Kolose 4 - Chipangano Chabwangu

¹ Mwe bashikulubo, mulele abasha benu mubune, mubulungami namunshila iiweme pantu mwalishiba ukuti namwebo mwalikwata Bashikulu wenu mumulu.

Paulo abachinchisha

² Koseleleni mukulomba, nakambi mube abayiluka mukulomba namukutotela Lesa.

³ Nafwebo mulokutulombelako ukuti Lesa atupele inshita iiweme, iyakushimikila amashiwi akwe nokusosa ichamfiso chaku Klistu, pantu pakushimikila epo nakakilwepo muchifungo.

⁴ Echo mulokulomba pakuti ndokufisulula ichamfiso chaku Klistu munshila iilungeme, umo ningile ukusosela.

⁵ Muchenjela mufintu mukochita kubantu bakunse. Mubomfye bwino inshita shonse isho mukoshukila.

⁶ Ukusosa kwenu kube ukuweme inshita shonse ishakusekelesha abantu, nakambi mulingile ukwishiba ukwasuka muntu bwino.

Umutende wakumupwilo

⁷ Wesu uwatemwekwa Tikikasi, umupyungi uwachetekelwa, nakambi umupyungi munanji mumilimo ya Bashikulu, eukoyisa kumushimikilako fyonse ifyapamulandu wanji.

⁸ Echo namutumina kuli mwebo ukwisa kumuchinchishako nokumwishibisha ifyo twikele.

⁹ Akoyisa na Onesimasi, umunesu uwatemwekwa nakambi uwachetekelwa, ngu wamwibumba lyenu. Bakoyisa kumwebako fyonse ifichitika.

¹⁰ Alisitakasi, umufungwa munanji, amuposha umutende, na Maliko, umufyala wakwa Banabasi, naye amuposha umutende (engulya uwo namukonkobeshe akale ukuti nga ayisa uko muli mukamupokelele).

¹¹ Yoshua, ishina limbi ni Yusitasi, naye amuposha umutende. Mba batatu e Bayuda benka bwaka abachetekela abo tukobombela pamo umulimo wabufumu bwaku Lesa. Elo ebansangulushako ukwinekantu.

¹² Epafulasi, wamwibumba lyenu, amupela umutende, nakambi mupyungi waku Yesu Klistu. Lonse alamulombelako nomutima wakwe onse ukuti Lesa alokumwafwa ukuba abena Klistu abafikapo, nakambi abachetekela ubufwayo bwaku Lesa bonse.

¹³ Pantu nine kamboni wakwe neubona ukupyungisha kwakwe, pakumulombela mwebo, pamo nabena Lawodisiya nabena Helapolisi.

¹⁴ Luka, ing’anga yesu iyatemwekwa, amupela umutende, na Dimasi naye amupela umutende.

¹⁵ Bapeleni umutende abanesu abali mu Lawodisiya, na Nimfwa, pamo nabena Klistu abo abalongana nabo munanda yakwe.

¹⁶ Nga mwashila ukupenda kalata nji, kuti mwaleka nechilonganino chaku Lawodisiya chikapendemo. Mwebo namwe mukapendepo pali kalata njilya nalembele abena Lawodisiya.

¹⁷ Elo musose kuli Akipasi mwati, “Ulokupyungisha pamulimo uyo bakupela kuli Bashikulu ukuti ukaufikilishe.”

¹⁸ Nine Paulo nalemba nokuboko kwanji nkoti, Mutende. Mulokwibukisha ukuti nalikakwa. Ubwanshi bwaku Lesa bube kuli mwebo bonse.