Loma 15 - Chipangano Chabwangu

Ukusekesha bambi

¹ Nomba fwebo abakosa muchichetekelo tulingile ukwafwilisha abanaka. Twiisekeshapo fwenka.

² Echo tulingile ukusekesha umo nomunakwe mukwafwilishanya ukuti ichichetekelo chikose.

³ Pakuti Klistu tayisekeshepo umwine enka, kuntu ukubati nimfilya Amalembo asosa ati, “Amashiwi yamusalula ayo balikukusalula ayisa pali nebo.”

⁴ Fyonse ifyalembwa mu Malembo fyalembelwe ukutusambisha fwebo. Nga Amalembo akotusambisha ukuteka umutima ukwebati tube ukulolela nokukoseleshiwa ukwakufikapo.

⁵ Nomba Lesa uwafwilisha abantu ukuti bateke imitima nokushipikisha, amukoshe mwebo mukwikatana nku mukukonka imibele yaku Klistu Yesu.

⁶ Echo nomutima umo, muchinshike Lesa uuli ni Wishi wa Bashikulu wesu Yesu Klistu.

Ubutumi Bwawama bwabenafyalo nabo

⁷ Pokeleleni umo nomunakwe ukubati nimulya Klistu naye amupokelele.

⁸ Nachine nkomweba ati, Klistu aalukile umupyungi wa Bayuda ukulanga ukuti Lesa wachishinka. Mukuchita mfi alilangile ichine chafilayano fyaku Lesa ifyo apangile nefikolwe fyesu,

⁹ nokupela abenafyalo ichintu ichakuchinshikilapo Lesa pamulandu wabwanshi bwakwe. Chili kubati nimfilya Amalembo asosa ati, “Nakukutondayisha pakati kabenafyalo, nakwimba inyimbo ishakukutondayishapo.”

¹⁰ Nakambi akoti, “Sekeleleni mwe benafyalo, pamo nabantu baku Lesa.”

¹¹ Elo nakambi akoti, “Tondayisheni Lesa, Mwe bonse abenafyalo.”

¹² Naye Esaya akoti, “Umo uwamukowa wakwa Yese, akwisa kutungulula abenafyalo. Elo bakumuchetekela.”

¹³ Echo Lesa uupela ukulindila kwabumi butapwa ewishe imitima yenu nokutemwa, umutende ukupitila mukuchetekela. Ifiso ifya Mupashi Wabuta fikulishe ukulindila nku.

Ifyo Paulo apyungile Lesa

¹⁴ Mwe bawesu, nalishininkisha ukwebati mulikwete ubumi ubuweme, mulishibile fyonse ifisuma nokusambishanya.

¹⁵ Nomba muli nji kalata, mumashiwi ambi, namulembela ukufikapo ukuti mwibukishe fimo-fimo. Nkochita mfi pakuti Lesa mubwanshi bwakwe, alinsala ukuti

¹⁶ mpyungile Klistu Yesu kubenafyalo. Mukushimika Ubutumi Bwawama, nkopyunga kubati nichipupila ukwebati abantu mba babe nga ichipupo icho Lesa engapokelela icho Umupashi Wabuta apatwile.

¹⁷ Ndi muli Klistu Yesu, echo nkoyitutubula pamulandu wamilimo iyo nkopyungila Lesa.

¹⁸ Nshakwatepo insoni ukusosa ifyo nkochita ukupitila muli Klistu ulo nkolonganya abenafyalo ukwebati banakile Lesa. Nkochita mfi mukusambisha namumilimo,

¹⁹ mufiso ifikulu nefyakushimbwisha, elo namufiso ifya Mupashi Wabuta. Echo nalishimikile Ubutumi Bwawama ubusosa pafyaku Klistu konse nalikuya, ukutatikila mu Yelusalemu ukufikila naku Ililikumu.

²⁰ Inshita shonse nkofwaya ukushimika Ubutumi Bwawama kuli bo abataumfwilepo ifyaku Klistu ukuti niimaka pamufula wamuntu umbi.

²¹ Chili kubati nimfilya Amalembo asosa ati, “Abo bonse abatabelwepo ifyaku Ye, bakwisa kubona ifinenene. Elo abo bonse abataumfwilepo, bakwisa ishiba ifyaku Ye.”

Paulo ateyanya ukuya ku Loma

²² Emulandu wine inshita ishinji nalileshiwa ukwisa kuli mwebo.

²³ Imyaka iinji nalikufwaya ukwisa kuli mwe. Nomba ndishilile imilimo yamuchifulo nchi. Echo nkolanguluka ukwisa kumubona

²⁴ pakuya ku Sipeyini. Natutemwa ukumutandalila pakanshita, elo panuma nkofwaya ukuti mukangafwilisheko mubulwendo bwanji.

²⁵ Pali njino nshita, nkoya ku Yelusalemu mukwafwilisha abantu baku Lesa nkulya.

²⁶ Pakuti abamufilonganino ifyaku Masedoniya na Akaya chalibawamine ukupela ifyabupe ukuti bafwilishe abachushi pakati kabantu baku Lesa abaku Yelusalemu.

²⁷ Batemenwe benka ukuchita mfi. Nomba wali umulimo wabo ukuchita mfi. Abayuda baakene amashuko ayabwina Klistu nabenafyalo. Echo nabo abenafyalo balinjile ukwafwilisha Abayuda kufyo babulisha.

²⁸ Ulo nakushila ukupyunga umulimo ngu nokubapela ifyabupe mfi, nakupitila nkulya pakuya ku Sipeyini.

²⁹ Ndishibile ukuti ulo nakwisa kuli mwe, nakumuletela amashuko ayenji ayaku Klistu.

³⁰ Nkomupapata mwe bawesu, ukupitila muli Bashikulu Yesu Klistu nokutemwa ukufuma ku Mupashi Wabuta, ukwebati pamo naine munombeleko nefiso kuli Lesa.

³¹ Munombeleko ukuti Lesa anchingilile ukwebati niwilapo mumaboko abantu abatachetekela ku Yudeya. Nakambi munombele ukwebati abantu baku Lesa abamu Yelusalemu bakapokelele ifyabupe mfi bantuma ukwebati nkabapele.

³² Panuma, nga kufwaya kwaku Lesa, nakwisa kuli mwe nokutemwa.

³³ Lesa uupela umutende, abe namwebo bonse. Ameni.