Loma 5 - Chipangano Chabwangu

Ifyo Lesa alungamika abantu

¹ Nomba pakuti Lesa atulungamika ukupitila muchichetekelo, tuli nomutende na Lesa muli Bashikulu Yesu Klistu.

² Bashikulu Yesu Klistu ebatwiswile inshila yakuti ukupitila muchichetekelo Lesa aatupele ubwanshi ubo tuli nabo nomba. Echo tulesansamuka pakwishiba ati twakuba nobuleme bwaku Lesa.

³ Nakambi tulasansamuka mukuchula pakuti twalishiba ati nku kulete ukushipikisha.

⁴ Nakushipikisha kuleta ubwikashi bufwaya Lesa. Nambu bwikashi ebutupela ukulindila.

⁵ Ukulindila nako kulatukoselesha pantu twalishiba ukuti Lesa aatutemwa ukwinekantu ukupitila mu Mupashi Wabuta uwo atupela.

⁶ Ulo tatwakwete uwakutwafwa, panshita yalinga, Yesu alitufwilile fwe mbifi.

⁷ Chikosele ukwebati umuntu umbi afwile uwachumfwila. Nangula pambi kuti chachitika umo ukufwila umuntu uuweme.

⁸ Nomba Lesa alitulanga ifyo atutemwa ichakuti ulo twali mbifi Klistu atufwilile.

⁹ Mfi twishibile ati tuli abalungama ukupitila mumfwa yakwe, nachine Klistu akwisa tupulusha kubukali bwaku Lesa.

¹⁰ Fwebo twali utupondo utwaku Lesa, kuntu atulengele ifibusa fyakwe pamulandu wamfwa ya Mwana wakwe. Nomba ifi atulengele buchibusa na Lesa, twapulushiwa nobumi bwaku Klistu!

¹¹ Te mfi fyenkapo iyowo, kuntu tukosansamuka muli Lesa pamulandu waku Bashikulu Yesu Klistu, abatulengele ifibusa na Lesa.

Adamu na Klistu

¹² Ukubifya kwayishile ukupitila mumuntu umo, nokubifya nku kwaletele imfwa. Elo nomba, imfwa yaambukile kubantu bonse pantu bonse balibifya.

¹³ Nachine ukubifya kwali muchalo ulo Amafunde tayalapelwa. Nomba apatali Amafunde, ukubifya takupendwapo.

¹⁴ Ukufuma pali Adamu nokufikila pali Mosesi, abantu balikufwa, nambalya abatabifishepo kubati nimfilya Adamu abifishe, uyo uutalaminepo Ifunde lyaku Lesa. Adamu ali chinshingwa chaku ngulya uwali nokwisa panuma.

¹⁵ Nomba ichabupe chaku Lesa tachalinganapo nobubi bwakwe Adamu. Abantu bonse balafwa pamulandu wakubifya kwamuntu umo, kuntu ubwanshi bwaku Lesa nobupe bwakwe fikulu ukuchilapo pantu filaletela ishuko kubantu bonse. Ichabupe icho Lesa apele ni Yesu Klistu.

¹⁶ Echo paliba ubupusano pakati kabupe bwaku Lesa nokubifya kwamuntu ngulya. Echo ulo muntu abifishe muku umo, Lesa amupingwile uwabifya. Nomba panuma yamabifyo ayenji kwayisa ichabupe chaku Lesa ichakubona abantu nga abalungama.

¹⁷ Pamulandu wakubifya kwamuntu umo ngulya, abantu bonse balafwa. Mba chakuba shani nduno, ulo achitile ifintu ifikulu umuntu umo ngulya, Yesu Klistu? Pakuba onse uwakupokelela ukushukisha kwaku Lesa, elo nechabupe chabulungami bwakwe, akuba nobumi butapwa ukupitila muli Yesu Klistu.

¹⁸ Nomba kubati nimfilya ukubifya kwamuntu umo kwaletele imilandu kubantu bonse, munshila imo yenka, ubulungami bwamuntu umo bwaletele ukunakililwa amabifyo nokupelwa ubumi.

¹⁹ Elo kubati nimfilya umuntu umo taumfwile nokuleta ububi pabantu bonse, emo nokufwa kwamuntu umo kwalenga ukuti abantu bonse bapokelelwe nga abalungama.

²⁰ Amafunde aletelwe ukuti abantu beshibe ubwinji bwabubi bwabo. Ulo ukubifya kwafulile, ubwanshi bwaku Lesa nabo bwalifulile ukuchilapo.

²¹ Kubati nimfilya ububi bwaletele imfwa pano chalo, munshila imo yenka ubwanshi bwachimfishe ukupitila mubulungami, nokuleta ubumi butapwa kubantu bonse ukupitila muli Bashikulu Yesu Klistu.