Imilimo ya batumwa 6 - Chipangano Chabwangu

Basala bakafwa basano na babili

¹ Elo muli nshilya nshiku, abachetekela balikufulilako. Nomba tapalipo ukumfwana pakati ka Bayuda abalikusosa Ichigiliki nambalya abalikusosa Ichiyuda. Aba Chigiliki balikuyilishanya ukuti bamukamfwilwa babo tabalikubapelapo ifyabupe ifyanshiku shonse.

² Elo abatumwa ikumi na babili balongenye ibumba lyabena Klistu nokubeba ati, “Tachilingilepo ukuti fwebo tuleke ukushimika Amashiwi aku Lesa ukwebati tulokulumba ifyabupe.

³ Echo bawesu, musale abalalume basano na babili abayishibikwa ukuti bayiwula Umupashi Wabuta nomulangwe, ukuti bapyunge ngu mulimo.

⁴ Nomba fwebo twakutwalilila bwaka ukulomba nokushimika.”

⁵ Ibumba lyonse lyalisekelele pakumfwa nga mashiwi. Elo basalile Sitefano, umwalalume uwayiwile ichichetekelo no Mupashi Wabuta, Filipo, Pulokolasi, Nikana, Timoni, Pamenasi na Nikolasi umwinafyalo uwaku Antiyoki uwaalukile nokukonka ifya Chiyuda.

⁶ Balibaletele kubatumwa. Elo abatumwa babalombele nokubabikapo amaboko.

⁷ Elo amashiwi aku Lesa afikile konse-konse, nempendwa yabena Klistu yalikukulilako mu Yelusalemu. Nabo bachipupila abenji balichetekele.

Bayikata Sitefano

⁸ Sitefano ayiwile ubwanshi nefiso fyaku Lesa. Alikuchita ifyafiso ifikulu pakati kabantu.

⁹ Nomba abantu bambi balimutalikile abamuchilonganino cha Bantu Bantungwa (efyo chali kwitwa.) Bali Abayuda abafumine ku Sayilini naku Alekisandiliya. Kwali nabambi abafumine kuchalo chaku Silisiya na Asiya.

¹⁰ Mupashi waku Lesa wapele Sitefano umulangwe uukulu ichakuti nga asosa abantu tabalikumuchimfya.

¹¹ Elo kubufinsolo bachenjeleke abantu bamo ukuti babepeshe Sitefano ati, “Twalimumfwile akopontela Mosesi na Lesa!”

¹² Muli nji nshila baletele ichimfulunganya kubantu nakubakulu bamuchalo nabasambishi ba Mafunde. Elo bayikete Sitefano nokumutwala kuchilye.

¹³ Baletele bakamboni ababufi abasosele ati, “Ngu muntu lonse alasosa amashiwi akusalula inanda yaku Lesa na Mafunde akwa Mosesi.

¹⁴ Twalimumfwile ulo alikusosa ati uyo Yesu waku Nasaleti akonaula nji nanda yaku Lesa nokwalula utufuto uto Mosesi atupele!”

¹⁵ Nomba bonse abali muchilye batontele amenso pali Sitefano. Elo babwene impumi yakwe yaba kubati nimpumi yamungelo.