Loma 9 - Chipangano Chabwangu

Lesa nabantu bakwe

¹ Nkososa ifyakwebesha muli Klistu, tanshikobepapo iyowo. Nomutima wanji ukotangililwa no Mupashi Wabuta ukonsuminisha nebo ati nshisosapo bufi

² ulo ndabila ati ndi nechikonko ukwinekantu. Ndomfwa ukufinya umutima pamulandu uwa Bayuda bananji.

³ Ukuba nga chali ichiweme ichakuti nebo bandapisha bwaka kuli Lesa ukuti nimba uwaku Klistu muchifulo ichabamukowa wanji.

⁴ Mba Baisilaeli abo Lesa asalile ukuba abana bakwe nokubapela ubuleme. Lesa achitile ichipangano nabo. Elo alibapele Amafunde akwe. Alibasambishe ifyo balingile ukumulomba. Nakambi alibapela nefilayano.

⁵ Mba bafuma kufikolwe ifyayishibikwa ifya Bayuda. Elo Uwasubwa uyo alayile wamutundu wabo, ukusosa pafyabuntu bwakwe. Lesa uutungulula ifintu fyonse atondayishiwe lonse.

⁶ Tanshikososapo ati Lesa tasungapo ichilayo chakwe iyowo. Pakuti te bonsepo abafyalilwa mumukowa wa Isilaeli ababa Abaisilaeli benenene iyowo.

⁷ Nakambi te bonsepo abamuchikolwe chakwa Abulahamu ababa abana baku Lesa. Pakuti Lesa alayile Abulahamu ati, “Abana ba Isake bakwitwa abana bakwa Abulahamu.”

⁸ Ekwebati te bonse abana bakwa Abulahamu ababa bana baku Lesa. Abana bakwe abenenene nimbalya abafyalwa ukulingana nechilayo chaku Lesa.

⁹ Pakuti ichilayo chaku Lesa chalisoselwe muli nga mashiwi ayakuti, “Panshita iilingile njino kumwaka uukoyisa, nakubwela. Elo Sala akwisa kuba nomwana.”

¹⁰ Nomba te nchi chenka iyowo. Ichikolwe chesu Isake na Labeka bafyele abana babili.

¹¹ Nangu ulo bampundu mba tabalafyalwa, ekwebati tabalachitapo ichiweme nangu ichibi ichili chonse, Lesa apekenye ukuti ukusalwa kwamwayiche kufikilishiwe.

¹² Ukusala nku takwachitikilepo pamulandu wamilimo iyo bachitile iyowo, kuntu efyo Lesa afwayile. Lesa aebele Labeka ati, “Umukulu akupyungila umwayiche.”

¹³ Pakuti Amalembo asosa ati, “Natemenwe Yakobe, kuntu Esau nalimupatile.”

¹⁴ Nomba twingasosa shani? Napo Lesa tabapo mulungeme mukuchita mfi? Iyowo, nangu panini!

¹⁵ Pakuti asosele kuli Mosesi ati, “Nakwisa kuba nechisa pamuntu uyo nafwaya ukubela ichisa, elo nakwisa kuba nenkumbu, pamuntu uyo nafwaya ukubela inkumbu.”

¹⁶ Epo nomba ichikulu tepo nchilya muntu afwaya nangu ifyo afwaya ukuchita, kuntu nimuchisa chaku Lesa epela.

¹⁷ Echo Amalembo alabila kuli Falo, imfumu yaku Ijipiti ati, “Nalikubika pabufumu pamulandu wakuti mboneshe ifiso fyanji, nokuti ishina lyanji lishibikwe mpanga yonse.

¹⁸ Epo nomba, Lesa alakwatila ichisa pali uyo afwaya, nakambi alakosha imitima yabantu abo afwaya ukuti babe mfilya.”

Ubukali bwaku Lesa nechisa

¹⁹ Elo bamo bangafumba ati, “Mba Lesa kuti asanga shani umulandu wabubi mumuntu? Nga ninani uwingakanya Lesa ukuchita icho afwaya?”

²⁰ Mba webo, umuntu bwaka, niwe nani ukuti ulokuchita ifikansa na Lesa? Napo inongo kuti yasosa kuwayibumbile ati, “Mba mulandu ndo wamumbile mfi?”

²¹ Napo uubumba inongo takwetepo ifiso ifyakubumba ukufuma kwibumba limo ilyeloba inongo shibili: imo iiweme, elo nayimbi iyabwaka?

²² Emfi Lesa achita. Nangu afwayile ukubachusha mubukali bwakwe nokubalanga ifiso fyakwe kuntu abakwatile inkumbu. Akwete ukushipikisha pali bo abali nokumfwa ubukali bwakwe.

²³ Elo nakambi afwayile ukubonesha ubuleme bwakwe ubukulu kuli fwebo abo akwatile ichisa nokutupekanishisha limo mbu bulume.

²⁴ Nifwe abo Lesa ayitile, tekufumapo ku Bayuda benka iyowo, kuntu nakubenafyalo.

²⁵ Mfi efyo Lesa asosa mwibuku lyakwa Hoseya, “Abantu abo abatali banji, nakubeta abantu banji. Umutundu uyo napatile, nakuwita ‘Abatemwekwa banji.’

²⁶ Elo mufifulo umo baebelwe ati, ‘Tamuli abantu banji,’ emo bakwitwa ‘Abantu baku Lesa uwabumi.’”

²⁷ Naye Esaya alishininkisha ulo asosele ati, “Nangu Abaisilaeli benji ukwinekantu kubati musenga uwamululamba lwaku bemba, kuntu abakwisa kupuluka banini bwaka.

²⁸ Pakuti Bashikulu bakupingula ichalo bwangu-bwangu. Elo bakuchita mfi ukwambula ukuposa inshita nokufikapo.”

²⁹ Chili ukubati nimfilya Esaya asosele ati, “Nga chakuti Lesa tatushilepo abana, nafwebo nga twalishilile kubati ni Sodomu, nga twalishilile kubati ni Gomola.”

Paulo alombela abena Isilaeli

³⁰ Nomba findo twakusosa? Abenafyalo tabalikufwayilisha ubulungami bwaku Lesa, kuntu Lesa alibabona nga abalungama ukupitila mukuchetekela kwabo.

³¹ Nomba Abaisilaeli mbalya abalikufwaya kulungamikwa ukupitila mu Mafunde balifililwe.

³² Mba nipamulandu ndo? Nipamulandu wakwebati tabashintililepo pachichetekelo, kuntu pamilimo yabo. Echo bayitutwile kulibwe ilyo abantu bayitutwilako.

³³ Elo Amalembo asosa ati, “Boneni nebo nkobika libwe mu Siyoni, ilyo abantu bakuyitutwilako, ilibwe ilyakulenga abantu ukuwa. Nomba uyo uwakuchetekela muli Ye, takesepo kuba nensoni iyowo.”