Loma 4 - Chipangano Chabwangu

Ichakubwenapo ichaku Abulahamu

¹ Mba findo twakusosa nefyakwa Abulahamu, ichokolwe chesu fwe Bayuda? Mba findo ena asambilile munjikalo yakwe?

² Kati Ye Lesa amulungamika pafintu ifyo achitile, kuti akwata ukuyitakisha, kuntu tepachinso chaku Lesa.

³ Nga Amalembo Apatulika findo akososa? Akoti, “Abulahamu achetekele Lesa, elo pamulandu wachichetekelo chakwe, Lesa alimupokelele nga uwalungama.”

⁴ Emukuti umuntu onse uubomba alalipilwa. Amalipilo nga tayalipo ubupe bwaka iyowo. Echo afwile ukupelwa pamulandu wakupyunga kwakwe.

⁵ Kati umuntu achetekela bwaka mushila yakuyitakisha mumilimo yakwe, Lesa uubona imbifi ukuba abakaele pamulandu wachichetekelo chakwe.

⁶ Enchilya Davide alikulabila ulo asosele ukushuka kwabantu abo Lesa abona nga abalungama ukwambula imilimo iyakuti Ye abalangulukileko.

⁷ Asosele ati, “Balishuka abanakililwa amabifyo abo, abo ububi bwabo bwafutwapo!

⁸ Alishuka umuntu uyo uwo Bashikulu tabakese kwibusha amabifyo akwe!”

⁹ Napo ishuko ndi lyaba kubashilimunwa benka nangula lyaba nakubatashilimunwa? Iyowo, lyaba nakubatashilimunwapo. Kubati nimfilya Amalembo Apatulika akososa ayo tusoselepo kale akoti, “Abulahamu achetekele Lesa. Elo pamulandu wachichetekelo chakwe, Lesa alimupokelele nga uwalungama.”

¹⁰ Nilisa nchi chachitikilwe? Napo ulo talashilimunwa nangula panuma yakushilimunwa? Chachitikile ulo talashilimunwa.

¹¹ Abulahamu alishilimunwa panuma ukuti chibe ichishibilo ichakulanga ukuti Lesa amubwene uwalungama pakuchetekela kwakwe. Nomba Abulahamu ewishibo bonse abachetekela Lesa, na Lesa alabapokelela nga abalungama nangula tabashilimunwapo.

¹² Nakambi ewishibo wabashilimunwa. Tekushilimunwapo kwenka, kuntu abenda munshila iyakuchetekela iyali nabata Abulahamu ulo tabalashilimunwa. Ichilayo chaku Lesa chipokelelwa muchichetekelo.

¹³ Ulo Lesa alayile Abulahamu nabana bakwe ukuti chalo chonse chakuba chabo, chalichitikilwe. Nomba tepamulandu wakweba ati Abulahamu asungile Amafunde. Nipamulandu wakuti achetekele Lesa, elo amulungamikile.

¹⁴ Kati icho Lesa alaya chalikupokelelwa kuli bo benka abalama Amafunde, kanshi ukuchetekela takukoyalulapo kantu nakambi nechilayo chaku Lesa chabwaka.

¹⁵ Amafunde aleta ubukali bwaku Lesa, kuntu uko ukutali Amafunde takupo ukutomfwila Amafunde.

¹⁶ Echo ubulayo bwayimakene pachichetekelo ukwebati ubulayo mbu bushininkishiwe ukuba ubupe bwaku Lesa kubana bonse abakwa Abulahamu. Te kuli mbalya benka abalama Amafunde akwa Mosesi iyowo, kuntu nabo abachetekela kubati nimfilya Abulahamu achetekele. Pakuti Abulahamu echikolwe chesu tonse.

¹⁷ Nga mfilya Amalembo Apatulika asosa ati, “Nakulengele webo ukuba wishibo wamitundu yonse.” Ichilayo nchi Abulahamu achipokelele ukufuma kuli Lesa uyo achetekele. Engu Lesa uupela ubumi kubafwa, uwita ifitalabako nokufipela ubumi.

¹⁸ Lesa asosele ati, “Abana bobe bakuba abenji.” Elo Abulahamu achetekele nangula chalikuboneka kubati tachayise kuchitika. Ye alikulolela nokuchetekela ukuti akuba ichikolwe chamitundu iyinji.

¹⁹ Ali apepi ukuba nemyaka umwanda, nomba tanenwikepo mukuchetekela ulo alikulanguluka ifyapamubili wakwe, uyo uwali kubati ulifwile kale. Nangula ichakwebati Sala ali ning’umba.

²⁰ Nangu chali mfi, ichichetekelo chakwe tachabwelele kunuma. Nomba alikuchetekela ichilayo chaku Lesa nefiso fyakwe. Nakambi ali kumutondayisha.

²¹ Achetekele ukwinekantu ukuti Lesa akuchita fyonse alayile.

²² Echo Abulahamu, ukupitila muchichetekelo, Lesa, “Amubwene nga mulungami.”

²³ Amashiwi akuti, “Amubwene nga mulungami” taalembelwepo Abulahamu enka.

²⁴ Akososa napali fwebo akotubona nga abalungama pamulandu wakuchetekela Lesa uwabushishe Bashikulu Yesu kubafwa.

²⁵ Yesu ngu bamwipeye pamulandu wafibi fyesu. Elo bamubushishe kubafwa ukuti Lesa atubone nga abalungami.