Loma 8 - Chipangano Chabwangu

Ubumi mu Mupashi Wabuta

¹ Nomba kuli bo abachetekela muli Klistu Yesu takupo umulandu.

² Pakuti ifunde lya Mupashi Wabuta ilitupela ubumi muli Klistu Yesu, lyankakula kwifunde ilyabubi nemfwa.

³ Ifyo ifunde lyafililwe ukuchita, pamulandu wakunaka ukwabuntunse, Lesa alichitile nchi ulo atumine Umwana wakwe, uwali nomubili kubati ningu wabuntunse ukwebati achimfye ububi.

⁴ Lesa achitile mfi ukuti ubulungami ubo ubukososwa na Amafunde akwa Mosesi, buboneke muli fwe. Echo tatwendapo kubati bantunse abatemwa ifyapanonshi, kuntu twatungululwa no Mupashi Wabuta.

⁵ Abantunse bafwaya ifyapanonshi, kuntu abo abatungululwa no Mupashi Wabuta babika imitima yabo pali mfilya ififwaya Umupashi.

⁶ Ukubika umutima pafintu fyapanonshi nimfwa, kuntu ukubika umutima kufyo Umupashi Wabuta ufwaya chilaleta ubumi nomutende.

⁷ Echo ababika imitima yabo pafintu ifyapanonshi fipondo fyaku Lesa. Tabanakilapo Ifunde lyaku Lesa. Nachine tekuti banakilepo.

⁸ Echo abantunse tekuti basekeshepo Lesa iyowo.

⁹ Nomba mwebo tamwikalapo kubati bantunse pakuti mulatungululwa no Mupashi waku Lesa, kati Umupashi ngu uli muli mwebo ichine-chine. Elo umuntu onse uutakwatapo Umupashi waku Klistu talipo mwina Klistu.

¹⁰ Nga Klistu aba muli mwebo, nangu imibili yenu yalifwa pamulandu wabubi, kuntu Umupashi bumi kuli mwe pakuti Lesa alimulungamikile.

¹¹ Kati Umupashi waku Lesa, uyo uwabushishe Yesu ukufuma kubafwa aba muli mwebo, ekwebati Lesa uwabushishe Klistu Yesu ukufuma kubafwa akwisa kubusha imibili yesu iifwa ukupitila Mumupashi wakwe uwaba muli mwe.

¹² Epo nomba, mwe bawesu, tulikwete umulimo, kuntu tewakusekesha imibili yabuntunse yesu iyowo.

¹³ Nga mwayikala mukusekesha ifyabuntunse bwenu, mwakwisa kufwa. Nomba mukutungululwa no Mupashi Wabuta mwasha ukufwaya ifyabuntunse, mwakuba nobumi.

¹⁴ Abo bonse abatungululwa no Mupashi Wabuta bana baku Lesa.

¹⁵ Umupashi Wabuta uwo mwapokelele taumulengapo ukuti mube abasha nakambi iyowo, kuntu ukuba abana. Nakambi eulenga ukuti tulokulomba ati, “Abba, Bata.”

¹⁶ Umupashi waku Lesa ulasuminishanya pamo nemitima yesu ulo ikoti tuli bana baku Lesa.

¹⁷ Pakuti nomba tuli baku Lesa, twakupokelela ishuko, ina, ishuko ilifuma kuli Lesa. Kati tukochula pakuti tuli abena Klistu, twakupokelela umuchinshi pamo na Ye.

Ubuleme twakupoka kuntanshi

¹⁸ Ukuchula uko tukopitamo nkano kashita tekuti tukulinganyepo nobuleme ubo Lesa akutufisulwila.

¹⁹ Ifyo fyonse Lesa alengele fikolindila ukwinekantu ulo Ye akufisulula abana bakwe.

²⁰ Echo ifyalengelwe fyonse fyasangilwe nomulandu, tekufwayapo kwafiko iyowo, kuntu nipamulandu waku ngulya uwafwayile ukuti fibe mfi. Elo kwali ukuchetekela,

²¹ ukwebati ifibumbwa mfi akasuba kamo, fyakulubulwa kubusha ubwakubola, fyakupokelela ubuleme bwabwanalale kubati bana baku Lesa.

²² Tulishibile ukuti ukufikila nanduno ichibumbwa chonse chilomfwa ukufinya kubati kwamufyashi nakupapa.

²³ Te fibumbwapo fyenka ifikochula mfi, kuntu nafwebo abakwata Umupashi Wabuta wabafye chabupe ichakubalapo ichaku Lesa, tulomfwa ukufinya muli fwe ukwinekantu. Inshita yonse tukolindila ukuti Lesa atupulushe nokutupokelela nga abana bakwe.

²⁴ Pakuti muchichetekelo emo twapulushiwa. Nomba nga twachibona namenso icho tukolindila, mba chindo icho twakulindilila nakambi?

²⁵ Elo nga tukolindila icho tatulabonapo tulingile ukulindila nomutima-tenka.

²⁶ Munshila imo yenka, Umupashi Wabuta ulatwafwako. Tuli abanaka, tatwishibilepo ifyo tulingile ukulomba. Echo Umupashi Wabuta ulatulombela kuli Lesa ifyo amashiwi tangasosapo.

²⁷ Epo Lesa uwayishiba ifyamumitima yesu, alishiba kale ifyo malangulushi aya Mupashi aba, pakuti Umupashi Wabuta eupapatilako abantu kuli Lesa umo afwayila.

²⁸ Twalishiba ukuti mufintu fyonse Lesa alafitungulula ubune kuli bo abamutemwa, abo ayita ukulingana nokufwaya kwakwe.

²⁹ Abo Lesa ayishibile kale alibasalile ukuti babe nga Umwana wakwe, pakuti ye akuba ibeli lyamuli bawabo abenji.

³⁰ Echo abo Lesa asalile ebo ayitile. Elo abo ayitile, akubalungamika. Nakambi abo alungamika, ebo aakene umuchinshi.

Ukutemwa kwaku Lesa muli Yesu Klistu

³¹ Muli mfi fyonse, mba findo twingasosapo? Nga Lesa ali nafwebo, mba ninani uwakutubukila?

³² Lesa alitupele Umwana wakwe umwine. Elo alimupele pamulandu wesu! Nomba kuti afilwa shani ukutupela ifintu fyonse pamo na Ye?

³³ Mba ninani uwingapela umulandu kubasalwa baku Lesa? Lesa umwine alibalungamikile.

³⁴ Mba ninani wakubalengulula? Tefyopo Klistu uwafwile, ina, tusose ukuti uyo babushishe. Engulya umumi uli kukuboko ukwamulyo kwaku Lesa akotupapatilako.

³⁵ Mba ninani uwakutulekanya mukutemwa kwaku Klistu? Napo fyakutuchusha nangula ifyabwafya, nalimo amachushi nangula insala, ububusu nangula ifitinya, nangula imfwa?

³⁶ Amalembo Apatulika asosa ati, “Pamulandu waku mwebo, bakopinga ukutwipaya inshiku shonse. Bakotubona kubati nimbelele isho bakotwala mukwipaya.”

³⁷ Muli mfi fyonse twaliba abachimfya pamulandu waku Klistu uwachitemweko chaku Lesa.

³⁸ Pakuba nalishininkisha ukwebati takupo nangu chimo ichakutulekanya kuchitemweko chaku Lesa. Nangu imfwa, nangu ubumi, nangu abangelo, nangu intungulushi, nangu ifintu ifiliko nangu ifyakwisa kuboneka, nangu ifyafiso ifili shani,

³⁹ nangu ichalo chamumulu nangu ichapanonshi, nangu ichabumbwa ichili chonse. Takupo ichintu nangu chimo ichakutulekanya kuchitemwiko chaku Lesa icho tukwete muli Klistu Yesu Imfumu yesu.