Loma 14 - Chipangano Chabwangu

Mwipingulapo abena Klistu banenu

¹ Pokeleleni umuntu uwanaka muchichetekelo, kuntu mwichitapo ifikansa pamalangulushi akwe.

² Ichichetekelo chamuntu umo kuti chamusuminisha ukulya ichili chonse, kuntu umbi uwanaka muchichetekelo alalya bwaka umusalu.

³ Uyo uulya akantu akali konse elokusekapo uyo uutalya. Elo uyo uulya umusalu wenka elokupingulapo umunakwe uulya fyonse pantu Lesa alimupokelela.

⁴ Mba niwe nani uupingula umupyungi wamuntu umbi? Shikulu wakwe ewingeshiba nga achita bwino nangula afilwa. Nomba ndishibile ukuti akuchita bwino pakuti Bashikulu ebakumwafwilishako.

⁵ Umuntu umo kuti alanguluka ukwebati akasuba kamo kaliweme ukuchila inshinakwe. Elo umuntu umbi engalanguluka ukwebati inshiku shonse shalilingana. Echo umuntu onse alingile ukuchita ifyo ashininkisha mumutima wakwe.

⁶ Uyo onse uulangulukila ukuchinshinka akasuba kamo akochita mfi mukuchinshika Bashikulu. Na uyo onse uulya akantu akali konse akochita mfi mukuchinshika Bashikulu, pakuti akochinshika Lesa pamulandu wapafyakulya. Elo uyo uulya fimo-fimo, alachita mfi mukuchinshika nokutondayisha Lesa.

⁷ Pakuti takupo umuntu nangu umo uwayikwatila ubumi bwakwe enka nangu ukuyifwilila.

⁸ Ulo tuli nobumi, tuli muli Bashikulu, nelyo tufwa, tufwila muli Bashikulu. Echo nangu tuli nobumi, nangu ulo twafwa, tuli baku Bashikulu.

⁹ Pakuti Klistu alifwile nokubuka ukufuma kubafwa ukuti abe Shikulu wabonse ababumi nabafwa.

¹⁰ Nomba webo, nindo ukopingula wenu? Bonse bwaka twakupingulwa na Lesa.

¹¹ Pakuti Amalembo akososa ati, “Bashikulu bakoti, ‘Napali nebo, abantu bonse bakumfukamina nokusuminisha ukuti ninebo Lesa.’”

¹² Echo umuntu onse muli fwe akwisa kuyisosela umwine kuli Lesa pali fyonse ifyo achitile.

Wilenga wenu ukuwa

¹³ Nomba umwina Klistu onse epingulapo umunakwe. Elo achenjele ukuti echitapo chimo ichingalenga ukuba ichipunwisho kumunakwe.

¹⁴ Ndishibile bwino muli Bashikulu Yesu ukwebati Lesa alasuminisha ukulya ifyakulya fyonse. Nomba nga umuntu achilanguluka ukuba ichibi, echo kuli ye chilabipa.

¹⁵ Nga icho uulya tachisekeshapo wenu, ekwebati taukotungululwapo nechitemweko. Wileka ichakulya icho ulya chonaule wenu uyo Klistu afwilile!

¹⁶ Mwilenga ifyo mweba ifiweme ukuti abantu bafipele ishina ilibi.

¹⁷ Pakuti ubufumu bwaku Lesa tekulyapo nokunwa bwaka, kuntu ukumusekesha, ukwikala umutende, elo nokusangalala. Mfi fyonse fifuma ku Mupashi Wabuta.

¹⁸ Uyo uukopyungila Klistu muli nji nshila, asekesha Lesa. Elo nabantu balamusuminisha ukuba umupyungi waku Ye.

¹⁹ Echo nomba, tuchitepo ifintu ifileta umutende nokukoseleshanya.

²⁰ Pamulandu wafyo ulya wiwonaulapo imilimo yaku Lesa iyo achitile. Nachine ifyakulya fyonse kuti fyalikwa, kuntu umwina Klistu abifya ulo alya ichingawisha wakwe.

²¹ Chiweme ukuyikanya ukulya inama, ukunwa waini, nangu ukuchita ichili chonse ichingawisha wenu.

²² Ifyo ukochetekela pali mfi fintu fibe pakati kobe na Lesa. Alishuka uyo uutakayikapo pafintu ifyo eshibile ukwebati filingilwe ukuchita.

²³ Nomba uyo uukokayika ulo alya ichintu, alibifishe kale, pakuti ifyo achita tefyopo ashininkishe ukwebati efilingile ukuchita. Echo ichili chonse umuntu akochita ukwambula ukuchetekela ukuti chiweme, chibi.