Luka 11 - Chipangano Chabwangu

Yesu asambisha ukulomba

¹ Ubushiku bumo Yesu alimukulomba muchifulo chimo. Ulo ashilile, umo uwabakusambila bakwe aebele Yesu ati, “Bashikulu, tusambisheniko ukulomba kubati nimfilya Yohane asambishe abakusambila bakwe.”

² Yesu asosele kuli bo ati, “Ulo mukolomba, mulokusosa ati, ‘Bata, ishina lyenu lichinshikwe, Ubufumu bwenu bwise.

³ Mutupele lelo ichakulya chesu ichanshiku shonse,

⁴ Mutunakilileko amabifyo esu, ukubati nimfilya tunakilila bonse abatubifisha. Mwitulekelesha mukwesheka!’”

⁵ Nakambi Yesu asosele kubakusambila bakwe ati, “Kati umo uwaku mwebo aya kunanda yakuchibusa wakwe pakati kabushiku nokuti kuli ye, ‘Nkongolako imifuba itatu.

⁶ Chibusa wanji uuli palwendo afika bwangu kunanda yanji, tanshikwetepo chakumupela!’

⁷ Napo uuli mukati kananda nga alyasukile ati, ‘Winsunsha! Pakuti ndiseleko. Elo nebo nabana banji tulilele akale. Tekuti mbuke nokukupela ifyo ukolomba.’

⁸ Chiweme, mukotipo shani? Nangu kati takoyisa kubuka nokukupela webo imifuba pakuti nichibusa obe, wakubuka nokukupela fyonse ifyo akofwaya pantu tauli nansoni shakutwalilila ukumulomba.

⁹ “Echo nkomweba ati, lombeni, elo mwakupelwa. Fwayeni, elo mwakusanga, konkonsheni, elo mwakwiswilwa.

¹⁰ Pakuti onse uulomba alapelwa, uufwaya alasanga, nangulya uukonkonsha aleswilwa.

¹¹ Napo ninani pali mwebo ulo umwana wakwe amulomba inswi angamupa insoka?

¹² Nangu nga amulomba ilini, elo amupela akamini?

¹³ Nomba nga mwebo mwe babi mfi mwalishiba ukopela abana benu ifiweme, mba Bawishinwe aba mumulu kuti bafilwa shani kupela Umupashi Wabuta kuli bo abakomulomba!”

Yesu na Belesebule

¹⁴ Yesu alikufumya umupashi uubi mumuntu uwali chibulu. Ulo umupashi ngulya wafuminemo, umuntu atatikile ukusosa. Echo namabumba abantu alishimbilwe ukwinekantu.

¹⁵ Nomba bambi abamwibumba baebele ati, “Ni Belesebule, umukulu wa mipashi iibi, ewamupela Yesu ifiso fyakutamfishako ifibanda.”

¹⁶ Bambi bafwayile umwakwikatilamo Yesu, kanshi bafumbile Yesu ukuti achitepo ichafiso ifikulu ichakulanga ukuti afuma kuli Lesa.

¹⁷ Nomba Yesu alishibile ifyo balikulanguluka, elo asosele kuli bo ati, “Ichalo chonse ichabanika mumabumba nokutatika ukulwa abene benka tachikokolapo. Ulupwa ulwabukilana lulapatukana.

¹⁸ Echo ubufumu bwakwa Satana bwayimina, kuti bwakokola shani? Mwebo mwanjeba ati ntamfya imipashi iibi pantu Belesebule, imfumu yamipashi iibi, eumpela ifiso fyakuchita mfi.

¹⁹ Kati ntamfya mipashi iibi nefiso fyaku Belesebule, mba abakusambila benu bafitamfya nefiso fyaku nani? Abakusambila benu balishininkisha ukuti mwaliluba!

²⁰ Iyowo, nimunshila yafiso fyaku Lesa emo ntamfishamo imipashi iibi. Nku ekushininkisha ukuti Ubufumu bwaku Lesa bulifikile pali mwe.

²¹ “Kati umuntu uwafiso, uuli nefyakulwila akochingilila inanda yakwe, ekwebati ifintu fyakwe filichingililwe bwino.

²² Nomba umuntu uwamuchilapo ifiso nga ayisa kumulwisha nokumuchimfya, kuti apinta ifyanso fyonse mfilya abikamo umutima alumbako nabantu bakwe ifyo ebile.

²³ “Umuntu uutasuminishanyapo nandibo mulwani wanji, noutangafwako ukulonganya, alasalanganya.

Ukubwela kwamupashi uubi

²⁴ “Ulo umupashi uubi wafuma mumuntu, uya ulo wendauka kumulundu ukofwaya ichifulo chakutushishapo. Nga tausangilepo ichifulo, ulayisosha uwine wenka ati, ‘Nkobwelela kunanda yanji uko nafumine.’

²⁵ Ulo wabwelela, wasanga tamupo ichilimo, muliweme nokusungwa bwino.

²⁶ Elo ulafuma nokuya kuleta imipashi inakwe isano na ibili iibipile ukuchila wo. Elo ikoyisa kwinjila nokwikalamo. Kumupwilo, ngulya muntu aba uubipile ukuchila ifyo ali pakwamba.”

Ishuko linenene ifyo lyaba

²⁷ Ulo Yesu asosele nchi, umwanakashi umo uwali mwibumba asosele kuli Ye ati, “Alishuka umwanakashi uwakufyele nokukonsha!”

²⁸ Nomba Yesu alimwasukile ati, “Ina, ukuchilapo abashuka nimbalya abakoumfwa amashiwi aku Lesa nokuasunga!”

Ukufwaya ichafiso ifikulu

²⁹ Ulo abantu balongene nokumushinguluka, Yesu abebele ati, “Amba banjino nkulo babipile! Bafwaya ukubona ifyafiso ifikulu. Nomba tabakafibonepo, sembi ichachitikile kuli Yona musoseshi.

³⁰ Munshila yenka iyo Yona abelelelemo ichishibilo chabantu baku Ninive, efyo no Mwana wa Muntu akuba ichishibilo chabantu abanomba.

³¹ Pakasuba kakupingulwa, nyina-mfumu waku Sheba akwisa kwimakana nokumupela umulandu, pantu afumine kumpela yachalo ukwisa mukumfwa ukusambisha ukwamulangwe kumfumu Solomoni. Nomba nkomweba nati, epo ali mpano uuchilile Solomoni.

³² Pakasuba kakupingulwa abantu baku Ninive bakwisa kumupela umulandu pakuti balilekele ukuchita ifibi ulo baumfwile ukusambisha kwakwa Yona. Nomba nkomweba nati, epo ali mpano uuchilile Yona!

Inyali yamubili

³³ “Takupo umuntu uusanika inyali nokuyifisa nangula ukwifunikapo imbale, kuntu akoyibika pachakwikatila chayiko ukuti bonse abakoyinjilamo babone ukusanika kwayiko.

³⁴ Amenso enu enyali yamubili wenu. Nga amenso enu alibwino, nomubili wenu wakuwama. Nga amenso enu taali bwino, nomubili onse wakuba mumfinshi.

³⁵ Chenjeleni ukuti ukusanika ukuli muli mwebo kwibamo imfinshi.

³⁶ Kati umubili obe uliwilemo ukusanika, takupo ichili mumfinshi, wakuba bwaka mukusanika. Wakuba ati ninyali ikolanga umubili obe ulo ikosanika pali webo.”

Yesu akalipila Abafalisi na basambishi ba Mafunde

³⁷ Ulo Yesu ashilile ukusosa, Umufalisi umo alimwitile mukulya kunanda yakwe. Yesu ayile nokwinjila munanda ukuti balye.

³⁸ Umufalisi umo alishimbilwe pakubona Yesu tasambilepo kuminwe pakulya.

³⁹ Elo Yesu asosele ku Mufalisi ngulya ati, “Mwebo mwe Bafalisi, musamfya kunse yankombo nembale, nomba mukati kenu mwayiula bwaka ubuchenjeshi nobusali.

⁴⁰ Mwe fipuba mwe! Napo Lesa uwabumbile ichakunse teyepo enka uwabumbile nechamukati?

⁴¹ Nomba peleni ifili munkombo namumbale kubachula, epo nefintu fyonse fyakuba ifiweme kuli mwe.

⁴² “Ishamo kuli mwebo, mwe Bafalisi! Mupela kuli Lesa ichekumi afyamumabala yamusalu, ifilinga minte, luwe nafimbi ifyamusalu, kuntu mulasula ubulungami nokutemwa kwaku Lesa. Mfi efyo mulingile ukuchita ukwambula ukusulapo fimbi.

⁴³ “Ishamo kuli mwebo, mwe Bafalisi! Mwatemwa ifipuna fyakuntanshi munanda yakulombelamo Lesa, nokupelwa umutende uwamuchinshi mufifulo fyamakwebo.

⁴⁴ Ishamo kuli mwe! Mwebo muli kubati nimanda ishitabikwapo ifishibilo, isho abantu bendapo ukwambula ukwishiba.”

⁴⁵ Umusambishi wa Mafunde umo asosele ati, “We musambishi, pakusosa mfi watusalula nafwebo.”

⁴⁶ Elo Yesu alyasukile ati, “Ishamo kuli mwebo, mwe basambishi ba Mafunde! Mutwika abantu ifipe pamabeya ifyalema ukupinta, kuntu mwebo tamwimyapo nakanantengelesha mukwafwilishako ukupinta mfi fipe.

⁴⁷ Ishamo kuli mwebo, mwe mwimaka imanda ishelele, ishabasoseshi abo ifikolwe fyenu fyayipeye.

⁴⁸ Ekwebati mwebo mukosuminisha nokushininkisha ifyachitile ifikolwe fyenu, fyayipeye abasoseshi elo mwebo mulemaka inshinshi shabo?

⁴⁹ Pali ngu mulandu, Lesa mumulangwe wakwe, asosele ati, ‘Nkoyisa kubatumina abasoseshi nabatumwa bambi bakubepaya, elo bambi nabo bakubachusha.’

⁵⁰ Echo abantu bamuli njino nshita bakwisa kupelwa umulandu pamulandu wabasoseshi bonse mwayipeye, ukufuma kukutatika kwachalo.

⁵¹ Ukutula apo bayipayile Abeli ukufika kuli Sekaliya, uwo bayipeya pakati kachipupililo chananda yaku Lesa iyapatulika. Nkomweba nati, abantu bamuli njino nkulo bakwisa kupelwa umulandu pali mfi fyonse!

⁵² “Ishamo kuli mwebo, mwe basambishi ba Mafunde! Mwalifisa imfungulo yananda yamano. Mwe bene tamwakenjilemo nakambi, kuntu mulakanya nabafwaya ukwinjilamo!”

⁵³ Ulo Yesu afumine pali nchilya chifulo, abasambishi ba Mafunde na Bafalisi batatikile ukumulengulula ukwinekantu nokufumba amafumbo pafintu ifinji.

⁵⁴ Balikufwaya inshila yakumwikatilamo kati Ye akusosapo ichintu ichitalungeme.