Kolose 3 - Chipangano Chabwangu

¹ Kati mwebo mwalibushikwa kubafwa pamo na Klistu, kanshi bikeni imitima yenu pafintu ifyamumulu, umo Klistu ekala pamupando wabufumu kulubali lwakumulyo lwaku Lesa.

² Bikeni imitima yenu pafintu ifili mumulu, tepafintupo ifyamuno chalo iyowo.

³ Pakuba mwebo mwalifwa, nobumi bwenu bwalisungwa pamo na Klistu muli Lesa.

⁴ Ubumi bwenu ubwachine ni Klistu. Ulo akaboneka namwe mukabonekela pamo nakwe mubuleme bwakwe!

Ukwikala kwakale nokwabwangu

⁵ Ala, lekeni ukwikala kwenu ukwabuntunse: ubulale-lale, ubuchende, ulwinso ulubi nolunkumbwa ulwabipa. Pakuti ulunkumbwa emusango umo uwakulomba tungosa wakubasa.

⁶ Nipamulandu wafintu mfi epo ubukali bwaku Lesa bwishila pali bachitomfwa.

⁷ Namweba kale efyo mwali ulo mwalikufichita mfi.

⁸ Nomba namwe muleke ukuchita mfi fintu fyonse: ubukali, ichipyu, umufulo, imiponto nensele. Fyonse mfi tafilingilepo ukufuma mutunwa twenu.

⁹ Mwilokubepana pantu mubumi bwakale bo mwalifumamo namumibele yabuko.

¹⁰ Nomba mwalinjila mubumi bwabwangu. Elo kabumba wenu eubulenga ubwabwangu lonse muchipasho chakwe pakumupalamika uko aba, pakuti mumwishibishe bwino.

¹¹ Mubumi mbu tapapo ubupusano pakati ka Bayuda nabenafyalo, uwashilimunwa nangu uutashilimunwapo, abatasambilila, bankalwe, abasha nangu ababwanalale, kuntu ichikulu ni Klistu uwaba muli bonse.

¹² Mwebo muli bantu baku Lesa abo atemenwe nokumusala ukuti mube abakwe. Nomba mube nenkumbu ishachine, ichikuku nobufuke, umutembo nokuteka umutima.

¹³ Mulokushipikisha kumisango yabanenu. Mulokunakilana nga mfilya Bashikulu bamunakilile.

¹⁴ Pali mfi fyonse, mube nokutemwa pantu ukutemwa ekukumbinkanya fyonse pamo muchine.

¹⁵ Umutende uwo Klistu apela ewo ulokuba kampingu wamitima yenu, pantu kuli ngu mutende wenka eko Lesa amwitila ukuba pamo mumubili umo. Elo mube nemitima iyakutotela Lesa.

¹⁶ Lekeni amashiwi aku Klistu aamuchinshi alokwikala mumitima yenu. Mulokusambilishanya nokupandana amano. Mulokwimba inyimbo ishakutondayisha Lesa isha Malumbo, neshakutotela, nenyimbo shimbi ishakulumbanya Lesa. Mulokwimbila Lesa nokumutotela mumitima yenu.

¹⁷ Nafyonse ifyo musosa nokuchita, filokuchitilwa mwishina lyaku Bashikulu Yesu, emo mulokutotelamo Lesa Wishi.

Imibele yabwina Klistu

¹⁸ Mwe banakashi, mulokunakila abalume benu pantu efyo mulingile ukuchita nga abena Klistu.

¹⁹ Mwe balalume namwe, mulokutemwa abakashi benu. Mwilokubasunga nkansa-nkansa.

²⁰ Mwe bana, mulokumfwila abafyashi benu mufintu fyonse, pantu nchi echisekesha Bashikulu.

²¹ Mwe bafyashi namwe, mwilokukalifya abana benu pantu kuti banaka imitima.

²² Namwe basha, umfwileni bashikulu benu abamuno chalo mufintu fyonse. Mwilokubanakila bwaka ulo balipo pakuti bamutote iyowo, kuntu nolo batalipo mulokupyunga nemitima iyachishinka pamulandu wakuchinshika Bashikulu.

²³ Chonse icho mukobachitila, chiteni nemitima yenu yonse ukubati ni Bashikulu mukopyungila.

²⁴ Mulokwibukisha ukuti Bashikulu bakumulambula fyonse ifyo balayile abantu babo. Muli fyonse mfi ni Klistu Bashikulu benu epela ebo mupyungila.

²⁵ Pakuti umuntu ubifya naye akakandilwapo pabubi bwakwe pantu Lesa ena takwatapo akapatulula.