Loma 13 - Chipangano Chabwangu

Ifyakupyungila intungulushi shabuteko

¹ Umuntu onse alingile ukumfwila intungulushi shabuteko. Pakuti tapapo umuntu uukwete ubutungulushi ubushafuma kuli Lesa. Echo intungulushi ishilipo ni Lesa uwashibika.

² Pakuti uyo onse uutanakilapo intungulushi nshi akokana ichabikilwe na Lesa. Elo uuchita mfi, ayiletela ubupingushi.

³ Intungulushi tashitinya kuli bo abachita ifiweme, kuntu kuli abachita ifibi. Napo ukofwaya ukwikala nomutende kuli uyo uuli nensambu? Ina, ulokuchita ifiweme. Elo shakukutondayisha

⁴ pakuti mupyungi waku Lesa uwakukuchitila ifiweme. Nomba nga ukochita ifibi, umutine pantu ali nefiso ifyakukupela umulandu. Intungulushi mupyungi waku Lesa uupela umulandu kuli bo abachita ifibi muchifulo chaku Lesa.

⁵ Echo mulingile ukumfwila intungulushi, temukutinapo Lesa bwaka, kuntu mulishibile mumitima yenu ukuti mulingile ukuchita nchi.

⁶ Emulandu wine mulipilila nomusonko pantu intungulushi shikopyungila Lesa ulo shichita ngu mulimo.

⁷ Echo lipileni kuli bonse fyabo fyonse, mupele umusonko kuli bakasonkesha, ifyakulipila uko mulingile ukulipila. Mutine abo mulingile ukutina, elo peleni umuchinshi kubalingile ukupelwa umuchinshi.

Ifyakutemwana

⁸ Mwilokuba nenkongole kumuntu nangu umo kano nji iyakutemwana umo nomunakwe. Uutemwa wakwe, alama ifyo ifisosa Amafunde aku Lesa.

⁹ Amafunde akoti, “Wilokuchita buchende, wiyipaya, wilokwiba, wilokukumbwa,” namafunde aambi ayashalako, alisoswa mukwipifya mwifunde limo ndi ilikoti, “Ulokutemwa umunobe kubati nimfilya wayitemwa wemwine.”

¹⁰ Uwatemwa wakwe, tekuti amubifishepo iyowo. Echo ukutemwa kulama ifisosa amafunde onse.

Chenjeleni

¹¹ Echo mulokuchita mfi pakuti mulishibile ukuti inshita yakubuka mutulo ilifikile. Nachine, inshita iyakupuluka kwesu ilipalamine ukuchila ifyo chali ulo twachetekele.

¹² Nomba ubushiku buli mupepi ukushila nakasuba kakusanika. Nomba katuleke imilimo yamumfishi, elo tupinte ifyankondo ifyamukasuba.

¹³ Tulokwenda nga bantu abali mukasuba. Kwibapo bukabundulu nangu buchakolwa, ubulale-lale nangu bumbifi, ulubuli nangu umufimbila.

¹⁴ Kamushe ifyabuntunse nefibi fyachiko. Elo Shikulu Yesu Klistu abe ichilwanyo chenu.