Kolose 1 - Chipangano Chabwangu

¹ Nine Paulo umutumwa waku Klistu Yesu mukufwaya kwaku Lesa. Tuli nawesu Timoti.

² Namulembela mwe bantu baku Lesa bayikala mu Kolose, mwe bawesu abachetekela muli Klistu. Lesa Bata amukwatile ubwanshi nokumupela umutende.

Ukulomba kwakutotela Lesa

³ Lonse tulamutotela Lesa Wishi wa Mfumu yesu Yesu Klistu ulo tumulombelako.

⁴ Pakuba tulyumfwile ukuchetekela kwenu uko mukwete muli Klistu Yesu, nefyo mwatemwa abantu baku Lesa bonse.

⁵ Echo icho mukolindilila, Lesa alimubikila bwino-bwino mumulu. Mfi mwalifyumfwa ulo amashiwi achine aya Butumi Bwawama ayishile kuli mwebo pakwamba.

⁶ Ubutumi mbu buleta ukushuka nokumfwika muchalo chonse nga fintu bwaumfwika kuli mwebo, ukufuma bwaka pakasuba mwasumine ubwanshi bwaku Lesa muchine.

⁷ Mwasambilile nchi kuli Epafulasi umupyungi munesu uyo twatemwa. Elo umupyungi ngu twachetekela uwaku Klistu aba kuli mwebo muchifulo chesu.

⁸ Ewatwebeleko ukutemwa kwenu mu Mupashi Wabuta.

⁹ Pali nchi, nafwebo, ukutatika nkalya kasuba twaumfwile, tatwalekapo ukumulombela. Tulalomba Lesa ukuti amwiushe amano nomulangwe ifyo Mupashi Wabuta apela ukwebati mumfwikishe fyonse ifyo Ye afwaya.

¹⁰ Penkapo mwakwikala ukubati niumo Lesa afwayila. Elo lonse mulokuchita ifisekesha Bashikulu. Lonse mulokuchita imilimo iiweme nobumi bwenu bulokulanga ifitwalo ifiweme. Elo mwakwisa kwishiba Lesa.

¹¹ Tulelomba ukuti Lesa amukoshe ndi mufiso fyakwe ifyabuleme, ukuti mulokuba abakushipikisha, abakuteka imitima mufintu fyonse.

¹² Echo nkolomba ukuti mulokutotela Lesa Bata, uwamulenga ukuba abalinga ukukwatako ifintu Lesa amubikila mubufumu bwakusanika.

¹³ Pakuba ewatupokololako kufiso fyamfishi nokutuleta mubufumu bwa Mwana wakwe uwatemwekwa.

¹⁴ Muli Ye emo twalubukila, ekwebati, alitunakilila amabifyo esu.

Umuntu nemilimo yaku Klistu

¹⁵ Klistu echipasho chaku Lesa uutabonekapo, nakambi ebeli kufyalengwa fyonse.

¹⁶ Muli Ye Lesa alengele fyonse ifyamumulu napanshi, ifiboneka nefitaboneka, intungulushi, bashamfumu nabachilolo, elo nabakateka. Lesa atalile fyonse ukupitila muli Klistu nakambi afilengele Ye.

¹⁷ Ifintu fyonse tafilatatika, Klistu eko aali. Elo muli Ye ifintu fyonse fyalikatana.

¹⁸ Emutwi wamubili wakwe, emukuti ichilonganino. Ewakwamba ukubuka kubafwa ukuti muli fyonse abe uwapamulu.

¹⁹ Bufwayo bwaku Lesa ukuti mu Mwana emo bulesa bwakwe bonse bwikale.

²⁰ Muli Klistu Lesa apingwile ukuwikishanya ifintu fyonse kuli Ye, ifyapanshi nefyakumulu. Lesa aletele umutende mumfwa ya Mwana wakwe pamutashi.

²¹ Namwebo kale mwali bwaka ukutali na Lesa, elo mwali utupondo twakwe pafintu fyabipa ifyo mwalikulanguluka nokuchita.

²² Nomba Lesa alimuwikishanya ukupitila mumfwa ya Mwana wakwe uwali nomubili kubati yesu. Achitile mfi ukwebati pamenso yakwe mube ababuta, abatakwetepo akalema nakambi abapwililika.

²³ Emukuti muli nokutwalilila muchichetekelo ichayimakwa pamufula uwakosa. Mwileka nangu chimo chimusunkanye nokumufumyapo kucho mwachetekelamo lwenka ulo mwaumfwile Ubutumi Bwawama. Lesa alimpele nebo, ne Paulo, umulimo uwakushimikila Ubutumi Bwawama mbu ubukoshimikilwa kubantu bonse abamuchalo.

Ifyo Paulo abombele ichilonganino

²⁴ Nomba ndibwaka uwasekelela pakuti nachulila mwebo, pantu mukuchula kwanji, emo nkoshilishisha amachushi aasheleko aali kubati aku Klistu, ayo achulile umubili wakwe, ekwebati ichilonganino.

²⁵ Elo nandibo ndimupyungi wachilonganino nchi pantu Lesa alimpele umulimo wakupyunga mukati kenu. Umulimo ngu uwakuti mbilishe amashiwi akwe onse.

²⁶ Amashiwi ngalya aafishilwe kunkulo shonse, nomba Lesa aafisulwila kubantu bakwe.

²⁷ Pantu Lesa atemenwe ukuti abenafyalo bonse beshibe ichamfiso ichiweme ukwinekantu ichabuboni ubwabuleme bwakwe. Ichamfiso nchi ningu Klistu uuli muli mwebo, nakambi eumupela ukulindilila kwakupokela ubuleme.

²⁸ Nomba tushimikila Klistu kubantu bonse, tuchenjesha nokusambishako abantu bonse pachinso chaku Lesa ukuti babe abakosa muli Klistu.

²⁹ Pakuchita nchi ndachula nokupitintika ukubomfya ifiso Klistu ampela ifibomba muli nebo.