Loma 6 - Chipangano Chabwangu

Ifyakuba nobumi muli Klistu

¹ Mba findo twakusosa nomba? Napo twakutwalilila ukubifya ukuti ubwanshi bwaku Lesa bufulileko?

² Nangu panini! Fwebo twalifwa kukubifya, mba nindo twingekalilila mukuchita ububi?

³ Napo tamwishibilepo ukuti fwe bonse twabele umo na Yesu Klistu ulo twabatishiwe? Mulubatisho ndu twabele umo namumfwa.

⁴ Echo mulubatisho lwesu, twashikilwe pamo na Ye nokuba mumfwa yakwe ukwebati kubati nimfilya Bata bamubushishe kubafwa nefiso fyabo, elo nafwe tube nobumi bwabwangu.

⁵ Nga mfilya twaba umo na Klistu mumfwa yakwe, munshila imo yenka twakuba umo mukubushiwa kubafwa kubati nimulya bamubushishe.

⁶ Twalishiba ati akabelo kesu akakale kashilile ulo Yesu asamikilwe pamutashi, ukuti ubwikalo bwesu ubwabubi bonayikwe, elo twiba nakambi abasha babubi.

⁷ Pakuba umuntu nga afwa akakulwa kufiso fyakubifya.

⁸ Pakuti twalifwa na Klistu, tukochetekela ukwebati twakwisa kuba nobumi nakambi pamo nakwe.

⁹ Pakuba twalishiba ukuti Klistu balimubusha ukufuma kubafwa, elo tayise kufwa nakambi. Imfwa tayakakwatepo fiso nakambi pali Ye.

¹⁰ Epo imfwa iyo afwile yaali yakulekana nobubi, elo afwile umuku umo bwaka. Nomba ubumi ubo akwete bwakwipela kuli Lesa.

¹¹ Munshila imo yenka mulingile ukuyilangulukila mwenka ukuti mwalifwa kububi, kuntu muli ababumi kuli Lesa muli Bashikulu Yesu Klistu.

¹² Pamulandu ngu mwileka ububi ukuti butungulule mibili yenu iyo yakwisa kufwa nakambi mwinakilila kukufwaya kwamibili yenu.

¹³ Mwilokubomfya ichilewa chenu chimo ichamubili wenu kububi, kuntu mwipele kuli Lesa nga bantu bafuma kumfwa nokuya kubumi. Mubomfye ifilewa fyamibili yenu mukubombela Lesa imilimo yabulungami.

¹⁴ Ukufuma nomba ububi tabukwetepo ifiso pali mwebo pantu ichikotanjilila ubumi bwenu tepo amafunde iyowo, kuntu bwanshi ubukulu bwaku Lesa.

¹⁵ Mba findo nomba? Napo tutwalilile ukubifya pantu tatukotungululwapo na Mafunde kuntu ubwanshi bwaku Lesa? Nangu panini!

¹⁶ Mwalishiba ukuti nga mwayipela ubusha kumuntu umbi nokumumfwila, penkapo mwaba abasha bamuntu ngulya mukoumfwila. Nga mwaba abasha babubi, mwakwisa kufwa. Nomba nga nimwebo abasha baku Bashikulu, mwakulungamikwa.

¹⁷ Akale mwali abasha babubi, kuntu tutondayishe Bashikulu ukuti nomba mulokumfwila nomutima onse ifyachine ifyakupulusha ifyo mwapokelele.

¹⁸ Nomba mwalikakulwa kububi, elo muli basha abasekesha Lesa.

¹⁹ Nimupela ichelusho nchi ichabusha icho mwayishiba ukuti mumfwikishe. Akale mwayipele mwenka ukuba abasha bwafikowesha nobubi bonse. Mushila imo yenka, mwipele nomba ukupyungila Lesa mukuchita ifiweme ifilanga ukuyipelesha kuli Ye.

²⁰ Ulo mwali abasha ababubi, tamwalokuchitapo ifyalungama.

²¹ Mba findo mwasangilemo mukuchita ifintu ifyamwansha insoni nomba? Nachine icho mwalikusangamo nimfwa.

²² Nomba mwalilubulwa kububi, echo kamupyungila Lesa, nechilambu chenu bumi ubwakwipelesha kuli Ye. Elo kumupwilo mwakupoka ubumi butapwa.

²³ Pakuti amalipilo abubi, nimfwa kuntu ichabupe chaku Lesa bumi butapwa muli Bashikulu Yesu Klistu.