Kolose 2 - Chipangano Chabwangu

¹ Nkofwaya ukumwishibishako ifyo mombesha ukwinekantu pali mwebo napabena Lawodisiya, nambalya bonse abatalambonapo.

² Icho nchitila mfi nimukuti imitima yabo ibe iyashipa, babe ukusakamanshanya pamo bonse mukutemwa, nokuti amano abo akulishe. Asuke abafishe namukwishiba ichamfiso chaku Lesa, eye Klistu.

³ Muli Ye emwafishilwa ububoni bonse ubwamulangwe namano.

⁴ Nkomweba ati mwileka umuntu uuli onse amutumpayike mukutalikana ukwabuchenjeshi.

⁵ Nangu tanshili pamo namwebo mumubili, kuntu ndipamo namwebo mumupashi. Elo nkosekelela pakubona ukutekanya kwenu, nokukosa kwachichetekelo chenu muli Klistu.

Ubumi bwinenene muli Klistu

⁶ Mwenka umo mwasuminina ukuti Klistu Yesu Bashikulu wenu, mulokwikalilila muli Ye.

⁷ Mwandemo imishu nokwimaka ubumi bwenu muli Ye. Mwimakane ndi apo muli mwe bashindayikwa muchichetekelo chenu ukubati nimulya mwasambilile. Nakambi mulokumutotela lonse.

⁸ Chenjeleni ukuti kwibapo umuntu nangu umo uwakufulunganya ichichetekelo chenu nokumutapa-nkole mumulangwe uwabuntunse uwabuchenjeshi bwakwe ubwabwaka. Mfi fyonse fifuma kutufuto utwakale nakumalangulushi yabuntunse, tekuli Klistu iyowo.

⁹ Pakuba mumubili waku Klistu emwayikala bulesa bonse.

¹⁰ Elo muli Ye namwebo mwalipelwa ubumi ubwiwile sululu. Elo Klistu Ye ewachila pamafumu napabuteko bonse.

¹¹ Mukusankana pamo na Klistu emo mwashilimunwa, tekushilimunwapo kwamubili iyowo, kuntu kwaku Klistu umwine, ukwabamo ukulubuka kufiso fyangu mubili wabuntunse.

¹² Pantu ulo mwabatishiwe mwashikilwe pamo na Klistu. Elo mulubatisho lwenka emo mwabukile pamo na Klistu mukuchetekela kwenu mufiso fyaku Lesa uwamubushishe Klistu kubafwa.

¹³ Kale mwali abafwa pamulandu wamabifyo enu, nakambi pamulandu wakuti mwali abenafyalo abatashilimunwapo kumubili. Nomba Lesa alimuleta kubumi pamo na Klistu. Alitunakilila amabifyo onse.

¹⁴ Alifuta Amafunde alembelwe ayalikutushinina. Aliafumyapo nokwapampamina pamutashi.

¹⁵ Muli Klistu, Lesa afumishe ifiso ifyabakateka nabansambu bonse nokubalenga insoni palwalala ulo abalangile ukuchimfya kwakwe.

¹⁶ Echo mwileka umuntu nangu umo ukumupingula pafyo mwingalya nokunwa, nangula pamulandu wanshiku shakusekelela pamwaka nomwaka, nangula umwenshi wabwangu nangula pakasuba ke Sabata.

¹⁷ Mfi fyonse chimfule bwaka ichafintu finenene ifikoyisa, kuntu ifinenene mfi ni Klistu wine.

¹⁸ Mwilekapo umuntu nangu umo amubepe pamulandu wakwichefya bufi-bufi nokulomba abangelo. Abantu bamusango ngu balayilumbanya pamulandu wafibonwa ifyo babona. Nchi chenka kuyitumpika bwaka pantu amalangulushi abo abukayitemwe.

¹⁹ Elo balifumako kuli Klistu umutwi wachilonganino. Muli Klistu umubili onse ulapokela ifiso nokwikatana kwafilundwa fyonse. Echo umubili ulakula nga umo Lesa afwayila.

Ukufwa nokwikala ababumi muli Klistu

²⁰ Mwebo mwafwila pamo na Klistu, nakambi mwalilubulwa kubusha bwamipashi yamulwelele. Kanshi chindo icho mwikalila nga abantu banchino chalo? Chindo icho munakilila kumafunde asosa ati,

²¹ “Wiyikatapo kuli nchi.” “Wisondapo kuli nchilya,” nangula, “Wikumyako kuli nchi”?

²² Amafunde nemisambishisho nji yabantu bwaka, fisosa ifyafintu ifishila ulo bafibomfya!

²³ Kwena amashiwi nga akoboneka ukubati yamano pantu alasuminisha ukuti abantu balombe munshila iyo bafwayilamo, ukuyichefya nokuchusha umubili nkansa-nkansa. Nomba amafunde nga yabwaka, afwilisha bwaka ukusekesha ubumi bwabuntunse.