Imilimo ya batumwa 9 - Chipangano Chabwangu

Ukwaluka kwakwa Saulo

¹ Panshita njilya Saulo alikuchusha abakusambila baku Bashikulu nokupinga ukubepaya. Ayile kuli chipupila mukulu

² mukupapata amakalata akuya kulanga kufilonganino fya Bayuda mumusumba waku Damasikasi. Alikufwaya ukuti nga asanga abalekonka Inshila yaku Bashikulu Yesu, akabekate nokubakaka bonse, abalalume nabanakashi, nokubatwala ku Yelusalemu.

³ Ulo apalamine mupepi nomusumba wa Damasikasi, lubuto lwaliyamusanikile ukufuma kumulu.

⁴ Elo awile panshi nokumfwa ishiwi ilikoti, “Saulo, Saulo! Mba nindo uunchushisha?”

⁵ Elo afumbile ati, “Mba nimwe bani Bashikulu?” Ishiwi lyayasukile ati, “Nine Yesu uyo ukochusha.

⁶ Ima uye kumusumba ngu. Kwenka nku bakukushimikila fyonse ifyo ulingile ukuchita.”

⁷ Abalalume abali na Saulo bayimakene bwaka chelele, tabakwetepo namashiwi. Nomba ishiwi balilyumfwile nangu tababwenepo umuntu.

⁸ Ulo Saulo ayimakene, aliyeseshe ukushibatula amenso ukuti abone, kuntu chalimukangile ukubona nangu panini. Echo bamwikete pakuboko, nokumutangilila mu Damasikasi.

⁹ Papitile inshiku shitatu talikubonapo nangu ukulyapo akantu iyowo.

¹⁰ Mu Damasikasi mwalipo uwachetekela umo uwitwa Ananiyasi. Ngu umwalalume alibwene ichimonwa umo Bashikulu basosele ati, “Ananiyasi!” Naye alyasukile ati, “Epo ndi Bashikulu.”

¹¹ Penkapo Bashikulu basosele ati, “Ipekanye uye kumusebo beta, ‘Musebo Uwalungama.’ Munanda yakwa Yuda wipushemo umuntu weshina lya Saulo umwina Tasusi. Muntu ngu akolomba.

¹² Elo muchimonwa Saulo abwene umwalalume uwalikwitwa Ananiyasi akoyinjila munanda nokubikapo amaboko akwe pali ye ukuti abone nakambi.”

¹³ Ulo aumfwile mfi Ananiyasi ayasukile ati, “Bashikulu nalyumfwa kubenji imilandu yonse iibi iyo ngu muntu achita kubantu benu mu Yelusalemu.

¹⁴ Elo ayisa namuno Damasikasi nobuleme ubo afumya kuntungulushi shabachipupila ukuti akake bonse abalombela mwishina lyenu.”

¹⁵ Kuntu Bashikulu balimwasukile bati, “Koya bwaka, pantu ngu muntu nebo ndimusalile ukuti alokumpyungila, ewakwishibisha ishina lyanji kubenafyalo, kumfumu nakubena Isilaeli.

¹⁶ Elo nebo nenka nakumulanga ifintu fyonse ali nokuchula pamulandu waku nebo.”

¹⁷ Elo Ananiyasi ayile nokwinjila munanda umwali Saulo, abikile amaboko akwe pali ye nokusosa ati, “Saulo muwesu, Bashikulu bantuma, Yesu ngulya wabwene munshila ulo walikwisa nkuno. Antuma ukuti webo ubone nakambi, nokuti wiyule no Mupashi Wabuta.”

¹⁸ Bwangu-bwangu pafumine ifintu ifili kubati mamba yanswi mumenso akwa Saulo. Elo atatikile ukubona nakambi. Panuma ayimine nokubatishiwa.

¹⁹ Ulo alile ifiso fyalishile muli ye. Saulo ayikele inshiku shinini pamo nabachetekela mu Damasikasi.

Saulo abilisha mu Damasikasi

²⁰ Penkapo atatikile nokubilisha mumananda yaku Lesa ukuti Yesu e Mwana waku Lesa.

²¹ Nomba bonse abamumfwile balishimbilwe nokufumbana ati, “Tengu muntu uwalikwipaya abachetekela mu Yelusalemu? Alishile nankuno ukukaka abachetekela nokubatwala kuntungulushi shabachipupila!”

²² Nomba ukushimika kwakwa Saulo nomba kwakwete nefiso ifikulu. Echo Abayuda bonse abalikwikala mu Damasikasi bashimbwilwe ukwinekantu ulo abapele bukamboni ubwakuti, “Yesu e Mupulushi uwalayilwe.”

²³ Ulo papitile inshiku ishinji, abakulu ba Bayuda balongene pamo nokupingula ukwipaya Saulo.

²⁴ Saulo aumfwile ifyo balikumupingila. Echo balikulindila pamulyango wamushi akasuba nobushiku ukuti nga bamubona bamwipaye.

²⁵ Kuntu ubushiku bumo abakusambila bapushishe Saulo pachipunda mumuseke.

Saulo aya ku Yelusalemu

²⁶ Ulo Saulo afikile ku Yelusalemu, ayeseshe ukwikala pamo nabatumwa, kuntu tabamuchetekele ukuti naye mutumwa iyowo. Bali kumutina.

²⁷ Nomba umwalalume umo uwalikwitwa Banabasi atwele Saulo kubatumwa, nokubalondolwela ifyo Saulo abwene Bashikulu munshila. Elo abalondolwele ifyo Saulo ashimikile mwishina lyaku Yesu nomutima umo mu Damasikasi.

²⁸ Efyo Saulo ayikele nabo, alikuya mu Yelusalemu monse akoshimikila mwishina lyaku Bashikulu nomutima umo.

²⁹ Nakambi alikusosa nokutalikishanya na Bayuda abasosa Ichigiliki, kuntu bena bapingile ukumwipaya.

³⁰ Ulo abena Klistu banakwe bayishibile mfi, batwite Saulo ku Kayisaleya nokumutuma ku Tasusi.

³¹ Kunshita njilya ifilonganino ifyabena Klistu mumiputulwa yonse iyamu Yudeya, Galili namu Samaliya mwali umutende. Ukupitila mufiso fya Mupashi Wabuta, ifilonganino fyalikosele nempendwa yabantu yalikukula. Bonse balikunakila Bashikulu.

Petulo aya ku Lida naku Yopa

³² Ulo Petulo alikuya mumiputulwa yachalo iyapusana-pusana, afikile kubena Klistu abalikwikala mu Lida.

³³ Uko asangile umwalalume uwalikwitwa Eneyasi. Umuntu ngu ali chite, echo talikufuma pabulo.

³⁴ Petulo asosele ati, “Eneyasi, Yesu Klistu akuposha. Ima wansule impasa yobe.” Bwangu-bwangu Eneyasi alimakana.

³⁵ Elo abantu bonse abali kwikala mu Lida namu Shaloni, ulo babwene Eneyasi, nabo balichetekele muli Bashikulu.

³⁶ Ku Yopa kwalipo umwanakashi umo uwachetekela uwali kwitwa Tabita. (Mu Chigiliki etwa Dokasi, ekwebati impombo.) Ngu mwanakashi apele inshita yakwe yonse ukuchita ifiweme kubantu bonse nokwafwilishako abalikubulisha.

³⁷ Panshita njilya, alilwele nokufwa. Elo basamfishe ichitumbi chakwe nokuchibika muchipinda chapamulu.

³⁸ Pakuba umushi wa Lida wapalamine na Yopa. Ulo abachetekela bamu Yopa baumfwile ukuti Petulo ali mu Lida, batumineko abalalume babili namashiwi ayakuti, “Endesha ukwisa nkuno.”

³⁹ Bwangu-bwangu Petulo ayipekenye nokuya nabo. Ulo afikile, bamutwite muchipinda chapamulu. Bamukamfwilwa bonse balimushingulukile Petulo. Balikulila nokumulanga insalu namalaya ifyo Dokasi alikubila ulo ali umumi.

⁴⁰ Nomba Petulo abapapatile ukuti bafumine panse. Penkapo alifukeme nokulomba. Elo apilibukile kuchitumbi nokuti, “Tabita buka!” Naye alishibatwile amenso. Ulo abwene Petulo, alikele nokwikala.

⁴¹ Petulo naye atambulwile ukuboko kwakwe, ayikata ukuboko kwakwa Dokasi nokumwimya. Elo ayitile abena Klistu pamo nabamukamfwilwa, abapele uwali nobumi.

⁴² Umulandu ngu wakumene Yopa yonse. Nabantu abenji bachetekele muli Bashikulu.

⁴³ Petulo ayikele mu Yopa inshiku ishinji muli Simoni umo uwakunyuka impapa.