Loma 11 - Chipangano Chabwangu

Ichisa chaku Lesa pabena Baisilaeli

¹ Nomba nkofumba ati, napo Lesa alibakene abantu bakwe? Iyowo, tefyopo! Nebo ndimwina Isilaeli! Nachine nkofuma kumutundu wakwa Abulahamu, kumukowa wakwa Benjameni.

² Lesa tabakenepo abantu bakwe, abantu abo asalile kale. Napo tamwishibilepo Amalembo ifyo asosa ulo Eliya alombele ukuti Lesa achushe Baisilaeli.

³ Asosele ati, “Bashikulu, mba bantu balipeye abasoseshi benu, balitobawile nefipupililo fyenu. Nomba ninebo uushelepo. Elo nandibo bakopinga ukunjipaya.”

⁴ Mba Lesa amwasukile shani? Amwasukile ati, “Nebo nayisungila abalalume amakana asano na abili abo abatalambilapo Baali, ngosa wakubasa ngulya.”

⁵ Nanomba, ekobali abanini abo Lesa asalile mubwanshi bwakwe.

⁶ Asalile pamulandu wabwanshi bwakwe, tepamilimo yabo iyowo. Nga chali pamilimo yabo, nga tabwali ubwanshi.

⁷ Mba findo? Abena Isilaeli balifililwe ukusanga icho balikufwaya. Bambi pali bo bayishileba bankoma-matwi.

⁸ Kubati nimfilya Amalembo asosa ati, “Lesa alibapele umupashi wabunkoma-matwi. Amenso abo aakutabonapo, namatwi aakutomfwapo, ukufikila nanduno.

⁹ Elo Davide alisosele ati, ‘Lekeni ukusefya kwakulya kwabo kube ati chitembo, ukwebati batelentente nokupelwa ichibalingile.’

¹⁰ Lekeni bapofule ukuti bebonapo. Lekeni amachushi alokukontamika imisana yabo lonse.”

¹¹ Nomba nkofumba ati, napo Abaisilaeli bawile nokonayika? Iyowo, nangu panini! Pakuti balibifishe, abenafyalo balipulukile ukuti Abaisilaeli babe nobufuba.

¹² Ukubifya kwabena Isilaeli kwaletele ishuko kubantu bonse abapanonshi. Ukufilwa kwabo kwaletela ishuko kubenafyalo bonse. Echo kwakuba ishuko ilikulu apo impendwa yabena Isilaeli abasalwa yakukumanina!

Ifyakupuluka kwabenafyalo

¹³ Nkososa kuli mwebo nomba abenafyalo. Ifyo ndi mutumwa kuli mwebo nkosekelela nobutumwa bwanji mbu.

¹⁴ Nalimo kuti nalenga abamutundu wanji ukuba nobufuba, elo bamo muli bo bakuchetekela Klistu nokupulushiwa.

¹⁵ Nga chakuti ukukanwa kwa Baisilaeli na Lesa kwalengele buchibusa nabantu bonse, mba chakuba shani ulo bakupokelelwa? Chakubati abafwa babuka kubumi!

¹⁶ Nga akachisunwa akamufuba wakwamba kapelwa kuli Lesa kaba akabuta, ekwebati onse umufuba wakuba uwabuta. Nga umushu uwapelwa kuli Lesa waba uwabuta, ekwebati ichiti chonse chili chabuta.

¹⁷ Imisambo imbi yachiti chamaolife yakontokele, elo Lesa alikambatikilepo iyamumpanga muchifulo yachiko. Mwe benafyalo muli kubati misambo iyamumpanga njilya, kuntu nomba mukopokelela ifiso ififuma muchiti chamaolife ichabyalwa, ekwebati ukufuma kubena Isilaeli.

¹⁸ Echo tamulingilepo ukusula abo abakontweke kubati musambo ngulya. Nga nipesa apo mwingayitutumwinapo? Mwebo mwaba bwaka imisambo! Temwebo mwikatilila imishu iyowo, kuntu imishu eyikatilila mwebo.

¹⁹ Nomba kuti mwasosa ati, “Ina, kuntu imisambo yalikontweke ukuti pabe ichifulo apo nakukambatikwapo nebo.”

²⁰ Ina, chakwebesha. Balikontweke pakuti tabachetekelepo. Nomba mwebo mulikele kuchiti pantu mukochetekela. Echo mwiyitutumuna, kuntu muchenjele.

²¹ Lesa tabalekele Abaisilaeli, abo abali kubati misambo inenene. Napo mwebo mukolanguluka ukuti angamuleka bwaka?

²² Nomba mwishibe ukuti Lesa wankumbu, elo mukali. Mukali kuli bo abawa, kuntu wankumbu kuli mwebo chikulu tamusulapo inkumbu shakwe. Nga chakuti mwasula, akumuputulako.

²³ Elo nga abena Isilaeli basha ukutachetekela kwabo nokupilibuka, Lesa akubakambatika pachiti nabo. Lesa wafiso, kuti achita fyonse mfi.

²⁴ Mwebo mwe benafyalo muli kubati musambo wachiti chamumpanga icho Lesa aputwile nokukambatika pachiti chamaolife ichabyalwa. Nomba chalyanguka kuli Lesa ukuti akambike imisambo iyakontweke pachiti chachiko.

Ichisa chaku Lesa pali bonse

²⁵ Mwe bawesu, nkofwaya ukuti mwishibe ifyamubumfishi, ukuti nalimo mwingalanguluka ukuba abamulangwe. Ifyamubumfishi nimfi. Abaisilaeli bamo balikosa imitima. Elo bakubelelela ukufikila ulo impendwa yabenafyalo abasalwa ikese kuli Lesa.

²⁶ Elo emo Abaisilaeli bonse bakupulukilamo. Chili kubati nimfilya Amalembo asosa ati, “Umupulushi akufuma ku Siyoni, engu uwakufumya ifibi fya Isilaeli.

²⁷ Nakupanga nabo nchi chipangano, nakubelela amabifyo abo.”

²⁸ Nomba ukusosa ifya Butumi Bwawama Baisilaeli tupondo twaku Lesa pamulandu wenu. Nomba ukusosa pafyakusalwa, Baisilaeli batemwekwa baku Lesa pamulandu wafikolwe fyabo.

²⁹ Pakuti Lesa taulula malangulushi akwe ulo asala nokushukisha umuntu.

³⁰ Akale mwe abenafyalo tamwalikumfwilapo Lesa. Nomba Lesa amubela ichisa pantu Abaisilaeli tabamunakilepo Lesa.

³¹ Munshila imo yenka, Abaisilaeli nabo tabomfwilapo Lesa ukuti mukapokelele mwebo ichisa chaku Lesa pamo nabo.

³² Pakuti Lesa alilenga abantu bonse ukubati basha pantu tabomfwapo. Alichitile mfi ukuti ababelele ichisa bonse.

Ukutondayisha Lesa

³³ Ama, ati ukukula ubuchindami bwaku Lesa! Mba ninani uungaulinga umulangwe namano akwe? Ninani uwingalondolola ukufwaya kwakwe? Elo ninani uwingomfwikisha inshila shakwe?

³⁴ Chili kubati nimfilya Amalembo asosa ati, “Mba ninani uwishibile amalangulushi aku Lesa? Ninani uwingamupanda amano?

³⁵ Elo ninani uwapele Lesa ichintu, ukuti Ye amubweseshe?”

³⁶ Pakuti ifintu fyonse ni Lesa uwafilengele nakambi eufisunga fyonse. Echo fyonse epofili pamulandu wakwe. Tutondayishe Lesa inshiku shonse. Ameni!