Loma 3 - Chipangano Chabwangu

Ifyakulungama kwaku Lesa

¹ Napo Abayuda balichilapo pabenafyalo? Nangula mukushilimunwa, chinshi twingabwenamo?

² Nachine finji tungasangamo mukuba Abayuda. Pakutatika Lesa apele ubutumi bwakwe kuli bo.

³ Nga chakuti bambi muli bo tabachetekelwa? Napo nchi chikoyalula ukwebati Lesa naye aba uutachetekelwa?

⁴ Nangu panini! Nomba abantu beshibe ukuti Lesa asosa ifyachine nangu abantu bonse babufi. Chili kubati nimfilya Amalembo asosa ati, “Ulingile ukuba wachine mukusosa kobe, nokuchimfya ulo bakokulubulwisha muchilye.”

⁵ Findo ifyakuchitikapo kati ububi bwesu bulanga ukuti Lesa aba uwalungama? Napo twingasosa ati Lesa taba bwino ulo atupela umulandu? (Nkososa nchi mukabelo kabuntu.)

⁶ Tefyopo. Nga muli Lesa tamwabapo bulungami, mba kuti apingula shani ichalo?

⁷ Umo kuti asosa ati, “Nga ubufi bwanji bukolanga ichine chaku Lesa nokumuletela ubuleme, mba nindo bakompingula nga imbifi?”

⁸ Napo kuti twachita ifibi ukuti ifisuma fiboneke? Nachine eko bali abantu bambi abatubepesha ukuti fwebo tusosa mfi. Mba bakupingulwa ukwinekantu.

Takupo umulungami

⁹ Mba nindo twakusosa? Napo fwe Bayuda twalichila abenafyalo? Iyowo! Ndisosele kale ati Abayuda nabenafyalo bonse nimbifi.

¹⁰ Ukubati nimfilya Amalembo Apatulika asosa ati, “Takupo umuntu nangu umo uwalungama,

¹¹ takupo uwamulangwe, nangula ulomba Lesa.

¹² Bonse bafutatila Lesa, bonse nabaluba, takupo nangu umo uuchita ifiweme iyowo.

¹³ Pamilomo yabo pali kubati nimanda iyachenama, nendimi shabo shayiula bwaka ubufi. Ishiwi ilili lonse basosa, lyaba kubati bulembe bwansoka.

¹⁴ Mukusosa kwabo mwayiula bwaka ukulapisha.

¹⁵ Balyanguka mukuchena namukwipaya,

¹⁶ basha ifibolya nokuchita ubonaushi konse uko baya.

¹⁷ Tabeshibililepo ukwikala umutende,

¹⁸ tabakwetepo nakatina kuli Lesa.”

¹⁹ Nomba tulishibile ukuti fyonse ifisosa Amafunde fisosa kuli bo abatungululwa na Mafunde pakuti bekwatapo akabepesho. Elo Lesa akubapingula bwino.

²⁰ Pakuti Lesa tabonapo umuntu nga uwalungama ukupitila mukuchita ifyo Amafunde. Icho Amafunde achita kulanga umuntu ukuti eshibe ati nabifya.

Umo Lesa alungamikila abantu

²¹ Nomba Lesa atufisulwila inshila iyo alungamikilamo abantu. Tayikwetepo akantu nefyakulama Amafunde iyowo nangu Amafunde akwa Mosesi nabasoseshi filayachitila bukamboni.

²² Abantu balalungamikwa na Lesa mukuchetekela Yesu Klistu. Lesa alachita mfi kuli bonse abachetekela muli Klistu. Takupo akapatulula iyowo.

²³ Pakuti bonse balibifya, elo bali ukutali nomuchinshi waku Lesa.

²⁴ Nomba mubwanshi bwakwe ubuli bupe bwaka, alalungamika abantu bonse ukupitila muli Yesu Klistu uwatupulwishe.

²⁵ Lesa amupele ngu ukuti mumfwa yakwe abe nshila yakunakila amabifyo yabantu bonse abamuchetekela. Nchi chilanga ukulungama kwaku Lesa. Akale Lesa alikuteka umutima nokuleka amabifyo abantu.

²⁶ Nomba achitile mfi ukubonesha ifyo ali, nabantu ukuti beshibe ati mulungami. Elo ni Ye uulungamika nambalya abachetekela muli Yesu.

²⁷ Chindo nomba twingayitakishishapo? Tapapo. Nipamulandu ndo? Napo nipakuti tukolama Amafunde? Iyowo, pakuti ichikulu kuli Lesa tenchito muntu achita, kuntu kuchetekela bwaka.

²⁸ Umuntu alalungamikwa na Lesa ukupitila mukuchetekela, te kulamapo Amafunde iyowo.

²⁹ Napo Lesa wa Bayuda benka? Te wabenafyalo nabo? Ina, wabenafyalo nabo.

³⁰ Chiweme, nomba kuli Lesa umo, uulungamika Abayuda pamulandu wachichetekelo chabo, nabenafyalo munshila imo yenka.

³¹ Napo chikoyalula ukwebati tulisulile Amafunde pamulandu wachichetekelo? Nangu panini. Ukuchilapo tulayakoselesha.