Loma 10 - Chipangano Chabwangu

¹ Mwe bawesu, icho nkofwayisha nomutima wanji onse, necho nkopapata Lesa chakwebati abamutundu wanji bapuluke.

² Nalishininkisha ukuti bayipela kuli Lesa, kuntu mukuyipela kwabo tamwabamo amano enenene.

³ Pakuti tabayishibapo inshila iyo Lesa alungamikilamo abantu. Balyesha ukuyisangila inshila yabo. Tabanakilapo inshila iyo Lesa alungamikilamo abantu iyowo.

⁴ Pakuti Klistu ekupelako kwamafunde ukwebati onse uwachetekela Lesa apokelelwe nga uwalungama.

Ichipulusho chabantu bonse

⁵ Ukulabila ifyakupokelelwa nga abalungama mukunakila Amafunde, Mosesi asosele ati, “Uyo onse uukonka Amafunde akuba nobumi.”

⁶ Nomba ifisosa Amalembo ukulingana nefyo Lesa alungamikilamo abantu kupitila muchichetekelo nimfi ifikoti, “Wilokuyifumba wenka ati, ‘Mba ninani wingakwela kumulu?’ (Ekwebati ukuleta Klistu panonshi.)

⁷ Nangula, ‘Mba ninani uwakwinjila munda yachalo?’” (Ekwebati ukuleta Klistu ukufuma kumfwa.)

⁸ Nomba chindo akososa? Ninchi ichakuti, “Amashiwi aku Lesa aba apepi, pamilomo namumitima yenu.” (Ekwebati amashiwi aasosa ifyachichetekelo icho tubilisha.)

⁹ Nga waebelela nakanwa kobe ati Yesu Eshikulu obe, elo nokuchetekela nomutima obe onse ukuti Lesa alimubusha kubafwa, ukapuluka.

¹⁰ Pakuti nikuchichetekelo eko tulungamikilwamo na Lesa. Elo nimukuyisosela eko tupulushiwa.

¹¹ Amalembo asosa ati, “Uyo onse uukochetekela muli Ye takomfwepo insoni.”

¹² Pakuti tapali ukupusana pa Bayuda nabenafyalo. Shikulu wabo bonse umo bwaka. Alashukisha abo bonse abamupapata.

¹³ Ukubati nimfilya Amalembo asosa ati, “Uyo onse uuketa penshita lyaku Bashikulu, akwisa kupuluka.”

¹⁴ Nomba kuti bayita shani Lesa ukuti abafwe nga tabamuchetekelapo? Elo kuti bamuchetekela shani nga tabalaumfwa ifyakwe? Nakambi kuti baumfwa shani nga takuli uwakubilisha Ubutumi kuli bo?

¹⁵ Elo kuti babilisha shani nga tabatuminwepo? Ukubati nimfilya Amalembo asosa ati, “Ukuwama amakasa aambo abaleta Ubutumi Bwawama!”

¹⁶ Nomba te bonse abapokelele Ubutumi mbu. Kubati nimfilya asosele umusoseshi Esaya ati, “Bashikulu, mba ninani uwachetekele ifyo tukobilisha?”

¹⁷ Epo ichichetekelo chifuma mukumfwa Ubutumi Bwawama, nobutumi mbu bwisa mukubilisha ifyaku Klistu.

¹⁸ Nomba nebo nkofumba ati, napo Abaisilaeli tabalaumfwapo Ubutumi Bwawama mbu? Iyowo, balyumfwile. Kubati nimfilya Amalembo asosa ati, “Amashiwi abo, alyumfwika ichalo chonse. Elo amashiwi abo, alifikile mumpelo shachalo chonse.”

¹⁹ Nakambi nakufumba, napo Abaisilaeli tabayishibilepo? Mosesi ewakwasuka nku kufumba ati, “Nakubomfya abantu bwaka, ukulenga abantu banji ukuba ababufuba. Nakubomfya abantu abapuneme, ukwebati ukalifye abantu banji.”

²⁰ Esaya akoebesha ulo akososa ati, “Nebo nalisangilwe nabantu, abo abatali kumfwayapo. Nalibwenekele kubantu, abo abatali kunkonsha uko ndi.”

²¹ nomba ifyabena Isilaeli, Lesa asosele ati, “Akasuba konse natambulwile ukuboko kwanji ukuti mpokelele abantu abatomfwila nakambi abaalukila.”