Imilimo ya batumwa 8 - Chipangano Chabwangu

¹ Saulo naye alikubasuminisha ulo balikwipaya Sitefano. Ukufuma pali nkalya kasuba Abayuda batatikile ukuchusha abena Klistu abamu Yelusalemu. Echo abena Klistu bonse bapalanganine muchalo cha Yudeya necha Samaliya. Abatumwa benka ebashele mumusumba.

Saulo achusha abena Klistu

² Nomba bambi abatemenwe Lesa bashikile Sitefano nokumulila ukwinekantu.

³ Nomba Saulo alikoselepo ukonaula ichilonganino chabena Klistu chonse. Elo alikwinjila namumananda abo, nokwikata abalalume nabanakashi, nokubaposa muchifungo.

Bashimikila Ubutumi Bwawama mu Samaliya

⁴ Elo abachetekele Yesu bapalanganine impanga yonse nokubilisha Ubutumi Bwawama.

⁵ Filipo ayile kumusumba uukulu waku Samaliya, nokubashimikila ifya Wasubwa waku Lesa.

⁶ Amabumba alikukutikisha ifyo Filipo alikusosa. Bonse balikumfwa nokubona ifintu ifikulu ifyo alikuchita.

⁷ Elo alikufumya imipashi iibi mubantu abenji. Yalikwaula namashiwi aakulu, ifite nefilema ifinji fyalikupola.

⁸ Echo abantu bamumusumba ngulya balimutemenwe ukwinekantu.

⁹ Muli ngulya musumba mwalipo umwalalume umo uwali kwitwa Simoni. Ukufuma kukale alikuchita ifyabumwine-mano nabantu abamu Samaliya balikushimbwa kuli bumwine-mano bwakwe. Alikuyilinga umwine ukuba umukulu.

¹⁰ Echo abantu bonse, abayiche nabakulu, balikumuchinshika nokumumfwila. Balikumutondayisha bati, “Ngu muntu ali nefiso ifikulu ifyaku Lesa Bata.”

¹¹ Balikumumfwila pantu panshita iitali alikubashimbwisha nabumwine-mano bwakwe.

¹² Ulo Filipo alikubilisha Ubutumi Bwawama ubwabufumu bwaku Lesa na Yesu Klistu, abantu abenji balichetekele nokubatishikwa, abalalume nabanakashi.

¹³ Naye Simoni umwine alichetekele, panuma yakubatishiwa, alikwikala pamo na Filipo. Ashimbilwe ukwinekantu ulo abwene ifyakushimbwisha fikulu ifyo Filipo alikuchita.

¹⁴ Ulo abatumwa bamu Yelusalemu baumfwile ukuti abena Samaliya nabo bapokelela Amashiwi aku Lesa, batumineko Petulo na Yohane kuli mbo.

¹⁵ Ulo bafikileko, balombele abachetekela ukuti bapokelele Umupashi Wabuta.

¹⁶ Pakuti Umupashi Wabuta tawafikilepo pamuntu nangu umo. Babatishiwe bwaka mwishina lyaku Bashikulu Yesu.

¹⁷ Elo Petulo na Yohane bababikilepo amaboko, bapokelela no Mupashi Wabuta.

¹⁸ Ulo Simoni abwene ukuti Umupashi Wabuta ukopelwa pakubikapo amaboko abatumwa, atwite indalama kuli Petulo na Yohane

¹⁹ nokusosa ati, “Mpeniko nandibo ifiso mfi pakuti umuntu onse uwo nabikapo amaboko anji alokupokelela Umupashi Wabuta.”

²⁰ Nomba Petulo amwasukile ati, “Kafwile pamo nendalama shobe! Napo webo ukolanguluka kuti washita ichabupe chaku Lesa?

²¹ Taukwetepo ichiputulwa kumulimo wesu pantu umutima wobe taulungeme pachinso chaku Lesa.

²² Kanshi ulingile ukulapila pamulandu wakulanguluka ichibi nchi. Ulombe kuli Bashikulu nalimo kuti bakunakilila amabifyo obe.

²³ Pakuba nkobona ukuti webo wayiwula nomufimbila, nakambi walikakwa kububi.”

²⁴ Elo Simoni ayasukile ati, “Mpapatileniko kuli Bashikulu ukuti ifintu ifyo mwasosa pengwilapo nangu chimo.”

²⁵ Ulo Petulo na Yohane bapele bukamboni nokushimika Amashiwi aku Lesa, babwelelemo ku Yelusalemu. Elo balikushimika Ubutumi Bwawama mumishi iyinji yamuchalo cha Samaliya.

Filipo abatisha umwina Itiyopiya

²⁶ Elo umungelo waku Bashikulu aebele Filipo ati, “Ipekanye, uye kumusebo uwaba kukapinda-kepi uufuma ku Yelusalemu nokuya kumushi wa Gasa.” (Nomba ngu musebo tabaubomfyapo.)

²⁷ Elo Filipo alipekenye nokuya. Kanshi kwali umwina Itiyopiya umo uwali umukulu, uuchindeme. Ngu muntu apelwe ifiso ifinji ifyakulama ububoni bwakwa Kandase, nyina-mfumu wachalo cha Itiyopiya. Alikufuma mukulomba Lesa ku Yelusalemu nokuya kumwakwe.

²⁸ Akwelele mwicheleta akopenda ifyalembelwe nomusoseshi Esaya.

²⁹ Elo Umupashi Wabuta wayebele Filipo ati, “Kapalamineko kwicheleta ndilya.”

³⁰ Ulo Filipo afikileko, aumfwile ifyo chilolo alikupenda ifyalembelwe nomusoseshi Esaya. Elo alimufumbile ati, “Napo mukoumfwa ifyo mukopenda bamfumu?”

³¹ Naye ayasukile ati, “Nga kuti naumfwa shani neutakwetepo uwakumpikulwilako?” Elo aebele Filipo ukuti akwele nokwikala nakwe mwicheleta.

³² Kanshi Amashiwi aku Lesa alikupenda ni nga, “Ali kubati nimbelele iyo bakotwala mukwipaya, akutumene bwaka chelele kubati mwana wambelele, pachinso chaku bo abakomubeya. Tasoselepo ishiwi nangu limo.

³³ Balimusulile, elo nomulandu wakwe tawapingwilwepo mubulungami. Tapakabepo nomuntu uwakulondolola ifyabana bakwe panonshi, pantu baputukisha ubumi bwakwe panonshi.”

³⁴ Elo umuntu ngulya uwachindama afumbile ati, “Njebako, ninani akososapo? Napo ngu umusoseshi akososa pamwine enka nangula pamuntu umbi?”

³⁵ Filipo atatikile ukusosa mashiwi enka awo chilolo alikupenda. Amushimikile Ubutumi Bwawama ubwaku Yesu.

³⁶ Ulo balikuya munshila, bafikile apali amenshi. Umuntu ngulya asosele ati, “Amenshi nga, chindo chakunkanya ukubatishiwa?” [

³⁷ Filipo ayasukile ati, “Kati mwachetekela nomutima wenu onse mwakubatishiwa.” Umuntu ngulya asosele ati, “Ina, nachetekela ukuti Yesu Klistu e Mwana waku Lesa.”]

³⁸ Elo chilolo ayiminikile icheleta. Nomba bonse babili, Filipo nangulya, bayinjile mumenshi. Ukufumapo Filipo alimubatishe.

³⁹ Ati bafume bwaka mumenshi, Umupashi Wabuta wapintile Filipo. Umuntu ngu tamubwenepo nakambi iyowo. Nomba ye atatikile ubulwendo bwakwe nokuya alisangulukile ukwinekantu.

⁴⁰ Filipo ayisangile bwaka ali kumushi wa Ashidodi. Nkulya alikushimika Ubutumi Bwawama mumishi yonse asukile afika naku Kayisaleya.