Loma 7 - Chipangano Chabwangu

Ukulondolola ifyachupo

¹ Mwe bawesu, nkososa kuli mwebo abayishiba Amafunde. Mulishibile bwino-bwino ukuti Amafunde asosa kuli bo abachili nobumi.

² Echo umwanakashi uwaupwa alikakwa nefunde lyachupo ulo umulume wakwe achili nobumi. Nomba nga umulume wakwe afwa, alakakuka kwifunde ndi.

³ Echo nga umwanakashi aya mukwikala nomwalalume umbi ulo umulume wakwe achili nobumi, bakumwita ati muchende. Nomba nga umulume wakwe afwa, ukulingana nefunde, ngu nomba akakulwa, talipo muchende nga aupwa kumwalalume umbi.

⁴ Munshila imo yenka, mwe bawesu, namwebo mwalifwa ukulingana nefunde nokuba ifiputulwa ifyamubili uwaku Klistu uyo uwabushiwe ukufuma kumfwa. Echo tupyungile Lesa imilimo iiweme.

⁵ Ulo twalikukonka ubumi bwabuntunse, ifibi fyakoseleshiwe na Mafunde nokukula muli fwe. Elo fyalifyala imfwa.

⁶ Nomba twalikakuka kwifunde ndi. Ina, twalifwile kwifunde ilyatukakile. Nomba Umupashi Wabuta ulatwafwa ukupyungila Lesa munshila iyabwangu, tenshilapo iyakale iyakulama bwaka ifunde ilyalembwa.

Ifunde nobubi

⁷ Nomba chindo twakusosa? Napo ifunde bubi? Nangu panini! Nomba ifunde elyanenga nebo ukwishiba ububi. Pakuti nga tanshayishibilepo ububi bwamufimbila nga ifunde talyasosele ati, “Wilokukumbwapo.”

⁸ Pamulandu waku ndi ifunde ububi bwalisangile ishuko lyakwimya muli nebo umufimbila. Nga takupo ifunde ekwebati takupo nobubi.

⁹ Akale nebo nali uwabumi ubwabwaka. Nomba ulo ifunde lyayishile, elo ububi bwatilimukile.

¹⁰ Epo nebo nalifwile. Elo ifunde ilyali ilyakuleta ubumi, kuli nebo lyaletele imfwa.

¹¹ Echo ububi bwasangile ishuko kwifunde, epo ukupitila mwifunde bwalimbepele nokunjipaya.

¹² Ifunde ilili lonse lyaba ilyabuta, ilyalungama elo nakambi iliweme.

¹³ Napo nchi chikoyalula ukuti chandetele imfwa? Iyowo, nangu panini! Ububi ebwanjipeye mukubomfya ichintu nchi ukuti ububi buboneke ifyo bwaba. Echo mwifunde ububi bulabipisha ukwinekantu.

Ifilwana mumuntu

¹⁴ Twalishiba ukuti Ifunde lyafintu ifyamupashi. Nomba nebo ndi muntu bwaka, umusha wabubi.

¹⁵ Tanshayishibapo ifyo nchita. Pakuti tanshichitapo ifyo mfwaya ukuchita, kuntu ifyo napata efyo nchita.

¹⁶ Apo nshifwaya ukuchita ifyo nchita, ekwebati ifunde lyaba ilyalungama.

¹⁷ Echo tenepo nchita ifyo nchita, kuntu ububi ubwaba muli ne.

¹⁸ Pakuti nalishiba ukwebati tamupo ichiweme mubuntunse bwanji iyowo. Pakuba nangu nkofwaya ukuchita ifilungeme, epela ndafilwa ukufichita.

¹⁹ Ifiweme ifyo mfwaya ukuchita, nshifichitapo. Nomba ifibi ifyo nshikofwayapo ukufichita, efyo nchita.

²⁰ Nga nebo nkochita ifyo nshikofwayapo ukuchita, ekwebati tenepo nchita mfi iyowo, kuntu ububi ubwaba muli ne.

²¹ Epo nasanga ukuti ichikochitika chakuti ulo mfwaya ukuchita ifintu ifiweme, elo ifibi fili pali ne.

²² Nebo naliba nokusekelela mwifunde lyaku Lesa.

²³ Nomba ndabona ifunde lipyunga mumubili wanji ililwisha ifunde lyaku Lesa ilyo nasuminamo. Ifunde limbi ndi likonka inshila yabubi. Engu uulenga ukuti mbe umusha wabubi.

²⁴ Nebo naba umuntu uwachikonko! Mba ninani uwakumpulusha kubwikashi mbu ubukontwala kumfwa?

²⁵ Ukutotela kube kuli Lesa muli Yesu Klistu Shikulu wesu! Elo chaba mfi: nebo nkofwaya ukukonka Ifunde lyaku Lesa nomutima onse, kuntu nomubili wanji nkofwaya ukukonka inshila yabubi.