akubwelela kunanda!

⁴⁴ Nachine nkomweba ati, wishikulu wakungulya mupyungi akwisa kumusonta ukuba umukulu wapafyuma fyakwe fyonse.

⁴⁵ Nomba kati akueba ati, Bashikulu bakukokola ukubwela, nga atatika ukupuma abapyungi banakwe, abalalume nabanakashi, atatika ukulya, ukunwa nokukolwa.

⁴⁶ Shikulu wamupyungi ngulya akufika mukasuba atamwibukile napanshita ateshibilepo. Nachine shikulu wakwe akumufumyamo nokumubika muchifulo chimo nabatachetekela.

⁴⁷ “Umupyungi ngulya uwayishiba ifyo shikulu wakwe afwaya ukuti achite, kuntu umwine enka tayiteyanya ukuchita ifyo wishikulu afwaya, bakwisa kumupela umulandu nokumupama ifikoti.

⁴⁸ Nomba umupyungi uuteshibapo ifyo wishikulu afwaya, kuntu alachita ifintu fimbi ifilingile ukuti apumwe ifikoti, bakwisa kumupela umulandu nokumupuma ifikoti panini. Uuli onse uwapokelela alingile ukubwesha ifinji, elo ngulya uwapelwa ukusunga naye alingile ukubwesha ifinji ukuchilapo.

Yesu alenga abantu ukulekana

⁴⁹ “Nalisa mukukosha umulilo muno chalo. Nomba nalikufwayisha ukuti ngu mulilo ulokwakile kale!

⁵⁰ Ndi nokupokelela ulubatisho lyabuchushi. Echo ndi nechikonko ukufikila apo nchi chakupita!

⁵¹ Napo mukopashanya mwati nayisa mukuleta umutende muno chalo? Iyowo, temutendepo, kuntu ukulekanya.

⁵² Ukufuma nduno, mulupwa lumo umuli basano bakwisa kulekana. Batatu bakubukila babili, nakambi babili bakubukila mbalya batatu.

⁵³ Banshibo bakubukila abana babo balalume, abana balalume nabo bakubukila banshibo. Banyinabo bakubukila abana babo banakashi, abana banakashi nabo bakubukila banyinabo, banafyala bakwisa kubukila abako babo, abemikashi nabo bakwisa kubukila banafyalabo.”

Ukwishiba inshita

⁵⁴ Yesu asosele nakambi kubantu ati, “Ulo mubona ikumbi likofuma kumbonshi, bwangu-bwangu musosa ati, imfula ikoyisa mukuloka, nakachine ilaloka.

⁵⁵ Elo amwaumfwa umwela wakukapindami ukopupa, mweba mwati lelo kukokaba, nachine kulakaba.

⁵⁶ Mwe bakutumpayika mwe! Kuti mwalolesha pachalo nakumulu nokubona ifyo fikoaluka, findo ifyo mutangeshibilapo ifyanjino nshita?

Ukumfwana nowamulandu wobe

⁵⁷ “Nindo mutayipingwila mwebene pakuchita ichintu ichiweme?

⁵⁸ Mulingile ukumfwana bwangu-bwangu nomwine mulandu obe ulo muchili mukoya nakwe mukulubulula. Epali akutwala kuli kapingula wamilundu, naye akupela muminwe yakwa kapokola. Kapokola naye akuposa muchifungo.

⁵⁹ Nkokweba ukuti tawakafumemo bwaka ukufikila ukushilishe ukufuta umulandu obe nakekobili akakulekeleshako.”