Loma 12 - Chipangano Chabwangu

Ifyabumi bwabwangu muli Klistu

¹ Nomba, mwe bawesu, pakuti Lesa atukwatila ichisa ichikulu mfi, nkomupapata ukuti mupele imibili yenu nga ichipupilo ichabumi, ichabuta nakambi ichisekesha Lesa. Nji enshila inenene yakulombelamo Lesa.

² Mwiitumpamo mubwikashi bwapanonshi, kuntu lekeni Lesa amupilibule nokumupela ubumi bwabwangu. Elo mwakwishiba ubufwayo bwakwe, ifiweme, ifyalungama nefimusekesha Lesa.

³ Ukupitila mufiso ifyo Lesa ampela mubwanshi bwakwe, nkomukonkobesha ukuti mwilokuyitutumuna. Nachine mube nomutembo mumalangulushi enu ukulingana nobukulu bwachichetekelo chenu icho Lesa apela umo-umo pali mwe.

⁴ Twalikwata ifilewa ifinji mumubili umo, kuntu mfi fyonse fyalikwata imilimo yafiko.

⁵ Munshila imo yenka, nafwebo fwe bachetekela, nangu tuli abenji, twaba umubili umo muli Klistu. Echo twalikumbinkana pamo ngefilewa ifyamubili umo.

⁶ Elo tulingile ukubomfya ifyabupe ifipusene-pusene ifyo Lesa apela mubwanshi bwakwe. Nga ubupe bwesu bwakushimika, tububomfye ukulingana nechichetekelo chesu.

⁷ Nga bwakupyunga katupyunge. Nga bwakusambisha, katusambishe.

⁸ Nga bwakukoselesha bambi, katubakoseleshe. Uyo uupela, kalokupela nomutima onse. Uyo ukotungulula atungulule, mwakwipela na uyo uukwatila inkumbu bambi, alokuchita mfi nokutemwa.

⁹ Ukutemwa kwenu kube ukwafikapo. Mupate ichibipile, mutemwe ichiweme.

¹⁰ Mutemwane ukwinekantu mubuwenu. Mupelane umuchinshi.

¹¹ Mupyungile Bashikulu nefiso fyonse. Mwibapo abanang’ani iyowo.

¹² Mulokusekelela mukulolela kwenu. Shipikisheni munshita shamachushi. Elo mulokulomba lonse.

¹³ Peniko ifyakwafwilisha kubena Klistu banenu abatakwetepo. Pokelelenipo abalwendo namaboko abili.

¹⁴ Lombeni kuli Lesa ukuti ashukishe abo abakomuchusha. Ina, muchite mfi mwilokubalapishapo iyowo.

¹⁵ Sekeleleni nabo abakosekelela, elo lileni nabo abakolila.

¹⁶ Mulokumfwana lonse. Mwiitutumunapo, kuntu mutemwane nabantu bwaka. Mwilokuyilangulukapo ukuba abamulangwe.

¹⁷ Nga umuntu umo amuchitila ichibi, mwimulandulapo. Mulokuchita ifyo abantu bengasuminisha ukuti fiweme.

¹⁸ Mweshe ukwikala mumutende nabantu bonse.

¹⁹ Mwe batemwekwa, mwilandulapo ichibi kumuntu pakuti Lesa eye akumuchusha mubukali bwakwe. Chili kubati nimfilya Amalembo asosa ati, “Balekeni, ninebo nakubalandula. Nakubachusha, efyo asosa shikulu Lesa.”

²⁰ Echo, kubati nimfilya Amalembo asosa ati, “Nga chipondo chobe chili nensala, chipeleni ichakulya. Nga alinechilaka, mupeleni amenshi ayakunwa.” Pakuti pakuchita mfi, ulamumfwisha insoni ukwinekantu.

²¹ Mwilokuchimfiwa nobubi, kuntu mubuchimfye mukuchita ifiweme.