Loma 16 - Chipangano Chabwangu

Amashiwi akuposhanya umutende

¹ Nkomupela Febi inkashi yenu, nakambi umupyungi uwachilonganino ichaku Kenkiliya.

² Mupokeleleni nga umwina Klistu munenu kubati nimulya abantu baku Lesa bapokelela. Mwafwilisheniko ifyo akokabila pakuti ye aafwilishe abantu abenji pamo nandibo.

³ Natuma umutende kuli Pulisila na Akwila, abapyungi bananji mumulimo waku Klistu.

⁴ Bali abayipekanya ukuposa ubumi ukwebati basunge ubumi bwanji. Te nebopo nenka ukobatotela, kuntu nakufilonganino fimbi ifyabenafyalo.

⁵ Nkoposha umutende nakambi kubantu bonse abalonganina munanda yabo. Nkoposha umutende Epinotasi mutemwekwa wanji. Ngu ewatatikilepo ukuchetekela Klistu mu Asiya.

⁶ Muposhe umutende Maliya uyo uwamupyungila ukwinekantu.

⁷ Muposhe umutende nakambi kuli Andilonikasi na Yuniyasi, Abayuda bananji abo twali nabo muchifungo. Mba balishibikilwe ukwinekantu kubatumwa. Ulo nshilachetekela mba bali kale abena Klistu.

⁸ Nkoposha umutende kuli Ampuliyatasi, mutemwekwa wanji muli Bashikulu.

⁹ Muposhe umutende Ubanasi umupyungi munanji muli Klistu na Sitakisi umunanji natemwesha.

¹⁰ Nkoposha umutende kuli Apelesi, umwina Klistu uwakosa. Mubaposhe umutende abamunanda yakwa Alisitobulasi.

¹¹ Muposhe umutende kuli Helodiyoni, Umuyuda munanji, nakuli bawesu abena Klistu abamunanda yakwa Nakisusi.

¹² Nkoposha umutende kuli Tulayifena nakuli Tulayifosa, bo abapyunga umulimo waku Bashikulu nefiso. Muposhe umutende na Pesisi umutemwekwa wanji, alichitile ifinji mukupyungila Bashikulu.

¹³ Nkoposha umutende kuli Lufusi, uwachinchila mukupyungila Bashikulu, nakuli banyina bo abali kubati nibama.

¹⁴ Nkoposha umutende kuli Asinkilitasi, Fulegoni, Hemesi, Patulobasi, Hemasi, nakuli bawesu bonse abena Klistu abo bekala nabo.

¹⁵ Nkoposha umutende kuli Filologasi, Yuliya, Neliyasi nenkashi yakwa Olimpasi nakuli bonse abantu baku Lesa bo bekala nabo.

¹⁶ Muposhanye umutende muchitemweko ichinenene. Abafilonganino fyonse ifyaku Klistu fyamuposha umutende.

Amashiwi aakusambisha akumupwilo

¹⁷ Nkomupapata, mwe bawesu, chenjeleni nabo abapatukanya abantu pakati kenu nokulenga abanabo ukubifya. Pakuchita mfi balasha ukusambilila uko mwapokelele. Batalukeni!

¹⁸ Pakuti abo abachita mfi tabapyungilapo Bashikulu Klistu, kuntu bapyungila ifyo bafwaya ukuti bekute nafyo. Namashiwi ayaweme ayakonaula balabepayika abantu banaka muchichetekelo.

¹⁹ Abantu bonse balyumfwa ifyo munakila Lesa. Echo nkotemwa pamulandu wenu. Nomba nkofwaya ukuti mube nomulangwe pafintu ifiweme. Mwipumfiwapo nefibi.

²⁰ Elo Lesa uupela umutende, akumupela ifiso ifyakuchimfishako Satana. Ubwanshi bwaku Bashikulu Yesu bube namwebo bonse.

²¹ Akomuposha umutende Timoti umupyungi munanji, pamo na Lusiyasi, Yasoni na Sosipata Umuyuda munanji.

²² Nkomuposha umutende muli Bashikulu nebo ne Tetiyasi kalemba wakalata nji.

²³ Akomuposha umutende Gayusi, uko nafikila nechilonganino chonse eko chikumanina. Akomuposha umutende Elasitosi kasunga wachipawo ichamumushi nawesu Kwatasi. [

²⁴ Ubwanshi bwaku Bashikulu Yesu Klistu bube namwebo bonse. Ameni.]

Ukulomba kwakumupwilo

²⁵ Nomba Lesa uwafiso akomukoselesha ukupitila Mubutumi Bwawama ubo nkoshimika ubusosa ifyaku Yesu Klistu. Mfi fyalifishilwe pamyaka iinji.

²⁶ Nomba ichine nchi chalifisululwa ukupitila kufyo abasoseshi balembele. Elo ukupitila nefyo akonkobeshe Lesa uwamuyayaya nokufyumfwila.

²⁷ Kuli Lesa uyo uwamulangwe enka, kube umuchinshi muli Yesu Klistu umuyayaya. Ameni.