Loma 2 - Chipangano Chabwangu

Ubupingushi bwaku Lesa bwamulinganya

¹ Webo we upingula bambi, nangu chibe ati niwe nani, taukwetepo akabepesho. Pakuba ulo upingula abanobe, ulayipingula wemwine wenka, pakuti nawe ulachita fimo fyenka.

² Twalishiba ukuti Lesa alalungika ulo apingula abantu abachita mfi fintu.

³ Nomba we munanji ukopingula abantu bambi abachita mfi ulo nawe efyo uchita, napo ukolanguluka ukuti wakwisa kupuluka kubupingushi bwaku Lesa?

⁴ Napo ulasula inkumbu ishikulu ishaku Lesa, ukushipikisha nomutembo wakwe? Napo tawishipo ukuti Lesa alikukwatila inkumbu ukwebati ulapile?

⁵ Nomba webo waba nomutima uukosele too, uutapilibukapo. Echo ukoyilundulwilako ubukali bwaku Lesa ubo akwisa kulanga pali nkalya kasuba mukupingula kwakwe ukwalungama.

⁶ Pakuba Lesa akwisa kupela ichilambu kumuntu ukulingana nemilimo achitile.

⁷ Abantu bonse abachinchila mukuchita ifiweme nokufwaya ubuleme, umuchinshi nobumi, Lesa akubapa ubumi butashila.

⁸ Nomba bonse abafitala, abatomfwilapo nokuchita ifitalungama, Lesa akubapela umulandu mubukali bwakwe.

⁹ Amachushi nokufinya fyakwisa pali bonse abachita ifibi, ukwambila ku Bayuda, elo nakubenafyalo.

¹⁰ Nomba Lesa akupela ubukata, umuchinshi nomutende kuli bonse abachita ifiweme, ukwambila ku Bayuda elo nakubenafyalo.

¹¹ Pakuba Lesa takwatapo akapatulula.

¹² Abenafyalo ababifya ukwambula ukwishiba Amafunde akwa Mosesi, balabifya, elo balalufiwa nangu bateshibilepo nga Mafunde. Elo bonse ababifya ulo beshibile Amafunde, balabifya, elo bakupingulwa ku Mafunde nga enka.

¹³ Pakuti Lesa tabonapo abantu nga balungama pakumfwa Amafunde iyowo, kuntu nimukuchita ifyo Amafunde afwaya.

¹⁴ Abenafyalo tabakwetepo Amafunde, kuntu ulo bachita benka ifisosa Amafunde balabwenesha ukuti bali namafunde mumitima yabo, nangula tabakwetepo amafunde akwa Mosesi.

¹⁵ Imichitile yabo ilanga ukuti ifyo Amafunde afwaya fyalilembwa mumitima yabo. Kampingu wabo nawo ulashininkisha ukuti chakwebesha. Pakuba namalangulushi abo limo-limo alabashinina, elo limo-limo alabachingilila.

¹⁶ Echo nomba, ukulingana no Butumi Bwawama ubo mbilisha, mfi efyo chakwisa kuba muli nkalya kasuba ulo Lesa, ukupitila muli Yesu Klistu, akwisa kupingula ifyamubumfishi fyonse ifyaba mumitima yabo.

Ifya Bayuda na Mafunde

¹⁷ Webo, we uyita ukuti uli mu Yuda, ulashintilila pa Mafunde nokwitakisha muli Lesa.

¹⁸ Walishiba ifyo Lesa afwaya ukuti ulokuchita, nakambi walisambilila mu Mafunde ukusala ichilungeme nechibi.

¹⁹ Walishininkisha wemwine ukuti uli ntungulushi yampofu nokusanika kuli bo abali mumfinshi,

²⁰ umusambishi wabapuneme nabatayishiba. Ulashininkisha ukwebati Mumafunde ulasangamo umulangwe nokusambisha kwachine.

²¹ Nomba webo uusambisha bambi, nindo utayisambishisha wemwine? Ulasambilisha ati, “Mwilokwiba,” napo we tawibapo?

²² Usosa ati, “Wilokuchita buchende,” napo we tauchitapo buchende? We wapata tungosa wakubasa, napo we tawibapo mumananda yakulombelamo tungosa wakubasa?

²³ We uuyitakisha mu Mafunde aku Lesa, napo tauletelapo Lesa insoni ulo utoba Amafunde nga?

²⁴ Chili kubati ifyo Amalembo Aabuta asosa ati, “Abenafyalo basalula Lesa pamulandu waku mwebo mwe Bayuda.”

²⁵ Ukushilimunwa kulafwilisha nga chakuti ulalama Amafunde. Nomba nga taukoalamapo, chiweme ukutashilimunwapo.

²⁶ Nomba nga umuntu uutashilimunwa akolama Amafunde, napo Lesa tayise kumuloleshapo ukubati ningulya uwashilimunwa?

²⁷ Echo abatashilimunwa abalama Amafunde, ebakwisa kupela umulandu mwe bashilimunwa, elo abakwete na Mafunde, kuntu mukoatoba.

²⁸ Umuyuda umwinenene te ngulyapo uuyilanga bwaka kubantu. Elo ukushilimunwa kwinenene te nkulyapo ukuchitika kumibili bwaka iyowo.

²⁹ Umuyuda umwinenene ningulya uwaba Muyuda mumutima wakwe. Elo ukushilimunwa kwinenene ninkulya ukwamumutima, ukuchitwa no Mupashi Wabuta te ku Mafunde aalembwa iyowo. Uutondayisha umuntu uwaba mfi ni Lesa, te muntupo iyowo.